УИХ-ын гишүүн Ж.Батзандангаас зарим асуудлын талаар тодрууллаа.
-С.Зоригийн амь насыг хөнөөсөн хэргийг шийдвэрлэсэн асуудлаар Олон улсын парламентын холбооны удирдах зөвлөлөөс ирүүлсэн шийдвэрийг судалж, холбогдох санал, дүгнэлт боловсруулах үүрэг бүхий Түр хороог байгуулсан цагаас хойш ямар ажил хийсэн бэ?
-Олон улсын парламентын холбооноос тавьсан хоёр хүсэлтийг хангуулах чиглэлд ажиллаж байна. Түр хорооны дүгнэлтийг гаргахын тулд өмгөөлөгч болон холбогдогч этгээдүүдтэй уулзах ажлыг байгуулагдсанаасаа хойш хоёр долоо хоногийн хугацаанд хийж амжууллаа. Хэргийн оролцогчын өмгөөлөгч бидэнд нэг тодорхой зүйл хэлж байгаа “Энэ хэргийн мөрдөн шалгах шүүн таслах явцад шүүх хуралдаанд өмгөөллийн эрхийг хэрэгжүүлэх боломжоор бүрэн хангаж өгөөгүй” гэдэг гомдлыг хэлсэн. Хохирогчийн хууль ёсны төлөөлөгч, хууль ёсны төлөөлөгчийн өмгөөлөгчид бидэнд гурван шатны шүүхийн шийдвэр үндэслэлгүй гэдгийг албан ёсоор мэдэгдсэн. Хөтөлбөргүй нотлох баримтаар энэ хэргийг нотолж чадаагүй гэж хохирогчийн хууль ёсны төлөөлөгч бидэнд мэдэгдсэн. Эрүүдэн шүүх үйл ажиллагаа үнэхээр аймшигтай болсон гэдгийг мэдэж байгаа байх. Ингээд олон талаас нь дүгнэлтээ гаргахын тулд судалгаагаа хийж байна.
Уулзах шаардлагатай холбогдогч этгээдүүдтэй цаг алдалгүй бүгдэнтэй нь уулзаж байна. Олон улсын парламентын холбооны санал дүгнэлтийг судалж байна. Прокурор болон холбогдогч шүүхийн шийдвэр гүйцэтгэгч байгууллага гээд олон байгууллагын удирдлагуудтай уулзаж зарим материалыг хүртэл албан ёсны нууцаас гаргаж иргэд, олон түмэнд удахгүй хүргэхээр ажиллаж байна.
-Тагнуул, цагдаагийн алба хаагчид шалгагдаж байгаа. Бүгдээрээ тушаалаар ажилладаг, үүрэг хүлээдэг хүмүүс. Тушаал өгсөн болон гүйцэтгэсэн гээд асуудал үүсэх байх даа?
-Тушаалаар ажилласан хүмүүс Монгол Улсын хуулийг зөрчиж болно гэсэн заалт байхгүй. Алба хаагч тушаал өгч байгаа эрх мэдэлтэн ч Монгол Улсын хүрээнд ажиллах үүрэгтэй. Хууль бус тушаалыг биелүүлэхгүй байх нь албан тушаалтан иргэн бүрт нээлттэй.
-Д.Содномдаржаа, Т.Чимгээ нар одоо ямар байдалтай байгаа вэ. Эмнэлэгт байгаа юу эсвэл хорих ангид байгаа юу?
-Одоогоор Д.Содномдаржаа, Т.Чимгээ хоёр хоригдож байна. Эмнэлэгт хэвтэж байна гэсэн мэдээллийг бид өмнө нь авсан. Д.Содномдаржаа, Т.Чимгээ нарт шинээр илэрсэн нөхцөл байдлыг үндэслэж хяналтын шүүхэд прокурорын эсэргүүцэл бичиж суллуулах, хэргийг задлаж мөрдөн байцаалтад буцаах үндэслэл хангалттай бүрдсэн. Нотлох баримтыг хуурамчаар бүрдүүлсэн гэрч шинжээчийн мэдүүлэг хуурамч болохыг тогтоосон бол үүнийг шинээр илэрсэн нөхцөл байдал гэж үзэж прокурор хяналтын шатны шүүхэд эсэргүүцэл бичих бололцоо байгаа юм. Тиймээс энэ асуудлаар прокурорт бид хандсан.
Прокурорын байгууллагаас судалж байна гэдгээ бидэнд илэрхийлсэн. Шинээр илэрсэн нөхцөл байдаг гэж хуульд дөрвөн зүйл байдаг. Энэ дөрвөн зүйлийн гурав нь хангагдсан байна гэж харж байна. Тэгэхээр энэ хэргийг задалж мөрдөн байцаалтад буцаах зайлшгүй шаарлагатай төдийгүй Д.Содномдаржаа, Т.Чимгээ нарыг цагаатгах ажлыг нэн даруй хийх шаарлагатай байна.
-Шүүгч нарыг чөлөөлөх хэрэгтэй гэж та өмнө ярьж байсан. Ингэж үзэх шалтгаан нь юу юм бэ?
-Ерөнхийлөгч болон ҮАБЗ-ийн нарийн бичгийн дарга А.Гансүхэд энэ асуудлыг тавьсан. Дээд шүүхийн эрүүгийн танхимын зургаан шүүгчийн тав нь энэ хэрэгт оролцож шийдсэн. Оролцсон таван шүүгчийн гурав нь шийтгэх талд шийдвэр гаргасан. Харин хоёр нь эсрэг талд шийдвэр гаргасан гэсэн мэдээлэл бидэнд байна. Тиймээс буруу шийдвэр гаргасан шүүгч нарыг чөлөөлөх, хариуцлага татах асуудлыг ҮАБЗ-д тавьсан.
-Өнгөрсөн долоо хоногт түр хорооны гишүүд хууль шүүхийн удирдлагуудтай уулзана гэсэн. Энэ ажил юу болсон бэ?
-Хууль хяналтын байгууллалагын удирдлагуудтай бид удаа дараа уулзаж байгаа юм. Улсын ерөнхий прокурорын орлогч М.Чинбаттай бараг долоо хоног бүр уулзаж байна. Шүүхийн шийдвэр гүйцэтгэх байгууллагын даргатай тогтмол харилцаатай хамтарч ажиллаж байна.
Өнөөдөр /өчигдөр/ Улсын ерөнхий прокурорын архивт түр хорооны гишүүд, өмгөөлөгч нар очиж ажил хэргийн материалтай танилцана. Ажил явж байна. Тун удахгүй түр хорооны дүгнэлт гарах ёстой. Гэхдээ ул суурьтай судалж байж түр хорооны долоон гишүүн нэгдсэн саналтай шийдвэрээ гаргана гэсэн байр суурьтай байна.
Р.Хишигжаргал
Сэтгэгдэл (26)