Засгийн газар маргааш хуралдаж Үндсэн хуульд нэмэлт, өөрчлөлт оруулах төсөлд өгөх санал, дүгнэлтийг хэлэлцэхээр товложээ. Д.Лүндээжанцан гишүүнээр ахлуулсан ажлын хэсгээс “Эцэг хууль”-даа нэмэлт, өөрчлөлт оруулах төслийг УИХ-д өргөн барьснаас хойш парламентын уур амьсгал бүхэлдээ уг асуудал руу чиглэж буй. Гишүүд тойрогтоо ажиллаж, Үндсэн хуульд нэмэлт, өөрчлөлт оруулах төслийг иргэдэд танилцуулсан бол Ажлын болон Дэд хэсгийнхэн Төрийн ордонд ээлж дараалан хуралдсан. Тав хоног үргэлжилсэн баяр наадмын амралт маргааш дуусгавар болно. Энэ дагуу УИХ-ын ээлжит бус чуулган үргэлжлүүлэн хуралдаж хуулийн төслийг хэлэлцэх юм.

Албан ёсны мэдээллээр маргаашийн чуулганы нэгдсэн хуралдаанд Ерөнхийлөгч Х.Баттулга оролцож Үндсэн хуульд нэмэлт, өөрчлөлт оруулах асуудлаар саналаа илэрхийлэхээр болсон. Харин үүнтэй зэрэгцэн Засгийн газар хуралдаж төсөлд өгөх санал дүгнэлтээ гаргах хэрэг.

Саяхныг хүртэл гүйцэтгэх засаглалын зүгээс Үндсэн хуульд нэмэлт, өөрчлөлт оруулах төсөлд санал дүгнэлтээ өгөөгүй байсан юм. Өгөөгүй ч гэж Ерөнхий сайд У.Хүрэлсүхийн байр сууриа илэрхийлэлгүй өнөөдрийг хүрсэн гэсэн үг.

Учир нь, түүний танхимыг бүрдүүлж байгаа 15 сайдын хувьд 15-уулаа УИХ-ын гишүүн. Энэ хэрээрээ төслийг хэлэлцэж эхлэхээс хоёр дахь хэлэлцүүлэгт шилжүүлтэл нь их, бага хэмжээгээр саналаа илэрхийлсэн. Тойрогтоо ч энэ асуудлаар ажиллаж, иргэдэд танилцуулсан болов уу. Харин Ерөнхий сайд У.Хүрэлсүхийн тухайд өнгөрсөн хугацаанд Үндсэн хуулийн нэмэлт, өөрчлөлтийн асуудлаар жинтэй үг унагаагүй.

Тэгэхээр маргааш хуралдах Засгийн газрын хуралдааны үеэр Ерөнхий сайд У.Хүрэлсүхийн зүгээс Үндсэн хуулийн нэмэлт, өөрчлөлттэй холбоотой асуудлаар тодорхой төвшинд байр сууриа илэрхийлэх нь.

Үндсэн хуульд нэмэлт, өөрчлөлт оруулах хангалттай ирц, товчлуурыг бүрдүүлж байгаа МАН-ын даргын нь хувиар ч мөн адил.

Үндсэн хуулийн нэмэлт, өөрчлөлтөд тусгаснаар:

39.2.Ерөнхий сайд Засгийн газрын бүтэц, бүрэлдэхүүн, түүнд өөрчлөлт оруулах тухай хуулийн төслийг Ерөнхийлөгчтэй зөвшилцөн УИХ-д өргөн мэдүүлнэ. Ерөнхий сайд энэ асуудлыг Ерөнхийлөгчтэй долоо хоногийн дотор зөвшилцөж чадаагүй бол УИХ-д өөрөө өргөн мэдүүлнэ.

39.3.Ерөнхий сайд нь УИХ, Ерөнхийлөгчид танилцуулснаар Засгийн газрын гишүүнийг томилж, чөлөөлж, огцруулна.

44.1.Ерөнхий сайд улсын төсөв, бодлогын тодорхой асуудлаар өөрт нь итгэл хүлээлгэх тогтоолын төслийг оруулбал УИХ гурав хоногийн дараа хэлэлцэж эхлэн 10 хоногийн дотор нийт гишүүний олонхын саналаар шийдвэрлэнэ.

44.2.УИХ тогтоолыг баталсан бол Ерөнхий сайдад итгэл үзүүлж, тухайн асуудлыг дэмжсэнд тооцно. Тогтоолыг батлаагүй бол Ерөнхий сайдыг огцорсонд тооцож шинэ Ерөнхий сайдыг 30 хоногийн дотор томилох саналыг тусгаад байгаа юм.

С.Сүлд