ЗГХЭГ-ын дарга Л.Оюун-Эрдэнэ Оюутолгойн гэрээг шалгах ажлын хэсгийн дүгнэлт болон Итгэлийн зээл, махны үнийн өсөлт зэрэг цаг үеийн асуудлаар мэдээлэл хийлээ.

Тэрбээр “Энэ гэрээтэй холбоотой  авлига авсан байж болзошгүй хэрэг 4-5 хүнд үүсэх талаар мэдээлэл авсан. АТГ шалгаж байгаа. Нэр хэлэх боломжгүй. Ажлын хэсгийн дүгнэлтийг Засгийн газарт хүргүүлнэ гэсэн. Үүний дараа Оюутолгойн удирдлагуудтай уулзаж, цаашид ямар арга хэмжээ авах талаар ярилцах байх. Тиймээс УИХ яаралтай ажлын хэсгийн дүгнэлтийг хэлэлцэж, цэгцлэх хэрэгтэй байна. АТГ-ын дарга асан Х.Энхжаргал мэдэгдэл хийсэн. Үүнийг та нар мэднэ. Оюутолгойн гэрээнд гарын үсэг зурсан хүмүүс хардагдаж байгаа. Жишээлбэл, нэг компанид давуу эрх олгосон гэдэг асуудал байна. “Модерн номадс” компани тэдний нэг. Шатахуун түгээхтэй холбоотой асуудал бий. Дэлгэрэнгүй мэдээллийг сайн мэдэхгүй.

Ажлын хэсгийн дүгнэлтийг Д.Дамба-Очир гишүүнийг тараасан эсэхийг би мэдэхгүй. Албан ёсны мэдэгдэл ирээгүй.

Эхлээд энэ асуудлыг УИХ-ын чуулганаар хэлэлцээд, дараа нь Эдийн засгийн байнгын хорооны хуралдаанаар хэлэлцэгдэх ёстой. Үүний дараа Засгийн газарт ирэх учиртай. Үүний дараа байр сууриа илэрхийлнэ. Аудитын дүгнэлтийн хувьд өмнөх удирдлага нь ажлаа өгөхөөс өмнөхөн мэдэгдсэн. Энэ бол хариуцлагагүй үйлдэл. Яагаад өмнө нь энэ тухай хэлж, яриагүй юм. Гэтэл ажлаа өгөх болонгуутаа мэдэгдэл хийсэн. 

Сайд хүн авлигад холбогдсон гэх мэдээлэл цацагдсны дагуу хууль хяналтын байгууллагаас тодруулсан. Одоогоор ийм нөхцөл байдал тогтоогдсон зүйл байхгүй гэсэн. Шалгагдаж байгаа ийм хэрэг ч байхгүй гэсэн.

Итгэлийн зээлтэй холбоотой асуудал Засгийн газрын мөрийн хөтөлбөрт тусгагдсан зүйл.

Гэхдээ ямар арга замаар олгох вэ гэдгийг Засгийн газрын хуралдаанаар хэлэлцэнэ. Өөрөөр хэлбэл, эдийн засгийн хувьд ямар боломжтой хувилбар байх вэ гэдгийг ярилцана. Өргөн хэрэглээний үнийг тогтворжуулах талаар цогц шийдэл олохыг Ч.Улаан сайдад даалгасан. Долоо хоногийн сүүлчээр Засгийн газрын ээлжит бус хуралдаан болох байх. Энэ үеэр ямар арга хэмжээ авах талаар ярилцлана.

Зохион байгуулалттайгаар махны үнийг хөөргөж байгаа талаар мэдээлэл ирсэн. Үүнийг тагнуулын байгууллагад шилжүүлсэн. Үүний дараа асуудал тодорхой болно.

Стандарт банктай холбоотой хохирол үүссэн учир Засгийн газраас АТГ болон бусад хуулийн байгууллагад хүсэлт тавьсан. Өөрөөр хэлбэл, Жастын Ш.Батхүүгийн өмчийг шүүхэд шилжүүлэх замаар улсад хурааж, Эрдэнэт үйлдвэрийг хохиролгүй болгооч гэж. Тэгэхгүй бол ирэх аравдугаар сар хүртэл хугацаа өгсөн. Хэрвээ энэ асуудлаа шийдэж чадахгүй бол ажлын хэсэгтэй хариуцлага тооцно гэдгээ мэдэгдсэн.

Ш.Батхүүгийн хөрөнгө 40 сая ам.долларын өрийг төлөхөөр байсан гэдэг мэдээлэл бий.

Энэ хөрөнгөө бэлэглэлийн гэрээгээр бусдад шилжүүлсэн. Өөрөөр хэлбэл, санаатайгаар нуун дарагдуулахаар бусдад шилжүүлсэн гэж үзэх үндэслэлтэй. Засгийн газрын зүгээс энэ хэрэгт анхаарал хандуулна" гэлээ. 

Г.Нацаг