БНСУ-аас Монгол Улсад суугаа Элчин сайдаар ажиллаж байгаа Жон Жэ Намтай холбоотой мэдээлэл тус улсын SBS телевизээр өнгөрсөн сарын 28-нд гарч, түүнийг эрх мэдлээ ашиглан виз зуучилсан байж магадгүй гэж үзсэн юм. Мөн Элчин сайдын яамны ажилтнуудтайгаа зүй бусаар харьцаж, зохисгүй үйлдэл гаргасан тухай тус улсын Гадаад хэргийн яам аудитын шалгалт хийхээр болсон тухай мэдээлэл гарсан билээ.

Үүнтэй холбогдуулж Элчин сайдын яамнаас мэдэгдэл гаргажээ. Мэдэгдэлд ”Сүүлийн өдрүүдэд Монголын хэвлэл мэдээллээр манай Элчин сайдын яамтай холбоотой “БНСУ-ын Элчин сайдыг хахуулийн хэрэгт буруутгав”, “БНСУ-ын Элчин сайд төсвөө хувийн зориулалтаар ашигладаг байжээ” (Үндэсний шуудан, Монголын үнэн), “Монгол дахь БНСУ-ын Элчин сайдын яамыг шалгаж байна” (Монголын мэдээ) гэх гарчигтай мэдээ нийтлэгдсэн байна. Дээрх мэдээ нь Солонгост гарсан мэдээг эш татаж гаргасан байна. Гэвч Солонгосын хэвлэл мэдээллийн байгууллагууд нэг талыг баримталсан, бодит байдлаас зөрүүтэй, шалгаж судлаагүй мэдээ гаргасан учир Элчин сайд Жон Жэ Нам тэр даруй БНСУ-ын Засгийн газарт өөрөө хүсэлт гаргаж, удахгүй албан ёсны шалгалт хийх гэж байгаа бөгөөд үүгээр үнэн мөнийг тогтоох болно.

Элчин сайд Жон Жэ Нам Солонгосын хэвлэл мэдээллийн байгууллагуудын асуултад тайлбар өгсний дагуу Солонгосын хэвлэл мэдээллээр цаашид үүнтэй холбоотой зөвхөн нэг талыг баримталсан мэдээлэл гаргахаа ихэнх нь зогсоосон байгаа юм. Иймд албан ёсны шалгалтын үр дүн гартал Монголын хэвлэл мэдээллийн байгууллагууд ч мөн тус Элчин сайдын яам болон Элчин сайдад сөргөөр нөлөөлж болохуйц нэг талыг баримталсан мэдээг гаргахгүй байхыг хүсч байна. Одоогийн байдлаар албан ёсны шалгалт хийгээгүй байгаа учир дараа зохих цагт олон нийтэд дэлгэх тухай судалж байна" гэжээ.

С.Сүлд