УИХ-ын гишүүн М.Оюунчимэгээс зарим асуудлын талаар тодрууллаа.

-УИХ-ын нэгдсэн чуулганаар Үндсэн хуульд оруулах нэмэлт өөрчлөлтийг  хэлэлцэх гэж байна. Энэхүү хуулийн төслийг хэлэлцэж эхэлбэл 45 хоног хугацаанд өөр асуудлыг хэлэлцэхийг хуулиар хориглодог. Иймээс Оюутолгойд хийсэн ажлын хэсгийн дүгнэлт орхигдоно гэж ойлгож болох уу?

-Өнгөрсөн баасан гарагт УИХ-ын даргын дэргэдэх зөвлөл хуралдсан. Энэ хуралд байнгын хорооны дарга нар ордог. Энд Үндсэн хуульд нэмэлт өөрчлөлт оруулах хуулийн төслийг хэлэлцэж эхэлбэл бусад хуулийн төсөл, асуудлуудыг хэлэлцэхгүй зогсоодог. Тиймээс энэ долоо хоногт нийгэм, эдийн засагтай холбоотой чухал хуулийн төслүүдийн ажлын хэсгийг хуралдуулж, холбогдох байнгын хороод дүнгээ танилцуулах хэрэгтэй байна гэж ярьсан. Гэвч байнгын хороо долоо хоногт нэг удаа хуралддаг. Иймээс байнгын хороогоор хэлэлцэгдээгүй үлдсэн асуудлуудыг намрын чуулганаар хэлэлцэхээр болж байна. Үүнд таны хөндсөн Оюутолгойн ажлын хэсгийн дүгнэлт орж байгаа юм. Үүнийг даргын дэргэдэх ажлын хэсгээс үүнийг ярьж байсан. Ажлын хэсгийг өөр хүнээр удирдуулах, дахин ажлын хэсэг хэрэгтэй гэж ярьсан. Тиймээс Эдийн засгийн байнгын хорооны өчигдрийн /уржигдрын/ хуралдаанаар ажлын хэсгийг байгуулсан. Ингээд хурлаар өмнө нь байгуулагдсан ажлын хэсгийн нааштай зүйлүүдийг үргэлжлүүлж, алдаатай буюу зайлшгүй засах асуудлуудад ажлын хэсэг анхаарч ажиллах бололцоотой гэж үзсэн.

-Оюутолгойн ажлын хэсгийн дүгнэлтэд та ямар байр суурьтай байгаа вэ?

-Би ажлын хэсэгт нь багтдаг. Оюутолгойн “Дубайн” гэрээ, “Хөрөнгө оруулалтын” гэрээнд зайлшгүй засах залруулах зүйл байна. Мөн татвартай холбоотой асуудал байна. Миний бие нийгмийн асуудал хариуцсан ажлын хэсэгт орсон. “Эрдэнэт” үйлдвэрийг дагаад хот боссон шиг дэлхий дамнасан Рио Тинтог дагаж өмнийн говьд хот босох ёстой. Тухайлбал, зам, барилга, орон сууц барих байх ёстой. Бидний зүгээс үүнийг тусгасан. Энэ мэт засаж сайжруулах олон ажил бий. Энд одоогийн Оюутолгойн удирдлагууд санал нийлж байна лээ. Тиймээс ажлын хэсэг сайн ажиллах юм хэрэгтэй. Энд Монголчууд нэг зүг рүү харж тууштай ажиллах хэрэгтэй байна.  

-Эрчим хүчний асуудлаа яаж шийдэхээр болсон юм бэ. Засгийн газраас эрчим хүчээ дотооддоо үйлдвэрлэ гэсэн шийдвэр гаргасан шүү дээ?

-Ц.Даваасүрэн сайд Оюутолгойн одоогийн хөрөнгө оруулагчтай үүнийг хэлэлцсэн. Би БНХАУ-аас эрчим хүч авахгүй Монголдоо үйлдвэрлэнэ гэдэг санал нэгдсэн гэж ойлгож байгаа.

Р.Хишигжаргал