Шүүх, прокурор, АТГ-ын дарга нар ээлж дараагаараа ажлаа өгч, залгамжлагчийг тодруулах процесс үргэлжилж байна. Монгол Улсын Ерөнхийлөгчийн санаачлагаар Шүүгчийн эрх зүйн байдлын тухай нэмэлт, өөрчлөлт оруулахыг УИХ-ын ээлжит бус чуулганаар дэмжсэн билээ. Уг хуулийн зохицуулалтаар зургаан жилийн хугацаатай томилогддог Дээд шүүхийн Ерөнхий шүүгч болон бүх шатны шүүхийн Ерөнхий шүүгчийг хугацаанаас нь өмнө чөлөөлөх тухай боломжтой болсон юм. Хуулийн заалт хэрэгжиж эхлэхээс өмнөхөн Улсын Дээд шүүхийн Ерөнхий шүүгч Ц.Зоригт үүрэгт ажлаасаа чөлөөлөгдөх хүсэлт гаргаснаар уг хуулийн заалтыг эсэргүүцэж буйгаа харуулсан гэхэд болно. Түүнийг ажлаасаа чөлөөлөгдөх хүсэлтийг Ерөнхийлөгч тэр даруйд нь хүлээж авч, зарлиг гаргасан нь Ц.Зоригийг эртнээс чөлөөлөхөөр зэхэж байсныг илтгэсэн юм.

Ийнхүү Улсын Ерөнхий шүүгч халаагаас өгснөөр түүнийг хэн залгамжлах бол гэсэн яриа олны анхаарлыг татсаар ирсэн.

Эхний ээлжинд бүх шатны шүүгч нарын сунгаанаас Дээд шүүхийн Эрүүгийн хэргийн тэнхмийн шүүгч Д.Ганзориг хамгийн их санал авч тодорсон юм.

Сунгааны дараа Шүүхийн Ерөнхий зөвлөлөөс уг асуудлыг хэлэлцээд Ерөнхийлөгчид өргөн барьсан боловч тодорхойгүй шалтгаанаар түүнийг томилохоос татгалзсан байна.

Уг нь өнгөрсөн дөрөвдүгээр сарын 3-ны өдөр Дээд шүүхийн бүх шүүгчийн зөвлөгөөн болж Ерөнхий шүүгчийн сонгуулийг явуулахад Д.Ганзориг үнэмлэхүй санал авсан юм. Шүүгч нарын олонх нь Д.Ганзоригийг нэр цэвэр хуульч гэдгийг хүлээн зөвшөөрдөг. Тиймдээ ч итгэл найдвар өрөвтлүүлэн түүний нэрийг ийн өргөн барьсан болов уу.

Гэвч эрхэм шүүгч Ерөнхийлөгчийн таашаалд нийцсэнгүй.

Тиймээс өнөөдөр Дээд шүүхийн бүх шүүгч нар дахин хуралдаж, Ерөнхий шүүгчийг дахин сонгох учиртай. Эндээс тодорсон шүүгчийг Ерөнхийлөгч Х.Баттулга “таашаана” гэж найдаас өөр замгүй. Одоогийн байдлаар уг сунгаанд хэд хэдэн шүүгч өрсөлдөх мэдээлэл байна.

Гэхдээ өмнөх сонгуульд нэр дэвшиж, шүүгч Д.Ганзоригтой өрсөлдөж байсан шүүгч Х.Батсүрэнийг олонхын саналыг авч магадгүй гэсэн горьдлого байгаа юм байна.

Өөрөөр хэлбэл, Улсын Дээд шүүхийн шүүгчээр Х.Батсүрэнийг томилох сонирхол Ерөнхийлөгчид байгаа бөгөөд тиймдээ ч Д.Ганзоригийг томилохоос татгалзсан гэх мэдээлэл бий юм.

Хөхийсүрэн овогтой Батсүрэн нь  1965 онд Увс аймгийн Улаангом суманд төрсөн. 54 настай, эрэгтэй.

Х.Батсүрэн нь 1973-1983 онд Хэнтий аймгийн 10 жилийн дунд сургууль, 1984-1989 онд ЗХУ-ын Дотоод явдлын яамны Академи, 1997-1999 онд ХБНГУ-д Их сургуулийг тус тус төгссөн. Эрх зүйч мэргэжилтэй. 1989-1990 онд Хэнтий аймгийн Цагдан сэргийлэх ангид төлөөлөгч, 1990-1995 онд Баянгол дүүргийн Цагдаагийн хэлтэст төлөөлөгч, 2000-2004 онд Шүүхийн ерөнхий зөвлөлд мэргэжилтэн, 2004-2011 онд Нийслэлийн захиргааны хэргийн шүүхийн шүүгч, 2011 оноос тус Шүүхийн Ерөнхий шүүгчээр, 2012 оноос Улсын дээд шүүхийн шүүгчээр тус тус  ажиллаж байгаа. Шүүгчээр 15 жил ажиллаж байгаа нэгэн аж.

Г.Нацаг