УИХ-ын Төрийн байгуулалтын байнгын хорооны хуралдаанаар Үндсэн хуулийн цэцийн гишүүнд Засгийн газрын Хэрэг эрхлэх газрын Тэргүүн дэд даргаар ажиллаж байгаа Г.Баясгаланг нэр дэвшүүлж, томилох эсэх асуудлыг хэлэлцэж гишүүдийн олонхийн саналаар дэмжлээ. Сонирхолтой нь, энэ үеэр Үндсэн хуульд нэмэлт, өөрчлөлт хуулийн төслийн хүрээнд Цэцийн гишүүнийг зургаа биш есөн жилийн хугацаатай томилох санал оруулж ирснийг Байнгын хорооны дарга Д.Лүндээжанцан хэлсэн юм.

М.Энхболд: УИХ-ы Тамгын газраас тодруулмаар байна. Үндсэн хуулийн цэцийн гишүүний бүрэн эрхийн хугацаа дуусгавар болсон талаар албан бичиг нь ийм хурдан ирдэг байсан уу. Ямар байсан юм бэ. Тэрийг тодруулж өгөөч ээ. Өмнө нь ийм бичиг ирж байсан уу.

Тамгын газар: Цэцийн гишүүн Ганзоригийн бүрэн эрхийн хугацаа дөрөвдүгээр сард дууссан. Бүрэн эрхийн хугацаа нь дууссан тухай албан бичиг Тамгын газарт ирж байсан. УИХ-ын хурлаас нэр дэвшүүлж томилох санал байгаа учраас эхлээд Төрийн байгуулалтын байнгын хороонд хүргүүлдэг. Тэр дагуу Хууль зүйн байнгын хороо хуралдаж Цэцийн гишүүнд нэр дэвшүүлж томилдог хуультай.

Д.Лүндээжанцан: Д.Одбаяр даргаас бичиг нь ирсэн юм байна тийм үү. Харамсалтай нь, дараагийн гишүүн томилогдтол тухайн хүн үргэлжлүүлэн ажилладаг, тэр нь зургаан сараас жил хүртэл ажилладаг юм билээ. Уг нь хугацаа хугацаанд нь шийдэх ёстой шүү. Би олон жилийн өмнөх юм ярьж байна шүү. Харин өнөөдөр хугацаандаа орж ирдэг болсон байна. Үндсэн хуулийн нэмэлт, өөрчлөлтийн нэмэлт өөрчлөлтөөр Цэцийн гишүүнийг улс төрөөс хязгаарласан. Есөн жилийн хугацаатай томилох санал явж байгаа. гэлээ.

С.Сүлд