Энэ сарын 15-наас нийслэлд түүхий нүүрс хэрэглэхийг хориглосон Засгийн газрын тогтоол хэрэгжиж эхлээд байна. Үүнтэй холбогдуулан Орчны бохирдлыг бууруулах үндэсний хорооны Ажлын албаны дарга Ч.Гантулгаас тодрууллаа.

-Түүхий нүүрсийг хэрэглэхийг хориглосон тогтоол өмнөх долоо хоногоос хэрэгжиж эхэлсэн. Тэгвэл сайжруулсан түлшний нөөцийг хэр бүрдүүлсэн бэ. Хэчнээн тоннын нөөц байгаа вэ. Үүнээс гадна зөвшөөрөгдсөн хэмжээнээс дээш утаа гаргаж байгаа автобусыг явуулахгүй гэдэг шийдвэр гаргасан. Энэ шийдвэр хэрэгжиж байна уу?

-Засгийн газрын тогтоолын хэрэгжилтийг хангаж ажиллаж байна. Өнгөрсөн хугацаанд багагүй ажлыг зохион байгуулж ирсэн. Тухайлбал, “Тавантолгой түлш” ХХК-д нөөц бий болгох, нөөцийг бий болгох, тээвэрлэлт хангах ажлуудыг хийлээ. Энэ ажлууд үе шаттайгаар хийгдэж байна. Энэ сарын 15-наас түүхий нүүрсийг нийслэл рүү нэвтрүүлэхийг хориглосон тогтоол хэрэгжиж эхэлсэн. Мэдээж аливаа шинэ ажилд саад тотгор гарна. Энэ бүгдийг шийдвэрлэхийн тулд ажиллаж байна. Иргэд их бухимдаж, эсэргүүцсэн зүйл байхгүй байна. Сошиолд гарсан мэдээ бүрт эмзэгээр хандах хэрэггүй болов уу. Ажил шат дарааллаараа явж байна. Багаар бодоход 540 цэгээр түгээлт хийж байна. Мөн банк болон “Сайн” картны систем боловсруулж, программ хангамжийг хийж дууссан. Тиймээс автобус болон ус авдаг картаа цэнэглээд түлшээ авах боловсронгуй систем бий болж байна. Түүхий нүүрс борлуулж байсан 540 цэгтэй хамтран ажиллана. Тэр хүмүүст хатуу нөхцөл тавихгүй.

Автобусны хувьд,  Орчны бохирдлыг бууруулах Үндэсний хорооноос энэ жил насжилт ихтэй 100 автобусанд шүүлтүүр суурилуулахаар ажиллаж байна. Сонгон шалгаруулалт эхэлсэн. Үе шаттайгаар энэ ажлыг цааш үргэлжлүүлнэ. Нийтийн тээврийг бодлогын түвшинд шинэчлэж, газ болон цахилгаан автобусаар үйлчлэх цаг нь болсон. Өөрөөр хэлбэл, түлш хэрэглэдэг автобуснаас татгалзах цаг ирсэн.

Шүүлтүүр тавихад 2.7 тэрбум төгрөг шаардлагатай. Сонгон шалгаруулалтыг Үнэлгээний хороо буюу Зам тээврийн яам, Нийтийн тээврийн газар, Байгаль орчин, аялал жуулчлалын яам зэрэг байгууллагаас томилогдсон ажлын хэсэг ажиллана.

-Нийт 540 цэгийн хэд нь сайжруулсан түлш худалдаж байна вэ?

-Одоогийн байдлаар 20 орчим цэгт борлуулж байна. Сайжруулсан түлшийг нэг цэг дээр хэт их нөөцлөхгүй, тухайн хорооны оршин суугчдын тоогоор жигд тараалт хийнэ.

-Тогтоол хэрэгжихээс өмнө түүхий нүүрс худалдаж авсан айлуудын нүүрсээ яах вэ гэдэг асуудал гарч ирж байх шиг байна. Ийм тохиолдолд яах вэ?

-Нэгэнт худалдаж авчихсан байсан нүүрсийг сайжруулсан түлшээр солих төлөвлөгөө тавин ажиллаж байна. Их нүсэр ажил. 220 мянган өрхөд шаардлагатай сайжруулсан түлш үйлдвэрлэж, тээвэрлээд борлуулалтын систем бий болгоно гэдэг бол том ажил. Тиймээс иргэд ойлгож, хүчээ нэгтгэж байж энэ ажлын ард гарна. Ингэснээр бид эрүүл аюулгүй орчинд амьдрах боломжтой болно. Хамтдаа тулгамдаж байгаа асуудлыг шат дараатай шийдэх ажил хийж байна.

Р.Хишигжаргал