Монголын улс төр өнгөрсөн долоо хоногт бүхэлдээ шүүх тогтолцоогоор амьсгаллаа. Нэр бүхий таван гишүүний зүгээс С.Зоригийн амь насыг хөнөөсөн хэргийг дэнсэлсэн шүүгчдийн бүрэн эрхийг түдгэлзүүлэхээр Үндэсний аюулгүй байдлын зөвлөлд хандсан бол Төрийн зүгээс ч зарлиг гаргасан нь улс төр, нийгмийн анхаарлын төвд орох шалтгаан болов. Хажуугаар нь УИХ-ын гишүүн Ж.Батзандан Баян-Өлгий аймагт ажиллах үеэрээ Оспаны тухай ярьсан нь түүнийг шүүмжлэлийн бай болгох хүргэлээ. Үүнээс гадна Швейцарийн Холбооны улсын Үндэсний зөвлөлийн дарга Марина Кароббио Гүшэтти Монгол Улсад албан ёсны айлчлал хийж, зарим яриа хэлэлцээ хийсэн нь онцлох үйл явдлын нэг байв.

Ерөнхийлөгчийн дардастай 17 шүүгч+8 буюу 125 сая долларын авлига

Ерөнхийлөгч Х.Баттулга зарлиг гаргаж зарим шүүхийн шүүгч, ерөнхий шүүгчийн бүрэн эрхийг түдгэлзүүлэхээр болсон энэ өдрүүдийн ярианы сэдэв болж байна. Тэрбээр энэхүү зарлигаа Шүүхийн ерөнхий зөвлөлөөс хүргүүлсэн саналыг үндэслэн гаргажээ. Энэ дагуу Дээд шүүхийн таван шүүгчээс гадна нэр бүхий 17 шүүгчийн бүрэн эрхийг түдгэлзүүлээд байгаа юм.

УИХ-ын гишүүн Ж.Батзандан энэ талаар эдгээр 17 шүүгч нь ямар нэгэн байдлаар гэмт хэрэгт холбогдсон учир бүрэн эрхийг нь түдгэлзүүлэхээр болсон тухай онцолсон. Үүнтэй зэрэгцэн УИХ-ын дарга Г.Занданшатар иргэдтэй уулзах үеэрээ нэр бүхий долоон шүүгч 125 сая ам.долларын авлига авсан тухай хэлсэн гэх мэдээлэл нийгэмд түгсэн юм. Гэвч УИХ-ын Тамгын газраас энэхүү мэдээллийг үгүйсгэж “Иргэдээс шүүх байгууллагыг шинэчлэх, шүүгчийн ёс зүйг зөрчсөн этгээдүүдэд хатуу хариуцлага тооцдог болох, УИХ-ын гишүүнийг эгүүлэн татдаг байх талаарх асуудлыг олонтаа хөндөж байгааг тэрбээр хэлж, эдгээр саналыг дэмжиж байгаа талаарх байр сууриа илэрхийлсэн.

Үүнээс Салхитын мөнгөний ордыг хууль бусаар өмчлөх гэсэн этгээдүүдээс 7 шүүгч 125 сая ам.долларын авлига авсан тухай яриагүй болно. Ийнхүү зориуд санаатайгаар гуйвуулсан мэдээлэл тарааж байгаад харамсаж, албан ёсны няцаалт хийж байна. Шүүхээр эцэслэн тогтоогоогүй байхад хэнийг ч гэмтэн, буруутан гэж үзэх ёсгүй билээ” хэмээн няцаалт хийсэн юм.

Ийнхүү Ерөнхийлөгчийн зарлиг, таван гишүүний шаардлагад дурдсан 25 шүүгчтэй холбоотой асуудал улстөрчдийн шүүмжлэл, хардлагаас илүүтэй хуулийн байгууллагаар дэнслэгдэхээр болж байна.

Швейцарийн Холбооны улсын Үндэсний зөвлөлийн даргын айлчлал

УИХ-ын дарга Г.Занданшатарын урилгаар Швейцарийн Холбооны улсын Үндэсний зөвлөлийн дарга Марина Кароббио Гүшэтти Монгол Улсад албан ёсны айлчлал хийв. Айлчлалын хүрээнд Швейцарийн холбооны улсын Элчин сайдын яамыг Улаанбаатарт нээх, Парламентын Тамгын газруудын хамтын ажиллагааг үргэлжлүүлэн дэмжих, харилцан сонирхсон асуудлуудаар туршлага судлах, Швейцарийн парламентад УИХ-тай харилцах бүлэг байгуулах, Швейцарийн хөгжлийн хамтын ажиллагааны тусламжийг 2022 оноос үргэлжлүүлэн авах хүсэлтээ дахин илэрхийлж, Үндэсний зөвлөлийн зүгээс дэмжлэг үзүүлэхийг хатагтай Марина Кароббио Гүшэтти-гээс хүссэн юм.

Оспаны тухай Ж.Батзандан гишүүний “дэгс үг”

УИХ-ын гишүүн Ж.Батзандан Баян-Өлгий аймагт очиж, иргэд сонгогчидтой уулзалт хийх үеэрээ Оспаны тухай ярьсан нь нийгэм, улс төрийн хүрээнд шүүмжлэл дагуулав. Тэрбээр "Оспан баатар байгаагүй бол Монголын баруун хязгаар харийн түрэмгийлэгчдийн гарт өртөх байсан" хэмээн ярьсан юм.

Улмаар өөрийг нь чиглэсэн нийгмийн шүүмжлэлтэй холбогдуулж хэлсэн үгийнхээ талаар тайлбар хийсэн юм. Ингэхдээ “Оспан баатарын талаар тайлбар хиие. Би Гадаад харилцааны сайд биш, гадаад харилцаа, аюулгүй байдлын байнгын хорооны гишүүн биш. Казахын ард түмний түүхийг гуйвуулсан мэдээллийг ярьж болохгүй. Тэр тусмаа УИХ-ын гишүүн хүн ярьж болохгүй гэдгийг би хариуцлагатайгаар ойлгож байна” гэсэн нь одоо ч шүүмжлэл дагуулж байна.

Чуулганы хугацааг сунгав

УИХ-ын даргын дэргэдэх Зөвлөл өчигдөр хуралдаж, хаврын ээлжит чуулганы хугацааг сунгах нь зүйтэй гэж үзсэн байна. Үүнтэй холбогдуулан Монгол Улсын Их Хурлын дарга Г.Занданшатар “Чуулганы хугацааг сунгах тухай” захирамж гаргалаа. Захирамжид хаврын ээлжит чуулганы хугацааг ирэх сарын 10-ны өдрийг дуустал сунгахаар заажээ. Захирамжийн хоёрдугаар заалтаар Үндсэн хуульд оруулах нэмэлт, өөрчлөлтийн төслийн хэлэлцүүлэг хоорондын хугацаанд иргэдийг мэдээллээр хангаж, танилцуулга хийх, иргэдээс гаргасан саналыг нэгтгэн Төрийн байгуулалтын байнгын хороонд ирүүлэхийг Улсын Их Хурлын гишүүдэд даалгасан байна.

С.Сүлд