УИХ дахь “Баялагтаа эзэн Монгол” лобби бүлгийн гишүүд мэдээлэл хийлээ. Энэ үеэр ЗГХЭГ-ын дарга Л.Оюун-Эрдэнэ "Ордон доторх тэмцэл энгийн яриа болж, улс төр хий эргэж, шударга ёсны хүсэмжлэл 95 хүрсэн байгаа энэ үед нэр бүхий парламентын гишүүд нийгмээ өөрчлөхөөр тэмцлээ эхлүүлж байсан нь түүхэн үнэн. Иргэд цаашлаад улам их зүйл хийгээсэй гэсэн хүлээлттэй байгааг бид мэдэж байна. Би сайдын албан тушаал авчихаад амаа хамхиулахгүй.

30 хэмийн хүйтэнд 30 мянгуулаа цугласан хоёр удаагийн жагсаал болоогүй бол өнөөдрийн тэмцэл ордны хананд цуурайтаад өнгөрөх байсан. Бид уйдаж, өрөвдөж, тэмцлээ сулруулж болохгүй. Хамтдаа жилийн хугацаанд эхлүүлсэн томоохон хэрэг шүүхийн шатанд явна. МАНАН мафийн төлөө өөрийгөө золиосолдог хүмүүс байна. АТГ, ТЕГ-т Стандарт банкинд хураагдсан хөрөнгийн жагсаалтыг ард түмэнд ил болгох албан бичгийг илгээж байна.

Баяр наадмын үеэр булхайтай олон зүйл хөшигний цаана өрнөдөг. Иймд бид наадмын өмнө тэмцлээ улам хурцатгана. Бидний нэг жил ордон дотроос болон ордны гаднаас хийсэн тэмцэл эцсийн шатандаа буюу шүүхийн шатандаа очих гэж байна. Шүүхийн гурван шатаар ялагдсан гурван хүнийг эрүүдэн шүүсэн бичлэг илэрсэн. Төлөвлөгөө гаргаж хамтдаа хийсэн прокурор, тагнуул, АТГ-ын удирдлагуудыг шүүх яаж шийдэхийг дэлхий нийт харж байна. Иймд бид энэ хэргийг нүд цавчихгүй харах ёстой. Ялангуяа баяр наадмын үеэр хөшигний ард булхайтай шийдвэр гарчих вий" гэсэн юм.

С.Сүлд