УИХ-ын гишүүн, АН-ын дарга С.Эрдэнэ цаг асуудлаар мэдээлэл хийлээ.

Тэрбээр “Өчигдөр АН-аас “Хариуцлага нэхэх сөрөг хүчний жагсаал”-ыг орон даяар зохион байгууллаа. Бид өнөөдрийн эрх баригч МАН-ын бодлогогүй алхам, дотоод зөрчил, авлигал хээл хахууль, хариуцлагагүй байдлаас болж Монгол Улсын нийгэм, эдийн засагт учирч буй хүндрэл, хүчирхийллийг эсэргүүцэж жагссан.

Нийслэлийн төв талбайд 30 мянган хүн, 10 гаруй аймгийн төвд нийтдээ 12 мянга гаруй иргэн жагслаа.

Гүйцэтгэх засаглалын түвшинд хариуцлагын асуудал үгүй болсноос үүдэж, төрийн албан хаагчид ажлын байран дээрээ амь насаараа хохирох, албан тушаалтны хариуцлагагүй байдлаас болж олноороо амь үрэгдэх, осолдох, хаагчид дэглэлтийн золиос болж амь нас, эрүүл мэндээрээ хохирох үзэгдэл сүүлийн үед байнга тохиолдох боллоо. Тухайлбал, цэвэрлэх байгууллагад ажил үүргээ гүйцэтгэж явсан залуус амь насаа алдсан. Гэтэл байр өгөхдөө баахан сурталчилгаа хийлээ.

Яаж байгаа юм бэ, үхсэнийх нь төлөө шагнал болгож байгаа юм уу.

Уг нь татвар төлөгчдийн мөнгө шүү дээ. Удаа дараа иргэдийн Үндсэн хуулиар олгогдсон "Амьд явах эрх"-энд халдсан ноцтой үйлдлүүд гарсаар атал Засгийн газар дорвитой арга хэмжээ авахгүй, зохих албан тушаалтнуудад хариуцлагыг нь үүрүүлэлгүй үл тоосон байдлаар хандсаар ирсэнд ард иргэд нийтээрээ бухимдаж байна. Үүнээс гадна 2016 онд Монгол Улсын нийт гадаад өр 24 тэрбум доллараар хэмжигдэж байсан бол 2018 оны эхний хагасын байдлаар буюу гуравхан жилийн дотор 5.5 тэрбум доллараар нэмэгдэж, 29.5 тэрбумд хүрлээ. Цаашид энэ тоо өдөр, сараар нэмэгдсээр 2021 он гэхэд Монгол Улс өрийн дарамтад орж, эдийн засагт “Улаан гэрэл” асах бодитой аюул нүүрлэсэн. Түүнчлэн дотоод эдийн засгийн нөхцөл байдал, зах зээлээ дутуу дулимаг тооцоолж , махны экспортын хэт задгай бодлого хэрэгжүүлсний улмаас зах зээлд махны үнэ түүхэнд байгаагүй өндөр хэмжээнд хүрч иргэдийн бухимдал дээд цэгтээ хүрлээ.

Зөвхөн мах гэлтгүй бензин шатахуун, өргөн хэрэглээний бараа бүтээгдэхүүний үнэ өдрөөс өдөрт нэмэгдсээр байхад Засгийн газар, салбарын сайд нь дорвитой арга хэмжээ авч чадалгүй өдийг хүрлээ.

Харамсалтай нь, салбарын сайдуудынхаа энэ мэт хариуцлагагүй үйлдлийг Засгийн газрын тэргүүн У.Хүрэлсүх өөгшүүлэх мэт өнөөдрийг хүртэл ямар нэгэн хариуцлагын асуудал яригдсангүй, тооцсонгүй. Сүржин амлалт өгсөн Ерөнхий сайд хаана байна вэ. Иймээс АН сөрөг хүчний хувиар эрх баригчдаас "Хариуцлага нэхэх сарын аян" зарласан" гэлээ.

Р.Хишигжаргал