Хүний эрхийн дэд хорооны өнөөдрийн хуралдаанаар Монгол Улс дахь хүний эрх, эрх чөлөөний талаарх Хүний эрхийн Үндэсний комиссын 18 дахь илтгэлийг сонслоо.

Энэ үеэр Хүний эрхийн Үндэсний комиссын дарга Ж.Бямбадорж "Цагдаагийн хорих байр сэлгүүлдэг байдлаас болж эрүүдэн шүүлт улбаалж гарсан. Хуулиар харъяалагдсан газар нь хорих үүрэгтэй. Хэрвээ Т.Чимгээ, Д.Содномдаржаа нарыг 461 дүгээр хорих ангид хорьсон бол хэзээ ч эрүүдэн шүүлт гарахгүй байсан. Т.Чимгээ, Д.Содномдаржаа нар болон хоригдох ангийн нөхцөл байдалтай танилцахаар манай ажилтан хэд хэдэн удаа очсон. Би нэг удаа очиж байсан.

Гэвч “улсын нууц” гээд уулзуулаагүй.

Манай ажилтанг очих сургаар ТЕГ-ын ажилтан очдог байсан. Хэдэн сарын өмнө Төв аймгийн хорих ангид хоригдож байгаа иргэнээс гомдол ирсэн. Тэр хүнийг тухайн хорих ангийн цагдаагийн хоёр албан хаагч чүхийг дүлийртэл зодсон байна лээ. Хөл нь хугарсан гэдэг гомдол ирсэн. Энэ бол ганц Т.Чимгээ, Д.Содномдаржаа нараар хязгаарлагдахгүй өдөр бүр гардаг гэмт хэрэг.

Үнэхээр Т.Чимгээ, Д.Содномдаржаа нарт хилс хэрэг хүлээлгэсэн бол нэг минут, нэг цаг ч хорих ангид байлгаж болохгүй.

Хууль хяналтын байгууллага яаралтай энэ асуудлыг тодорхой шийдэх хэрэгтэй" гэв.

Мөн хуралдааны үеэр хууль хяналтын байгууллагын удирдлагууд болон Хүний эрхийн үндэсний комисс болон ажлын хэсгийн гишүүдэд эдгээр иргэдийг эрүүдэн шүүсэн бичлэгийг үзүүлэх хэрэгтэй гэж үзлээ. Ингээд Засгийн газарт тус саналаа хүргүүлэхээр боллоо.

Р.Хишигжаргал