“Монголын үрс маш олон болтугай”. Энэ бол эртнээс тогтсон уламжлал гэхээсээ энэ цаг үеийн эрх баригчдын дэвшүүлсэн уриа. Үеийн үед явж ирсэн энэ “УРИА” ээж болгон, эцэг болсон хүн бүрт чиглэдэг нь сонин, сонгогчдод. Ийм нэгэн эргэцүүлэл, эргэлзээ дунд өнгөрсөн амралтын өдрүүдэд болж өнгөрсөн үйл явдлыг дүгнэв. Ерөнхийлөгч Х.Баттулгын зарлигаар Эхийн алдар буюу олны хэлж заншсанаар “Алдарт эх”-ийн I болон II одонг 9465 ээж хүртэж байна. Браво!!!. Монголын үрс өсч байна, тэдгээрийг хүмүүжүүлж, сайн сайханд хөтлөх нь дамжиггүй. Гэхдээ “Хүүхэд өсгөж хүмүүжүүлнэ гэдэг бол асар том хөдөлмөр юм. Хүүхдээ өсгөж байгаа эхчүүдийг “гэртээ ажилгүй” суудаг гэж ярих бол буруу! Энэ бол цаг наргүй, хариуцлага, сэтгэл шаардсан нүсэр, амаргүй ажил. Тийм учраас төр Монгол Улсын иргэнийг эрүүл саруул, зөв сэтгэл, зөв ёс зүйтэй болгон өсгөж, хүмүүжүүлж байгаа эхчүүдийн хөдөлмөрийг дэлхий нийтийн жишигт хүргэн үнэлэх ёстой гэж би боддог” хэмээн Ерөнхийлөгч Х.Баттулга ярьжээ.

Ортой, ханатай л үг. Тухайн өдөр бид эмэгтэйчүүд, хүүхдийн эрхийг хангаж “ажилладаг” мөртлөө бусад үед хэрхдэг вэ. Эрхийг нь хамгаалж, энгэртээ тэвэрдэг үү, хүүхдээ. Ямар ч байсан төрийн эрх барих дээд байгууллагын төвшинд хэн юу ярьсныг эргэн сануулж байна.

Ерөнхийлөгч Х.Баттулга: Монголын төр үеийн үед улс орныхоо хөгжил дэвшлийн үндэс болсон хүн амаа өсгөх бодлогыг тууштай баримталж, хүүхэд эхчүүдийг анхаарлынхаа төвд байлгах учиртай. Хүүхэд бол үндэстний ирээдүй, улсын баялаг, айл гэрийн баяр баясгалан, эрхэм дээд эрдэнэ билээ.

Ерөнхий сайд У.Хүрэлсүх: Сүүлийн жилүүдэд хүүхдийн хүчирхийлэлтэй холбоотой зүйл их гарч, бяцхан хүүхдүүдийн маань эрх зөрчигдөж, алтан амиа алдаж байна. Энэ бүхэнд бидний сэтгэл санаа маш их зовж байна. Хүүхэддээ хамгийн их санаа тавих ёстой хүмүүс бол эцэг эхчүүд, тэр дундаа эрчүүд гэдгийг хэлмээр байна. Тиймээс энэ өдөр хүрэлцэн ирсэн аав нартаа чин сэтгэлээсээ баярлаж байна гэв.

Нийслэлийн Засаг дарга С.Амарсайхан: Бид  хүүхэд багачуудын эрүүл аюулгүй өсөж сурч боловсрох орчин нөхцөлийг сайжруулахын төлөө ТББ-ууд болон эцэг эх, багш сурган хүмүүжүүлэгчидтэй хамтран ажиллаж байна. Жишээ,  2019 онд улс нийслэлийн хөрөнгө оруулалт болон гадаадын зээл тусламжаар цэцэрлэг барилга байгууламжийг ашиглалтад оруулахаар ажиллаж байна.

Ер нь бид хүүхдийнхээ төлөө юу хийв.

Сүүлийн төдийгүй өнгөрсөн өдрүүдэд гарсан энэ олон харгислал, хүний санаанд багтамгүй жихүүдэс төрүүлэм үйл явдлаас сэргийлж чадсан уу. Хясаа хүртэл Сувдаа нуудаг хорвоо...

Г.Ханд