Хувь хүмүүс хоорондын харилцаа нь ямар байдгийг хэлж мэдэхгүй ч, Ерөнхийлөгч Х.Баттулга Сангийн сайд Ч.Хүрэлбаатараас харшилтай бололтой. У.Хүрэлсүхийн Засгийн газрын танхим бүрдэхэд зөвхөн Сангийн сайд Ч.Хүрэлбаатарт хориг тавьсан нь үүнийг илтгэнэ. Дараа нь Сангийн яамнаас боловсруулж, УИХ-аар батлуулсан 2018 оны төсөвт хэсэгчлэн хориг тавьж байв. Хамгийн сүүлд 2019 оны төсөвт бүхэлд нь ээлжит хоригоо тавьсан юм. Хачирхалтай нь, энэ удаад Татварын багц хуульд дахин хориг тавилаа. Үндсэндээ Төрийн тэргүүний зүгээс Сангийн сайд Ч.Хүрэлбаатарын хувь хүн, хэрэгжүүлж байгаа бодлогод нь дөрвөнтөө ийн хориг тавьсан хэрэг.

Монголын эдийн засаг эрчимтэй уналтад орж, хөрөнгө оруулагчид Монголоос дайжсан уу, дайжсан. Жил бүр зохион байгуулдаг Эдийн засгийн форумын оролцогчдын тоо цөөрч, УИХ-ын дарга руугаа оймс хүртэл шидэж байсан нь 2016 он.

Тэгэхэд Ерөнхий сайдаар ажиллаж байсан Ч.Сайханбилэг хүртэл “Босоо Ганбаа хүртэл хэвтлээ” хэмээн эдийн засгийнхаа чадамжийн дүгнэж байв. Түүнээс хойш гурван жилийн хугацаанд юу өөрчлөгдөв. Ямар ч байсан хоёр, гурван эдийн засагтай мэт явсан төсөв мөнгөний хуваарилалт, зарцуулалт эмх цэгцэндээ орж байна.

Гадаадын хөрөнгө оруулагчдын алдуурсан итгэл эргэн Монгол руу чиглэж, аажмаар нэмэгдэж буй. Ээлж дарааллан гадаад зах зээлээс босгосон Бондуудын эргэн төлөлтийг хугацаандаа төлөв.

Эдийн засгийн өсөлт ч энэ хугацаанд мэдэгдэхүйц өслөө. Харин одоо үе үеийн Засгийн газрын хүрээнд ярих төдий явж ирсэн Татварын тухай багц хуулийг баталж, үр дүнг нь үзэх л үлдэж байна. Гэтэл Ерөнхийлөгч Х.Баттулгын зүгээс хориг тавьчихлаа, бүр бүхэлд нь.

Уг нь эдийн засаг нь сэргэлттэй, өсөлттэй яваа энэ цаг үед популист улстөрчид нь хойш татдаггүй л юм бол хэрэгтэй бодлого, шийдвэр бүрийг хамгийн дэмжих ёстой хүн нь Ерөнхийлөгч баймаар. Эрхбиш энэ улсын Төрийн тэргүүний хувиар шүү дээ.

Гэтэл эдийн засагтай холбоотой томоохон шинэчлэл, шийдвэр гарах бүрт хориг тавьж улсынхаа ажлыг хойш чирэх нь Төрийн тэргүүнд хуулиар олгосон бүрэн эрх мөн үү. Сангийн яамнаас санаачлан боловсруулж, УИХ-аар батлуулж байгаа хуулийн төсөл бүрт хориг тавих гэж Та тангараг өргөөгүй нь лав. Тиймээс хувийн эрх ашгаа түр азнаад улс орноо бодмоор байна, Ерөнхийлөгч өө. 

С.Сүлд