Монголчууд хартай. Үүнийг нотолсон гэлтэй үйл явдал өрнөсөн нь БНХАУ-ын Гадаад харилцааны дэд сайдын айчлалтай холбогдоно. Тодруулбал, өнгөрсөн сарын 27-29-нд БНХАУ-ын Коммунист Намын Төв хорооны Гадаад харилцааны дэд сайд Ван Яжун манай улсад албан ёсны айлчлал хийх үеэрээ Оюутолгойн үйл ажиллагаатай танилцаад буцсан. Гэвч Оюутолгойг Хятадуудад өгөх гэж байна хэмээн нийгмээрээ шуурсан. Хариуд нь “Дэд сайдын хувьд Монголтой холбоотой асуудлыг шийдэх, түлхэц өгч чадахуйц хэмжээний албан тушаалтан. Монгол Улсын эдийн засгийг бүрдүүлэгч гол бүтээгдэхүүн уул уурхай. Уул уурхайн бүтээгдэхүүн экспортод гарч байгаа гол боомт нь Гашуун сухайтын боомт юм.Ерөнхий сайд айлчлалынхаа хүрээнд энэ боомтыг олон улсын чанартай томоохон боомт болгох саналыг Хятадын талд тавьж байсан. Тиймээс Гашуун сухайтын боомтын үйл ажиллагаатай танилцсан. Зам зууртаа Тавантолгой, Оюутолгойн үйл ажиллагаатай танилцах хүсэлтээ өөрөө тавьсан. Зочны ёсоор танилцаад явсан гэдгийг тодотгож хэлье” хэмээн МАН-ын ерөнхий нарийн бичгийн дарга Д.Амарбаясгалан мэдэгдсэн байдаг. Уг асуудал ч тэгсхийгээд намжсан юм.

Тэгвэл өөр нэгэн хардлага төрүүлэхүйц айлчлал өнгөрсөн баяр наадмын өдрүүдэд болж өнгөрлөө. Юу гэхээр Ерөнхий сайд У.Хүрэлсүхийн урилгаар БНХАУ-ын Дэд дарга Ван Чишань Монгол Улсад албан ёсны айлчлал хийгээд буцав. Хүн бүрийн анхаарал наадмын уур амьсгал руу чиглэсэн учраас БНХАУ-ын дарга Си Жиньпиний орлогчийн айлчлалд төдийлөн ач холбогдол өгөөгүй байж мэдэх. Анзаарах сөхөөгүй байсан болоод ч тэр үү нийгэм, улс төрийн хүрээнд төдийлөн шуугицгаасангүй. Тэрбээр Ерөнхий сайд У.Хүрэлсүхтэй хэлэлцээ хийж, хоёр талын хамтын ажиллагааны баримт бичигт гарын үсэг зурснаас гадна Ерөнхийлөгч Х.Баттулгад бараалхаж, УИХ-ын дарга Г.Занданшатартай уулзжээ. Гагцхүү БНХАУ-ын Дэд дарга Ван Чишань Монголд юу үлдээгээд буцав гэдэг нь өнөөдөртөө асуултын тэмдэг хэвээр байгаа юм.

Учир нь, БНХАУ-даа хоёрдугаар хүний эрэмбэтэй гэгдэх Ван Чишань нь дэлхийн тэргүүлэгч улс орнуудад айлчилж, Ерөнхийлөгч, Ерөнхий сайд нартай нь Си Жиньпиний өмнөөс албан ёсны гэрээ, хэлэлцээ хийдэг нэгэн.

БНХАУ-ын удирдагчдын өмнөх таван жилийн хугацаанд Сахилга батыг хянан шалгах хорооны даргаар ажиллаж байхдаа намын болон улс орон даяарх авлигатай хатуу тэмцэж, түүхэн хувьсгал хийсэн хүн гэгддэг юм. Эндээс харахад Монгол Улс, БНХАУ-ын хооронд дипломат харилцаа тогтоосны 70 жилийн ойн хүрээнд болсон Ван Чишаний энэ удаагийн айлчлал зүгээр наадам үзээд буцахтай холбогдохгүй болов уу.

Тэрбээр Ерөнхий сайд У.Хүрэлсүхтэй хийсэн уулзалтын үеэр Монгол Улсын тусгаар тогтнол, газар нутгийн бүрэн бүтэн байдал, Монголын ард түмний сонгосон хөгжлийн замыг БНХАУ ямагт хүндэтгэж ирснийг тэмдэглэхийн хамт, харилцан ашигтай, хамтдаа хожсон хамтын ажиллагааг улс төр, эдийн засаг, хүмүүнлэгийн болон орон нутгийн харилцааны салбарт хэрэгжүүлэхийг хүсч байгаагаа илэрхийлжээ.

Үүний дараа

§ “Монгол Улсын Хөгжлийн бэрхшээлтэй хүүхдийн хөгжлийн төвийн дагалдах барилга байгууламжийн төсөл”-ийн гэрээ

§ Дорноговь аймгийн Замын-Үүд сум болон БНХАУ-ын ӨМӨЗО-ны Эрээн хот хоорондын гэрээ

§ Дорноговь аймгийн Сайншанд болон БНХАУ-ын ӨМӨЗО-ны Бугат хотын Дархан мянгад холбоод хошуу хоорондын гэрээнд гарын үсэг зурах ёслолд оролцсон байна.

Үүний дараа УИХ-ын дарга Г.Занданшатартай уулзалт хийжээ. Уулзалтын хүрээнд УИХ-аар гэрээг нь соёрхон батлахаар төлөвлөж буй Замын-Үүд-Эрээний эдийн засгийн хамтарсан чөлөөт бүсийн асуудал болон Алтанбулаг-Замын-Үүдийн олон улсын хурдны замын бүтээн байгуулалтад хамтран ажиллах, БНХАУ-ын Ардын банктай хийсэн Монголбанкны своп хэлцлийн төлбөрийг хөгжлийн зээл, концесс зэрэг боломжтой хэлбэрээр дээрх замын бүтээн байгуулалтад ашиглах саналыг анхааралдаа авахыг Дэд дарга Ван Чишэнээс УИХ-ын дарга хүссэн байна.

Хариуд нь БНХАУ-ын Дэд дарга Ван Чишань “БНХАУ тогтвортой хөгжих нь дэлхийн улс орнуудад, түүний дотор Монгол Улсад ч сайн нөлөө үзүүлнэ гэдэгт итгэж байна. Түүнчлэн “Бүс ба зам” зэрэг хөтөлбөрийн хүрээнд хөгжлийн стратегиа уялдуулж, шинэ амжилтад хүрэх нь хоёр орны эрх ашигт нийцнэ гэдэгт итгэж байна" гэсэн байна.

Ийнхүү Ерөнхий сайд У.Хүрэлсүхтэй хэлэлцээ хийж, зарим гэрээнд гарын үсэг зурсныг эс тооцвол БНХАУ-ын Дэд дарга Ван Чишаний айлчлал "даруухан" төвшинд болж өнгөрчээ. Тийм байж болох ч түүнийг Монголд юу үлдээгээд буцсаныг цаг хугацааны дэнс л харуулна.

С.Сүлд