УИХ-ын Эдийн засгийн байнгын хорооны өнөөдрийн хуралдаанаар “Оюутолгой” ордыг ашиглах хөрөнгө оруулалтын гэрээний хэрэгжилтийг шалгаж, санал, дүгнэлт гаргах үүрэг бүхий УИХ-ын ажлын хэсгийн тайланг сонслоо.

Ажлын хэсгээс гарсан дүгнэлтийг УИХ-ын гишүүн Д.Тэрбишдагва танилцуулсан юм.

Тэрбээр “Аливаа бизнес түүний дотор хамтарсан гэрээ нь харилцан ашигтайгаар хийдэг. Гэтэл “Оюутолгой”-н гэрээний хэрэгжилтийн хувьд энэ зарчим алдагдсан. Тодруулбал, өмчийн эзэн болох Монголын талд ашиг багатай. Харин хөрөнгө оруулагчийн талд үр өгөөжтэй байгаа нь анхаарах гол асуудлын нэг болж байна. Хөрөнгө оруулалтын гэрээг байгуулахад үндэслэсэн эрхзүйн баримт бичгийн нэг нь 2009 оны 57дугаар тогтоол.

Гэрээний 1.6-д төр нь хөрөнгө оруулагчийн энгийн хувьцааг 34 хувийг өмчлөх ба энэхүү гэрээний хугацааг 15.1-т заасны дагуу сунгах бол сунгаснаас хойш нэг жилийн дотор хувь нийлүүлэгчийн гэрээг харилцан тохиролцсон нөхцөлөөр хөрөнгө оруулагчийн энгийн хувьцааг 16 хувийг нэмж өмчлөх сунгалт хийх хэрэгтэй гэсэн байна.

Энэ нь Монголын талаас эзэмших хувийг 50 хувиас доошгүй болно гэсэн олон түмний хүлээлтийг хэрэгжүүлэх боломжгүй болгожээ.

Гэтэл төслийн хэрэгжилтийн явц 2015 оны техник, эдийн засгийн үзүүлэлт, далд уурхайн санхүүжилтийн төлөвлөгөөгөөр Дубайн төлөвлөгөө төслийн хөрөнгө оруулалтын зардлын өсөлтөөс өөрийн эзэмшлийн хувь хэмжээг хэдэн хувьд хүргэж нэмэгдүүлэх нь ач холбогдолгүй байна. Мөн төслийн техник, эдийн засгийн үзүүлэлт батлагдаагүй байхад хөрөнгө оруулалтын гэрээнд гарын үсэг зурсан нь буруу болсон. 2015 онд хийсэн гэрээгээр “Рио Тинто” үр ашигт нэмэлт өөрчлөлт оруулж, дахин тодотгосон хувь нийлүүлэгчдийн гэрээгээр тохирсон менежментийн төсвөөс тусад нь нэхэмжлэл авч байгаа нь Монголын талын хүртэх өгөөжид сөргөөр нөлөөлж байна” гэв.

Р.Хишигжаргал