АН-ын Шинэчлэлийн хорооны залуучуудын зүгээс намын дарга С.Эрдэнийг огцруулах үндэслэл бүхий 15 шаардлагыг гаргаж тавиад байгаа. Үүнтэй холбогдуулж АН-ын дарга С.Эрдэнэ тэдгээр гишүүдээ өөрийг нь гүтгэсэ гэх үндэслэлээр цагдаад гомдол гаргажээ. Энэ асуудлаар АН-ын Шинэчлэлийн хорооны гишүүн П.Галиндэвтэй ярилцлаа.

-АН-ын дарга С.Эрдэнийн хувьд Та бүгдийг ямар үндэслэлээр цагдаад өгсөн юм бэ?

-Сүүлийн гурван сарын хугацаанд АН-ын залуучуудын зүгээс нам доторх болохгүй бүтэхгүй байгаа асуудлыг шүүмжилж ирсэн. С.Эрдэнэ, Д.Эрдэнэбат тэргүүтэй хүмүүс АН-ыг МАНАН бүлэглэлийн гар хөл болголоо. Намаа УИХ-д Бүлэггүй болголоо зэрэг олон үндэслэлээр С.Эрдэнийг огцор гэж тэмцсэн. Залуучууд үгээ хэлж, үзэл бодлоо илэрхийлэх нь хуулиар олгосон бүрэн эрх биз дээ. Ялангуяа АН-ын гишүүд үгээ хэлэх эрхтэй. Гэтэл үнэн бодит зүйлийг нь ярьж, илчлээд ирэхээр намаас хөөж байна. Эсвэл хууль, шүүх, цагдаад өгдөг боллоо. Энэ хүрээнд манай намын дарга С.Эрдэнэ залуучуудаа цагдаад өгсөн байна. Бидний зүгээс С.Эрдэнийг огцруулах 15 үндэслэл тавьсан. Тэдгээрт нь маш олон асуудал бий. Капитал банкны асуудлаас эхлээд намын дүрмийг зассан, нэр хүндийг унагаасан зэрэг. Хариуд нь цагдаад өгч байна. Өөрийг нь гүтгэсэн гэх үндэслэлээр. Бидний хувьд С.Эрдэнийг гүтгээгүй. Маш бодитой зүйлийг гаргаж тавьсан. АН-ын нэр хүнд унасан нь бодит зүйл. С.Эрдэнийн хулгай дээрмийн асуудал өнөөдрийг хүртэл ярьж байна.

Найрамдал зуслангийн газрыг сайд байхдаа бусдад давуу тал олгох байдлаар хамаатан садандаа олгосон асуудал ярьж байгаа. Асуудал нь сөхөгдөөд ирэхээр надад хамаагүй гэж байна. АН-ын байр байгаа газар нь Хүүхдийн паркийн газраас хумсалсан. Түүндээ АН-ыг оруулчихаад намын байр гээд байгаа юм. АН-ын байр ч биш, С.Эрдэнийн байр шүү дээ. Эдгээр асуудлаар цагдаад тодруулга өглөө. Ирэх даваа гарагт дуудна гэж байна.

-Огцруулах 15 асуудлыг гаргаж тавьсан. Намын дарга С.Эрдэнэтэй энэ асуудлаар ярилцаж үзсэн үү?

-Намын даргатай учраа олох асуудал байхгүй. С.Эрдэнэ огцорч байж энэ асуудал цэгцрэнэ. С.Эрдэнийг намын дарга болсноос хойш олон мянган гишүүний итгэл үнэмшлийн эсрэг зүйлийг хийж байна. Гаргаж байгаа улс төрийн шийдвэр нь улс оронд хохиролтой байх жишээтэй. Уг нь сөрөг хүчний зүгээс асуудалд шүүмжлэлтэй хандаж нэр хүнд нь өсөөд явж байх ёстой байтал долоон хувьд хүртлээ уначихлаа. Намын гишүүд нь С.Эрдэнээс залхсан даа гарч байна. Энэ байдлаараа 2020 оны сонгуульд АН ялагдана. Цаашлаад улс төрийн тавцангаас арчигдах нь. С.Эрдэнийн цаад хүсэл нь тэр юм шиг байна лээ. Өөрөө УИХ-д үлдэж, хулгай дээрэм, бүрэн эрхээ хамгаалах гэж улайрч байна.

-Та бүгдийн тэмцлийг намын гишүүд хэрхэн хүлээж авч байгаа вэ?

-Намын гишүүдтэйгээ өргөн хүрээг хамарч ажиллаж байгаа. АН-д хийх гэж байгаа шинэчлэлийг дэмжиж, нэгдэж байна. Одоо С.Эрдэнийг яаж огцруулах вэ гэдэг асуудлаар ярилцаж байна.

-АН-ын дүрэмд зааснаар намын даргыг яаж огцруулах юм?

-С.Эрдэнэ гэдэг хүн намын дүрмийг засчихсан гэж ярьдаг. Ингэхдээ намын даргыг огцруулах заалтыг нь хассан. Гэхдээ Улс төрийн намын тухай хуулиар намын бүрэн эрх Их хуралд байдаг. Бидний зүгээс Их хурлаа зохион байгуулж, дүрмээ өөрчлөе гэж байгаа юм. С.Эрдэнийг огцруулж, шинэ даргаа сонгоно. С.Эрдэнэ гэдэг хүн хөдлөхгүй, Их хурлыг зарлахгүй байвал гишүүд нь нэгдэж зохион байгуулна.

-Нөхөн сонгуулийг хойшлуулсан нь С.Эрдэнэтэй холбоотой гэсэн яриа гараад байгаа. Энэ хэр бодитой яриа вэ?

-С.Эрдэнэ гэдэг хүн нам удирдсанаас хойш аймаг, дүүргийн ИТХ-ын 62 тойрогт нөхөн сонгууль явсан. Үүнээс 52-т нь АН ялагдсан. Энэ бол бодит нэг факт. Бидний хувьд нөхөн сонгуульд төдийлөн анхаарал харьцуулаагүй. АН өөрөө ес байсан суудлаа гишүүдээ хөөгөөд долоо болгосон. Эрх баригч нам үүрэг хариуцлагаа үүрээд явж байгаа болох сонгуулиар дүнгээ тавиулна. Тэр асуудалд оролцох шаардлагагүй.

-С.Эрдэнийг огцруулсан тохиолдолд дараагийн дарга нь хэн байх юм?

-Үүнийг хэлэхэд хэцүү. Гишүүдийнхээ бодол санааг сонсдог, улс орны эрх ашигт нийцсэн шийдвэр гаргадаг боловсон хүчин АН-д олон бий. Тийм хүмүүсээ зөв шүүлтүүрээр шүүж гаргаж ирэх ёстой.

С.Сүлд