УИХ-ын Хууль зүйн байнгын хорооны өнөөдрийн хуралдаанаар АТГ-ыг дарга, дэд даргыг чөлөөлөх, томилох асуудлыг хэлэлцлээ.
Монгол Улсын Ерөнхийлөгчийн зүгээс тус байгууллагын даргар З.Дашдавааг, дэд даргаар Ж.Батсайханыг томилуулах саналаа УИХ-д хүргүүлсэн юм. Энэ хүрээнд АТГ-ын даргыг чөлөөлж, шинээр дарга, дэд даргыг томилох болсон шалтгааныг Ерөнхийлөгчийн Тамгын газрын дарга З.Энхболд танилцуулсны дараа дараа УИХ-ын гишүүд асуулт асууж хариулт авлаа.
УИХ-ын гишүүн Л.Мөнхбаатар: Нэр дэвшигчдийн хувьд асуудалд алга. Гэхдээ томилгооны процедурын талаар тодруулмаар байна.
АТГ-ын даргыг үүрэгт ажлаас нь чөлөөлөхдөө УИХ-аас тогтоол гаргадаг. Тиймээс эхлээд тогтоол гарах уу. Үүнийхээ дараа томилгоо хийх үү
Хууль зүйн байнгын хорооны дарга Ш.Раднаасэд: Хуулийн салаа утгатай ийм асуудалд Үндсэн хуулийн цэц ажлаа хийх хэрэгтэй. Энэ асуудлаар цэцэд хандсан ч жил гаруй хугацаа өнгөрчихлөө. Үндсэн хуулийн цэц ажлаа хийгээгүйгээс болж ийм байдал үүссэн.
ЕТГ-ын дарга З.Энхболд: Томилдог байгууллагын хувьд чөлөөлөх асуудлаа давхар шийдсэн байх. Ерөнхийлөгч зөвхөн нэр дэвшүүлдэг.
УИХ-аар томилогддог зургаан байгууллагын томилгооны дөрвийн нь томилгоо салаа утгатай. Энэ асуудлыг Авлигын эсрэг хуулиар оруулж ирсэн.
УИХ-ын гишүүн Н.Оюундарь: Иргэний нийгмийн байгуулллагаас ямар асуудал тавьсан бэ. Тэр дагуу яаж ажиллах вэ.
З.Дашдаваа: Миний бие өчигдөр нээлттэй хэлэлцэүүллэгт оролцсон. Иргэдийн зүгээс АТГ-ыг иргэдэд нээлттэй болгооч гэсэн хүсэлт тавьсан. Томилогдсон тохиолдолд бүрэн боломжтой гэсэн хариулт өгсөн. Мөн нийгэмд дуулиан тарсан хэргүүдийг яаж шийдвэрлэх вэ гэдгийг асуусан. Ажлаа авсан тохиолдолд зохион байгуулалтыг сайжруулж ажиллана гэсэн.
Ж.Батсайхан: Нээлттэй хэлэлцүүлэгт оролцсон иргэд АТГ-ыг нээлттэй болгооч гэсэн хүсэлт тавьсан. Урьдчилан сэргийлэх ажлаа иргэдэд тулгуурлаж хийгээч гэсэн. Үүнийг томилогдсоны дараагаар хэрэгжүүлэх боломжтой. Нийгэмд дуулиан тарьсан хэргүүдэд ямар арга хэмжээ авч байгаа вэ гэсэн. Миний бие томилогдсон тохиолдолд шуурхай арга хэмжээ авч ажиллана гэсэн хариулт өгсөн.
ХЗБХ-ны дарга Ш.Раднаасэд: Олон нийт их буруу ойлголттой явдаг. Авлигын индекс буурвал АТГ ажлаа хийж байна. Ихэсвэл муу хийж байна гэж ойлгодог. Авлигын индексийг бууруулах нь ганцхан АТГ-ын хийх ажил биш. Бүх нийтийг хамтрах хэрэгтэй.
Үндэслэлгүйгээр хөрөнгөжих гэдэг заалтаар хэрэгжиж, хийж байгаа ажил харагдахгүй байна. Яагаад дарга нар олон зуун тэрбумаар байр аваад байгааг шалгадаггүй юм бэ.
З.Дашдаваа: Хууль бусаар баяжих гэдгийг яаж тогтоох талаар ХОМ-т үнэлгээ, шинжилгээ хийж тогтооно. Мөн иргэдийн мэдээллийн дагуу шалгана. Манайх ХОМ-ээр тухайн хүний зарлагыг тооцдоггүй. Тухайн хүн нэг сая төгрөгийн цалинтай байж таван сая төгрөгийн хэрэгцээтэй байвал яах вэ. Хэрвээ томилогдвол энэ чиглэлээр ажиллана.
Ж.Батсайхан: Хууль бусаар хөрөнгөжих гэдэг заалт 2015 онд Эрүүгийн хуулийн өөрчлөлтөөр орсон. Өмнө нь Авлигын эсрэг хуульд заасан зөрчлийн шинжтэй агуулгатай байсан гэсэн юм. Ингээд байнгын хорооны хуралдаанаар АТГ-ын даргаар З.Дашдавааг томилохыг 84.6 хувиар, дэд даргаар Ж.Батсайханыг томилохыг 91.7 хувир тус тус дэмжив.
Г.Нацаг
