“Туушин” зочид буудалд УУХҮ-ийн сайд Д.Сумъяабазар, Монголын уул уурхайн үндэсний ассоциацийн ерөнхийлөгч Д.Гантөмөр болон Уулын баяжуулах “Эрдэнэт үйлдвэр”, “Оюу толгой”, “Энержи Ресурс” зэрэг компани “Хариуцлагатай уул уурхайн сайн дурын кодексийг хэрэгжүүлэх харилцан ойлголцлын санамж бичиг”-т гарын үсэг зурах ёслол боллоо.  

Энэ үеэр УУХҮ-ийн сайд Д.Сумъяабазар “Эх орондоо хайргүй хүмүүс нь уул уурхайн салбарт байгаа мэт. Харин чанга дуугарч, зохион байгуулалтад орсон хүмүүс нь эх орноо хайрлаад ч байгаа юм шиг байдлаар явахгүй. Бодлого үйл ажиллагаа, төлөвлөгөө, хамтын ажиллагаанд уул уурхайн салбарыг өөд нь татна. Олон аж ахуй нэгжийн хүч, оролцоог татаж эх орныхоо эдийн засгийг өсгөх үүднээс өнөөдрийн арга хэмжээг зохион байгуулж байна.

Би энд хуулийн хүрээний асуудал ярихаас илүүтэй бодлого, хувийн хэвшилтэй хамтарч ажиллах талаар Уул уурхайн салбарын сайдын зүгээс бүх талаас нь дэмжиж ажиллана.  Салбарын сайдын хувьд салбараа хамгаалах бодлого баримтална. Өнөөдрийн явуулж байгаа бодлого үйл ажиллагаа хойш ухрах ч юм уу, үүнээс зайлах байдал огт гаргахгүй. Би өөрийн зөв гэсэн байр суурьд ямагт зогсох болно” гэв.  

Мөн Монголын уул уурхайн үндэсний ассоциацийн газрын дарга Билгүүн “Уул уурхай ба хандлага” сэдвээр илтгэл тавьсан юм.

Тэрбээр “Уул уурхай руу чиглэсэн сөрөг хандлага их болсон байна. Энэ сөрөг хандлага юунаас эхлэлтэй юм бэ, яагаад ийм зүйл болоод байгаа талаар судалгаа хийсэн. Судалгаагаар Монголчуудын сэтгэлзүй, соёл, ёс заншил, хэлний ялгаанаас шалтгаалан уул уурхайд сөрөг хандлагатай байна. Үүнээс гадна байгаль орчны өнөөгийн явж байгаа өөрчлөлт, түүний хүчин зүйлүүд нөлөөлж байна. Мөн уул уурхайн салбар өөрөө анхаарах зүйл ч байна. Монголчууд бид байгалтайгаа мөнхийн шүтэлцээнд амьдардаг нүүдэлчин ард түмэн. Уул гэдэг үг нь бидэнд ойрхон ариун нандин үг байдаг. Гэтэл салбарын яамны нэрд уул гээд орчихсон болохоор хүмүүс уул уурхайд сөргөөр ханддаг” гэлээ.

Р.Хишигжаргал