Зургадугаар сарын 1-нээс буюу маргаашнаас олгож эхлэх хүүхдийн мөнгөн тэтгэмжийн талаар Хөдөлмөр, нийгмийн хамгааллын сайд С.Чинзориг мэдээлэл хийлээ.

Тэрбээр "Засгийн газраас 2018 оны тавдугаар сард нийт хүүхдийн 80 хувь буюу 912 мянган хүүхдэд Хүүхдийн мөнгө олгох шийдвэр гаргаж, 2019 оны төсөвт 218 тэрбум төгрөг баталсан. Харин Засгийн газар өнгөрсөн долоо хоногийн хуралдаанаар Хүүхдийн мөнгөний асуудлыг дахин хэлэлцсэн.

Хүсэлт гаргасан өрхийн хүүхэд бүрт мөнгийг зургадугаар сарын нэгнээс олгоно.

Одоогоор нэмэлт 12.3 тэрбум төгрөг шаардлагатай. Үүнийг Хөдөлмөр, нийгмийн хамгааллын сайдын багцад багтсан төсвөөс гаргах боломжтой. Ямар нэг хууль зөрчигдөхгүй. Одоогийн байдлаар нэмэлт 80 мянган хүүхэд хүүхдийн мөнгө авах хүсэлт гаргасан байна. Ингэснээр нийт хүүхдийнхээ 86 хувьд хүүхдийн мөнгө авахаар болж байна. Хэрэв хүсэлт гаргаж амжаагүй байгаа бол харьяа аймаг, дүүргийнхээ хөдөлмөр халамж үйлчилгээний байгууллагад хандах боломжтой" гэлээ.

Түүнчлэн "Нийт хүсэлт гаргасан өрхийн хүүхдэд мөнгө олго гэсэн шийд гарсан. Гэхдээ өрхийн амжиргааны суурь судалгааны 670 гэдэг оноог авч үзэх хэрэгтэй. Яагаад гэвэл, хүүхдийн мөнгөн олгоход нэмэлт эх үүсвэр шаардагдах магадлалтай" гэв.

Р.Хишиг