УИХ-ын гишүүн О.Баасанхүү УИХ дахь АН-ын зөвлөлд элслээ. Өөрөө гаргаж, хүргүүлсэн хүсэлтийг нь Зөвлөлийн дарга Д.Эрдэнэбат гишүүн ёсоор болгосон нь энэ. Ингэснээр УИХ-д бүлэггүй хоцорч Зөвлөлийн статустай болсон АН О.Баасанхүү гишүүнээр “хүч сэлбэв”. Одоо УИХ-ын дарга Г.Занданшатар О.Баасанхүү гишүүнийг зөвшөөрсөн Д.Эрдэнэбатын албан бичгийг чуулганы нэгдсэн хуралдаанд танилцуулснаар тэрбээр АН-ын зөвлөлд албан ёсоор харьяалагдах юм. Энэ тухайгаа О.Баасанхүү гишүүн “Үнэндээ хүчтэй сөрөг хүчин үгүйлэгдэж буй энэ үед улс орныхоо эрх ашгийн төлөө хамтран ажиллахаар шийдэв. Эхний ээлжид ипотекийн зээлийн хүүг буулгах талаар зөвлөлд санал оруулах болно” хэмээн бичжээ. Ингэснээр УИХ-д Зөвлөлийн статустай болсон АН эргээд Бүлэгтэй болно гэсэн үг биш. Ж.Батзандан, Л.Болд нар эргэж намдаа ирдэггүй юм бол суудлын тоо нь 10 болсон ч Бүлгийн статусаа сэргээх хуулийн боломж тэдэнд байхгүй хэрэг.

Сонирхолтой нь, О.Баасанхүү гишүүний саналыг АН-ын зөвлөлөөс хүлээж авахтай зэрэгцэн намаасаа хэдийнэ өрх тусгаарласан Ж.Батзандан, Л.Болд нар ШИНЭ намаа албан ёсоор бүртгүүлэхээр Дээд шүүхэд хандсан юм.

Цаг хугацааны давхцал нь яагаад ингэж таарсныг хэлж мэдэхгүй ч цагтаа парламентад Бүлэгтэй явсан АН МАХН-аас сонгогдсон, тэгээд хөөгдсөн О.Баасанхүү Зөвлөлдөө багтаасан нь С.Эрдэнэ даргатай тус намыг хэтэрхий жижигхэн харагдууллаа.

Учир нь, АН-ын дарга С.Эрдэнэ, гишүүн О.Баасанхүү нар өөр хоорондоо сонирхлын зөрчилтэй явж ирсэн эрхмүүд. Үүнийгээ УИХ-ын нэгдсэн чуулган болон Байнгын хорооны хуралдааны үеэр ил тод илэрхийлдэг. “Ардчилсан нам ард түмний дуу хоолой хүсэл шаардлагын дагуу жагсаал зохион байгуулж байгаа.О.Баасанхүү чи энд тэнд оч. Хэнтэй асуудал ярихаа таниар заалгахгүй. Микрофон ашиглаад хүн доромжилж байдгаа боль. МАХН-ыг эрх баригч намтай нийлж өөрөө л бужигнуулсан юм билээ. О.Баасанхүү чи дуугүй байгаарай, наад мэдрэлээ Шар хаданд очиж үзүүл” хэмээх С.Эрдэнийн бухимдал үүний бэлээхэн жишээ. Харин өнөөдөр АН-ын дарга С.Эрдэнэ нэгэн цагт харшилтай явсан О.Баасанхүү гишүүнээс барьсан хадгийг тосоод авсан нь хачирхалтай биш гэж үү.

Магадгүй улс төрд, УИХ-д хүчгүй болсон намдаа хаа байсан МАХН-ын шошготой хүнийг авчирч “элсүүлж” байгаа нь С.Эрдэнийн улс төрийн замнал хэдийнэ хумигдаж эхэлснийг өгүүлэх мэт. Тийм биш байлаа ч О.Баасанхүүг Зөвлөлдөө багтаасан Д.Эрдэнэбат гэхээсээ С.Эрдэнэ даргын шийдвэрийг намынх нь гишүүд хэрхэн хүлээж авч буй нь сонирхолтой бөгөөд эргэлзээтэй. Ёстой л лам олдохгүй бол буцахдаа зална гэдэг нь ч энэ байж болох. 

Гагцхүү гишүүн О.Баасанхүү АН-ын зөвлөлөөс Ж.Батзандан, Л.Болд хоёр шиг нэг л өдөр хөөгдөж мэднэ. Намын үзэл баримтлал, гишүүдийнх нь сонголт гэхээсээ ганцхан С.Эрдэнэ гэсэн хүний диктатур АН-д тогтох болсоор удаж байна.Үүнийг цаг хугацаа л харуулна. Улс төрд мөнхийн дайсан, мөнхийн найз байхгүй. Гагцхүү мөнхийн эрх ашиг л гэж байдаг.

С.Сүлд