УИХ нэгдсэн чуулганаар АТГ-ын даргад З.Дашдаваа, дэд даргаар Ж.Батсайхан нарыг томилох асуудлыг хэлэлцэж байна. Энэ үеэр АТГ-ын дарга дэд даргад нэр дэвшиж буй гишүүдээс асуулт авч хариулт авлаа.

УИХ-ын гишүүн О.Баасанхүү: Эр зориг байна уу. Ингэж асууж байгаа шалтгаан нь хэрвээ би Хуульзүйн сайд ч юм уу, эсвэл хэн нэгэн өндөр албан тушаалтныг шалгуулъя гэж хандахад шалгаж өгөх үү. Миний хэлсэн 72 сая ам.долларын оффшор данстай хүнийг шалгах уу. Мөн ЖДҮХС-гаас зээл авсан гишүүдийг шалгах уу. Хуулийн байгууллагын авлигачин даргатай тэмцэж чадах уу.

З.Дашдаваа: Миний бие хуулийни хүрээнд ажиллана гэж бодож байна. Таны асуусан хэргүүдийг ажлаа авсныхаа дараа шалгаж танд хариу хэлнэ.

Ж.Батсайхан: Албан үүргээ гүйцэтгэхэд харшлах зүйл гарахгүй байх.

УИХ-ын гишүүн Х.Болорчулуун: АТГ-ын дарга нь авилгажсан байна. Том авилгалтай тэмцэхэд та нарт том хүндрэл тулгарна. Энэ нь хамгийн ойрын хүнээр чинь нөлөөлүүлэх гэж оролдоно. "Манай аавын найз, манай намын хүн ч гэх юм уу”.

УИХ-ын гишүүн Ц.Даваасүрэн: Улс орны эрх ашгаас урвасан хэн ч бай, Монгол Улсын хууль, хүчний өмнө толгой гудайдаг байх ёстой. Монголд амьдрах орон зайгүй байх ёстой. Өмнөх дарга нар сайн ажилласан. Том хэргүүдийг илрүүлсэн. Энэ хэргийг баллахгүй шалгаарай. АТГ-ын ажилчид тендерт оролцсон иргэдийг дарамталдаг шүү. Үүнийг анхаараарай. Улс орноос урвасан хүмүүстэй хатуу тэмцээрэй.

УИХ-ын гишүүн Т.Аюурсайхан: АТГ-ын дарга Х.Энхжаргал 33 их наяд төгрөгийн оффшорыг Өршөөлийн хуулиар цагаатгасан гэж ярьсан. Та тэр хуулийг яагаад батлуулсан юм бэ З.Энхболд дарга аа.

ЕТГ-ын дарга З.Энхболд: Өршөөлийн хуулиар цагаатгасан 33 их наяд төгрөг, бонд хоёр ямар нэгэн уялдаа холбоо байхгүй. Үүний учрыг УИХ олох хэрэгтэй. Тэгэхгүй бол ийм популист яриа гарч байна. 33 их наяд төгрөгийн эзнийг олж зарлах хэрэгтэй. Үндэслэлгүй хөрөнгөжсөн бүх хүнийг ажлаас нь халах хэрэгтэй. Энэ бол Эрүүгийн хэрэг.