Ерөнхий сайд, АН-ын дарга асан Н.Алтанхуяг цаг үеийн асуудлаар мэдээлэл хийж байр сууриа илэрхийллээ. Соёлын төв өргөөний хүзүүвч дэх АН-ын барилгыг нурааж, газрыг нь зарсан эсэх тухай асуудалтай холбогдуулж өнөөдрийг хүртэлх хугацаанд Н.Алтанхуяг ам нээгээгүй явсан юм. Харин намаас нь хөөснөөс эхлээд үнэн худлыг нь дэнслээгүй албан бус мэдээллүүд хөврөх болсон нь Н.Алтанхуягийг ийн тайлбар хийхэд хүргэсэн бололтой. Тэрбээр гурван асуудлын хүрээнд байр сууриа илэрхийлсэн юм. Тэдгээр нь АН-ын С.Эрдэнэтэй шууд болон шууд бусаар холбогдож байна.

С.Эрдэнэ ба Ардчилсан нам

АН-ын хувьд дотоод сонгуулиа улс орон даяар явуулж намын даргаа сонгосон нь 2017 оны үйл явдал. Одоогийн Ерөнхийлөгчийн Тамгын газрын дарга З.Энхболд намын даргын үүрэг гүйцэтгэгчийн хувиар таван нэр дэвшигчид нэжгээд сум гардуулж эвтэй, найртай байх тухай Алунгоо эхийн сургаалыг сануулж асан цаг саяхан. Гэвч намын даргын сунгаанд ялалт байгуулж, удирдлагын эрхийг өөрт төвлөрүүлсэн сайд асан С.Эрдэнэ өнгөрсөн хугацаанд юу хийв.

Энэ тухай “АН өнгөрөгч парламентын сонгуульд есхөн суудал авсан. Үүний дараа намын даргын сунгаа явуулж миний бие өрсөлдсөн. 2016 онд Ерөнхийлөгч асан Элбэгдоржийг Монголын улс төрийн мафи, МАНАН-гийн толгойлогч гэж хэлснээр адлагдах болсон. Ц.Элбэгдорж, М.Энхболд нар С.Эрдэнийг намын дарга болгохын тулд бүх юмыг хийж намайг унагааж, гүтгэж, бүр АН-ын байрыг зарж идсэн гэсэн зүйл гаргаж ирсэн. Цагдаа, тагнуул, АТГ гээд хууль хүчний бүх газраар нь шалгуулж ирсэн.

Хамгийн гол нь яагаад ингэх болов гэхээр тухайн үед Ерөнхийлөгчийн сонгуульд нэр дэвшихээ зарласан юм. Үүнээс таван өдрийн дараа миний эхнэрийг саатуулж, дараа нь ойр дотнын хүмүүсийг хорьж эхэлсэн. Намайг АТГ дээр дуудаад “Та ийм тийм асуудалтай байж яаж Ерөнхийлөгчид нэр дэвших вэ” гэдэг өнцөг гаргаж ирсэн. Угаасаа тэр үед одоо ил болоод байгаа шударга бустай тэмцэнэ гээд шийдчихсэн байсан учраас намайг зайлуулах хэрэгтэй байсан. МАН дахь үүрээ эвдүүлчихээд АН-д үүрээ засах зорилгоор С.Эрдэнийг даргаар тавьсан. Тэгээд С.Эрдэнийг барьцаалж Монгол Улсын төрөөр тоглож байна.

С.Эрдэнэд нэг үг хэлье. Чамайг би дэндүү сайн мэднэ. Одоо ард түмэн ч мэддэг болж байна. С.Эрдэнийг ямар гэмт хэргээр нь хэн барьцаалчихаад байгааг ард түмэн ойлгочихсон. Чи гэмт бүлэглэлийн гар хөл болж, тэдний дохио зангаагаар юм хийдгээ боль. Чам шиг хүнд АН-ын дарга байх эрх алга. Чамайг зайлуулна гэдгээ хатуу хэлье" хэмээн мэдэгдлээ.

Хэрэг биш болбол арай зөөлөн чихтэй, хялбар хоол болох Р.Амаржаргалыг Ерөнхийлөгчийн сунгаанд дэмж гэдэг даалгавар ирснийг өнөөдөр АН-ын мянга мянган гишүүд баталдаг. Аз болж Х.Баттулга намын сунгаанаас гарч ирж Ерөнхийлөгчийн сонгуульд ялсан” гэдгийг Н.Алтанхуяг онцолсон юм.

Нам ба С.Эрдэнэ

Үргэлжүүлэн тэрбээр “АН өнөөдөр улс орны хөгжил, бодлого, ард түмний ахуй амьдрал ярихаа больсон. Юу ярьдаг болсон гэхээр 60 тэрбум, Эрдэнэтийн 49 хувийн хэргүүдийг хамгаалдаг болсон. Эрүүдэн шүүлтийг байх ёстой зүйл гэж хэлдэг болсон. Энэ бүхнийг дан ганц Ардчилсан нам гэж бодохгүй байна. Энэ бол удирдлагын тогтолцоог нь дээрэмдэж авсан хүмүүс нэр хүнд, олон мянган гишүүний итгэл, сэтгэлээр тоглож байгаа үйлдэл. Үүнийг АН-ын гишүүд дэмжихгүй, үзэж чадахгүй.

Өнөөдөр намын удирдлага АН-ыг нам биш болгож байна. 60 тэрбумын схемийг АН-д хийж байна. Энэ бол шившиг, гутамшиг. Би ганцхан жишээ хэлье. Шившигтэй зүйл ч хэлж байж намаа цэвэрлэх нь. Зөвхөн АН-ын залуучуудын даргад өрсөлдөхийн тулд 120 сая төгрөг төлж байна. Залуу үе юу болох юм бэ. Аймаг, дүүргийн намын даргад өрсөлдөхийн тулд 15-20 сая төгрөг төлдөг. Гишүүдийнхээ дунд сургалт явуулахын тулд 60 сая төгрөг цуглуулдаг. Нам биш мөнгөний сүлжээ үүссэн байна. Манай С.Эрдэнийн хийдэг нийгмийн даатгалын сүлжээ болсон. Намын гишүүнээс хасдаг, хөөдөг болсон. АН-ын одоогийн нөхцөл байдлын талаар ярихад ер нь дан ганц АН гэлтгүй нам гэдэг бол улсын хөгжлийг тодорхойлох, ард иргэдийн аж амьдралыг дээшлүүлэх бодлогыг гаргаж ирэх ёстой. Шинэчлэлийн Засгийн газар үүнийг хийж байсан. Харин 2014 онд манай Засгийн газрыг заналтай нь аргагүй огцруулсан.

Үүнд С.Эрдэнэ хамгийн их үүрэгтэй оролцож шанд нь дараагийн дөрвөн жил УИХ-д суусан. АН Монголын нийгэмд үүсээд байгаа асуудалд зөв байр суурьтай байсан гишүүдээ намаас хөөж хасдаг боллоо.

Тиймээс Ц.Элбэгдорж тэргүүтэнд хариуцлага тооцох хэрэгтэй. Олон хүний амьдралаар тоглож, нийтийн өмчийг хумсалж, улс орны хөгжлийг хэдэн арван жилээр нь удаашруулсан эдгээр хулгайч нартай асуудал ярихгүй бол тэр шударга ёс чинь хэзээ ч тогтохгүй. Тэд бүх юмны муу муухайг АН-д наачихаад ирээдүйд золиос болгох гээд байгаа юм уу. АН-ын бүх гишүүнд хандаж намдаа шинэчлэл хийхийг уриалж байна. Хулгайчдын дохио зангаагаар айж хөдөлдөг цаг өнгөрсөн. Ц.Элбэгдорж тэргүүтэнд хандаж хэлэхэд та нарт АН томдоно, ардчиллын үнэ цэнэ болсон намаас хуруугаа тат гэж хэлмээр байна. Би С.Эрдэнийг сайн мэднэ. Энэ хүн ямар гэмт хэрэг, зүйл ангиас болоод хэнд барьцаалагдаад бусармаг юм хийгээд байгааг нь ч мэднэ. Тиймээс чи энэ намын дарга байх ямар ч эрхгүй. Чамайг одоо энэ намаас зайлуулна.

Н.Алтанхуяг яагаад 2014 онд новш болох хэрэгтэй байсан юм гэхээр Оюутолгой, Тавантолгой, "Эрдэнэт"-ийн асуудалд ганцхан саад байсан юм. Тэр нь А үсэг буюу Алтанхуяг. Тиймээс дайр, устга гэсэн. Тэгээд Алтанхуяг новш болсон уу, болсон. Харин үхээгүй л байна” гэв.

Намаа шинэчлэх шийдэл

У.Хүрэлсүхийн Засгийн газрыг огцруулах асуудлыг хэлэцэх үеэр эрх баригч МАН дотооддоо хоёр хуваагдсан. Санал хураах үеэр болон одоо ч үргэлжилж байгаа энэ зөрчил нь 27x36 гэсэн харьцаатай явж байгаа юм. Гагцхүү У.Хүрэлсүхийн Засгийн газрыг огцруулахыг дэмжсэн намынхаа улс төрийн шийдвэрээс зөрсөн Ж.Батзандан, Л.Болд нар өдгөө АН-аас өрх тусгаарлаж шинээр нам байгуулахаар эрэлхийлэх болсон. Харин уг хоёр гишүүний намд Н.Алтанхуягийг элсэх тухай яриа улс төр, нийгмийн хүрээнд гарах болсоор удаж байгаа ч тэрбээр албан ёсны тайлбар өгсөн нь анхаарал татаж байна. Тэрбээр “Л.Болд, Ж.Батзандан нарын гишүүний тэмцлийг зарчмын хувьд дэмжиж байгаа. Ямар ч байсан намаа байгуулаг. Миний хувьд эхлээд АН-ын цэвэрлэмээр байна” гэсэн юм.

Мөн “АН-ын гишүүд минь одоо бүгдээрээ нэгдэж нийлье. Яршиг л байна, юун С.Эрдэнэ вэ. Өөрчилье.

Л.Болд, Ж.Батзандан хоёрыг би зөв байр суурь баримталсан гэж бодож байгаа. 60 тэрбум зэрэг Монголын нийгэмд болж буй шударга бусын асуудлаар дуугарсан. Гэтэл С.Эрдэнийн байр сууриас зөрсөн болохоор намаас хөөж, хассан.

Гэхдээ тэр хоёр өөр нам гэж явахаа болих хэрэгтэй. Оронд нь нэгдэж нийлээд намаа шинэчилье. Тэртээ тэргүй энэ нийгэмд бид үлдэхгүй. Үр хойч та нар л үлдэнэ. Тиймээс үлдэж байгаа энэ нийгмийг эрүүл саруул болгоё. Би АН-ын хувьсгалд МУИС-ийн багш байхаасаа эхлэн ажилласан. Намайг хассан тухай албан бичиг би олж үзээгүй л байна. Тэд хасдаг, тэднээр хасуулдаг гэж юу байсан юм. Одоо боль, хэтэрлээ. Л.Болд, Ж.Батзандан нар хасагдлаа гээд яагаад шинэ нам байгуулдаг юм. Намаа шинэчлэхийн төлөө явах ёстой юм шүү дээ” гэдгийг хэллээ.

Г.Сонор