ЗГХЭГ-ын дарга Л.Оюун-Эрдэнэ “Монголын соёл амралтын чухал газрууд бусдын өмчлөлд очсон нь төрийн эрх бүхий албан тушаалтнуудын ашиг сонирхолтой холбоотой” гэсэн ноцтой мэдэгдлийг өчигдөр хийсэн юм.

Түүний хэлснээр Нийслэлийн Засаг даргын Тамгын газрын барилга, Улсын драмын театр, Олон Улсын хүүхдийн “Найрамдал” зуслангийн урд хэсгийн бүх газар, Үндэсний соёл амралтын хүрээлэн, Их тэнгэрийн амны ойролцоох бүх зай талбай өмчлөгдсөн болж таарсан. Үүгээр ч зогсохгүй Төрийн ордны газрыг хүртэл өмчилсөн байж магадгүй гэж хэлснийг сонссон иргэд “Арай худлаа байлгүй дээ” гэж эргэлзсэн.

Эндээс Л.Оюун-Эрдэнэ сайдын эл мэдэгдэл ортой юу, эс бөгөөс ор хоосон үг үү гэдгийг асуухад хүрч байна.

Улиран өнгөрсөн цаг хугацаанд түүний улстөрчийн карьер, албан тушаалын төлөөх тэмцлийн замналыг хэрэгсэхгүйгээр харин хэлсэн үг, хийсэн мэдэгдлээс нь харвал тийм ч оргүй хоосон үг амнаасаа унагаж байгаагүй аж. Наандаж л “Эрдэнэт” үйлдвэртэй холбоотой луйвраас эхлээд Сүхбаатарын талбайн газартай холбоотой мэдэгдэл нь үнэн болж таарсан. Улмаар Сүхбаатарын талбайн өмнөх 2.5 га талбайг “Ю Би Констракшн” компани нэр дээрээ шилжүүлж аваад банканд 9.6 сая ам.доллараар барьцаалсан нь ил болсон. Барилгын засал чимэглэл хийх эрх бүхий “Х” тайлантай компани Сүхбаатарын талбайн газраас ингэж хумсалсан юм чинь Төрийн ордонг газартай, байшинтай нь өмчилж авахад хөрөнгө чинээтэй, эрх мэдэлтэй хүмүүст ядах юм байхгүй биз.

Учир нь одоогоос 10-аад жилийн өмнө Төрийн ордныг нүүлгэн шилжүүлэх, бүр тодруулбал шинэ барилгатай болгох талаар яригдаж байв.

Ашиглалтад ороод хагас зуун жилийн нүүр үзэж буй эл барилга чанарын шаардлага хангахгүй болсон гэх мэргэжлийн хяналтын дүгнэлт гарсан байдаг. Үүний дараахан Төрийн ордны барилгыг ордны ардах цэцэрлэгт хүрээлэнд шинээр барих эс бөгөөс хотын төвөөс гаргах тухай яригдсан нь багагүй дуулиан дагуулсан юм. Энэ бол 10-аад жилийн өмнөх үйл явдал гэдгийг дахин хэлье. Эндээс л Л.Оюун-Эрдэнэ сайдын хэлсэн дээрх мэдэгдэл ортой байх магадлалтай юм.

Учир нь нэгэнт чанарын шаардлага хангахгүй гэж мэргэжлийн байгууллагаас акталснаас хойш Төрийн ордны барилгыг нүүлгэх эсэх нь цаг хугацааны асуудал болчхоод байна.

Хэсэг бүлэг хүмүүсийн дунд энэ тухай яригдсан тухай хэдхэн хоногийн өмнө бор шувуу ниссэн нь үүнийг улам батлах мэт. Эндээс л хэзээ нэг өдөр Төрийн ордныг нүүлгэх нь ойлгомжтой болж таарав.

Тэр үед нь барилгын туурин дээр эзэн суух хүсэлтэн захаас аваад тодрох нь дамжиггүй.

Энэ бүх процессийг эртнээс олж харсан самбаатай нэгэн хэдийнэ Төрийн ордны газрыг өмчилсөн байж мэдэх. Үүнийг нь Л.Оюун-Эрдэнэ сайд танадаж мэдээд мэдэгдсэн энэ байх. Тиймээс л түүний дээрх мэдэгдэл ортой байхыг үгүйсгэхгүй. Шалгаад үзэхэд буруудахгүй болов уу.
 

Б.Лхам