УИХ-ын чуулганы өнөөдрийн хуралдаанаар Үндсэн хуульд оруулах нэмэлт, ѳѳрчлѳлтийн тѳслийн анхны хэлэлцүүлгийг хийлээ. Хуралдаан 80 хувийн ирцтэй байна. Энэ үеэр гишүүдийн асуулт асуусан юм.
УИХ-ын гишүүн З.Нарантуяа: Үндсэн хуулийн нэмэлт, өөрчлөлт хэлэлцэх журмын тухай хуулийг зөрчихөөр зүйлүүд байна шүү дээ.
УИХ-ын гишүүн С.Бямбацогт: 2003 онд Үндсэн хуульд нэмэлт, өөрчлөлт оруулах журмын тухай хуульд тодорхой шаардлагууд бий. Тухайлбал, Ерөнхийлөгч, ҮАБЗ, Шүүхийн ерөнхий зөвлөл, Хүний эрхийн үндэсний комисс зэрэг байгууллагаас Үндсэн хуулийн нэмэлт, өөрчлөлтийн төслийг боловсруулах ажлын хэсэг тухай бүрт нь санал авч байсан. Ерөнхийлөгчид хоёр удаа санал хүргүүлсэн ч хариу ирүүлээгүй. Хуульд 30 хоногийн дотор хариу ирүүлээгүй бол тусгайлсан саналгүй байна гэж үздэг. Ямар нэг хууль зөрчсөн зүйл байхгүй.
УИХ-ын гишүүн Д.Дамба-Очир: Монгол төр, парламентын үйл ажиллагааг сайжруулахын тулд Үндсэн хуульд нэмэлт, өөрчлөлт оруулж байгааг дэмжиж байна. Түүнчлэн Орхон, Дархан-Уул аймгийн тухай 2010 онд хотын статустай болгохоор хуулийн төсөл өргөн барьж байсан. Эдгээр аймгийг хот болгох, эрх зүйн зохицуулалтыг яаж тусгасан бэ.
УИХ-ын гишүүн Д.Лүндээжанцан: Хот тосгон, захиргааны эрх зүйн чиглэлийн судлаачдаар хэлэлцүүлсэн. Улсын хэмжээнд энэ гурваар хэмжигдэхгүй, цаашид хот бий болгохыг үгүйсгэхгүй. Тиймээс улсын хэмжээнд хотыг хэрхэн нэрлэж, бүсчилж болох вэ гэдэг утгаар нь зохицуулалт хийж өгсөн.
УИХ-ын гишүүн Ц.Мөнх-Оргил: Би ажлын хэсэгт орсон ч Үндсэн хуульд нэмэлт өөрчлөлт оруулах төслийн зарим заалттай санал нийлэхгүй байгаа учраас гарын үсэг зураагүй. Ялангуяа дөрөвдүгээр бүлэг буюу Монгол Улсын засаг захиргааны асуудалтай холбоотой бүлгийн дэмжихгүй байгаа. Нэмэлт, өөрчлөлтөд Ерөнхий сайд танхимаа бүрдүүлнэ гэх заалттай холбоотойгоор "давхар дээл"-ийн асуудлыг нэг талд нь шийдэхээр зохицуулалт хийх боломж байгаагүй юу.
Р.Хишигжаргал
Сэтгэгдэл (1)