Эрүүл мэндийн Дэд сайд асан Ж.Амарсанаа Эрүүл мэндийн сайд Д.Сарангэрэлийг огцрохыг шаардсан хоёр дахь жагсаалаа өнөөдөр хийж байна. Үүнтэй холбогдуулан Эрүүл мэндийн сайд Сарангэрэлийг энэ сарын 6-ны өдөр "ТВ4" телевизийн шууд эцирээр халз мэтгэлцээнд дуудаж байгаагаа хэллээ.

Тэрбээр “Өнгөрсөн удаагийн жагсаалын үр дүн гараагүй учраас бид үргэлжлүүлэн жагсаалаа зохион байгуулж байна. Өнөөдөр эрүүл мэндийн салбар маш олон үзүүлэлтээр уруудаж байна.  Эхний асуудал нь ч намжаагүй байхад төрөх эмнэлэгт эхийн эндэгдэл гарлаа. Энэ нь тус салбарын дотоод зохион байгуулалт, үйл ажиллагаа суларсныг харуулж байна. 

Сүрьеэгийн дэгдэлт ихэссэн нь сайд огцрох шалтгааны нэг мөн.

Хамгийн гол шалтгаан нь Засгийн газрын мөрийн хөтөлбөрт эрүүл мэндийн чиглэлээр авч хэрэгжүүлэх 22 үйл ажиллагаа байдгаас 17 үйл ажиллагаа нь хангалтгүй дүн авсан явдал. Энэ нь эрүүл мэндийн сайд огцрох хангалттай шалтгаан.

Д.Сарангэрэл сайд хариуцлагын асуудал яригдахаар бусдыг гүтгэдэг. Тиймээс гүтгэсэнтэй нь холбоотойгоор ард иргэдэд тэнцвэртэй мэдээлэл хүргэх үүднээс маргааш телевизийн халз мэтгэлцээнд урьж байна. Одоо урилга гардуулна. Хүлээж авах эсэхийг мэдэхгүй” гэв.

Г.Эрдэнэ