Төрийн ордон бол онцгой обьект. Хэн гарч, орж байгааг нь бүртгэж бүр хаашаа орсныг нь гарын үсэг зуруулж цаг нартай нь баталгаажуулдаг газар. Тодорхой шаардлага хангаж орсон нэгэн тийш орлоо гэхэд өмссөн хувцаснаасаа эхлээд тэндэхийн хамгаалагч бүрийн шаардлагыг биелүүлнэ. Үгүй бол ҮГҮЙ, гарна. Орсон, оруулсан тохиолдолд шууд арга хэмжээ авна. “Та шаардлагад нийцсэн хувцсаа өмс” гэнэ. Төрийн ордон руу нэвтэрч ороход хамгийн энгийн шат дамжлага нь энэ байв. Байв гэснээс байлаа. Байлаа гэдэг нь УИХ-ын гишүүд нэлээд дэггүй аашилсан бололтой.

Энэ тухай УИХ-ын дарга Г.Занданшатар ажлын байр дээр архи уусан төрийн албан хаагч нартаа хариуцлага тооцохоо зарлажээ.

Төрийн албан хаагч гэдгээр бус гишүүдийг хэлсэн нь илүү анхаарал татлаа. Мөн энэхүү шийдвэрийн биелэлтийн хүрээнд Төрийн ордонд архи уусан гишүүдийг нэрсийг тодорхой болгох үүргийг УИХ-ын Тамгын газарт өгчээ. Бүр тэдгээр гишүүний нэрийг удахгүй зарлана гэдгээ илэрхийлэв.

Үүгээр, ер нь төрийн жирийн албан хаагчид ажлаас халагдах үндэслэл болчихдог архидан согтуурах явдал дээрээсээ явах нь. Хөлчүүрхэх явдлыг Төрийн ордноосоо эхэлж, таслан зогсоож гишүүдийнхээ нэр төрд халдах, тэдний гаргасан “халамцуу хууль” олон нийтийн дэмжлэг авалгүй халтирч унадаг шалтгаан нь энэ ч байж болох.

“Архи уусан асуудалд холбогдсон гишүүд УИХ-ын даргын өрөөгөөр эргэлдэн "Намын нэр хүнд 2020 оны сонгууль"-аар айлгах, аргадахаар үзэж байгаа гэнэ дээ. Сахилга хариуцлагыг дороосоо биш дээрээсээ тооцож олон нийтэд үлгэр жишээ үзүүлэх нь нэг ч гэсэн алхам юм. Дэмжинэ шүү” гэжээ. Нэр дэвших эрхээ намын биш хууль тогтоох дээд байгууллагын спикерээс гишүүд хүсэмжлэх болсон нь өөрөө асуудал. Нэр дэвших, дэвшүүлэх эрхийг намын даргын үзэмж, Бага хурлынх нь шийдвэрээр сонгодог болохоор тэр.

Гагцхүү Г.Занданшатар Таны энэ байр суурь хэзээ биеллээ олох вэ. Төрийн тусгай хамгаалалттай онцгой обьектэд ажилладаг төрийн албан хаагчид архидан согтуурахыг хориглосон Засгийн газрын шийдвэр хэрэгждэггүй юм гэхэд хууль тогтоох дээд байгууллагын гишүүд нь ийм байдалтай байх нь зүйд нийцэх үү гэдгийг асуух цаг үлдлээ.

Эцэст нь хэлэхэд УИХ-ын дарга Г.Занданшатар Та Тамгын газартаа өгсөн үүрэг даалгаврын хүрээнд “хөлчүүрхэж” яваа гишүүддээ хариуцлага тооцно уу. Бүгдийнх нь нэрийг зарла.Тэглээ гээд лав буруудахгүй. Таниас нүүр буруулах нэгэн ч гарахгүй болов уу. Хамгийн гол нь хаа хаанаа хариуцлагатай, хууль дүрмээ баримтлах нь бидэнд, энэ парламентад чухал байна. Түүнээс биш хариуцлагын тухай хий хоосон цэцэрхэл бидэнд хэрэггүй ээ.

С.Сүлд