Төрийн тэргүүн Х.Баттулга Үндсэн хуульд нэмэлт, өөрчлөлт оруулах төсөлд өгөх саналаа УИХ-д хүргүүлсэн бололтой. Магадгүй Хүй долоон худагт соёолонгийн уралдаан үзэх үеэрээ УИХ-ын дарга, Ерөнхий сайд болон гишүүдийн хамт албан бусаар хуралдсан шалтгааны учиг эндээс гарч байх шиг. Сонирхолтой нь, УИХ-д хүргүүлсэн Ерөнхийлөгчийн саналд хэд хэдэн анхаарал татахуйц заалт байна.
Жишээ нь, одоо байгаа УИХ-ын гишүүдийн тоог 108 болгож, бүрэн эрхийн хугацааг нь таван жил болгох саналыг тусгажээ. Мөн улс төрийн намыг үл хөдлөх хөрөнгөтэй байхыг Үндсэн хуулиар хориглох саналыг оруулсан байна. Санаж байгаа бол өмнөх парламентын үед УИХ-ын гишүүн асан Н.Батбаяр нарын гишүүний өргөн барьсан Үндсэн хуулийн нэмэлт, өөрчлөлтөд гишүүдийн тоог 99 болгох заалтыг тусгаж байв.
Мөн УИХ, Засгийн газар, бүх шатны Засаг дарга нарын бүрэн эрхийн хугацааг таван жил болгох саналыг оруулж ирж байлаа. Харин экс Ерөнхийлөгч Ц.Элбэгдоржийн санаачилсан Улс төрийн намуудын тухай хуулийн шинэчилсэн найруулгад улс төрийн намуудыг өмчтэй буюу үл хөдлөх хөрөнгөтэй байхыг хориглохоор оруулж ирж байсан юм.
Н.Батбаяр нарын төслийг парламент хэлэлцэж амжилгүй дараагийн сонгууль, шинэ УИХ-тай золгосон бол Ерөнхийлөгч асан Ц.Элбэгдоржийн хуулийн төслийг дэмжилгүй унагаасан.
Харин энэ удаад улс төрд томоохон тоглогчийн байр сууриас “тоглох” болсон Ерөнхийлөгч Х.Баттулгын зүгээс гишүүдийн тоог 108 болгож, намуудын байрыг “хураах” саналыг оруулж ирээд байна. Ирэх жил болох сонгуулиа бодсон ч, Сонгуулийн тухай хуулиа шинэчлэн найруулахаар сэдэл төрсөн энэ үед Ерөнхийлөгчийн санал улс төрийн намуудад “таалагдах” нь мэдээж. УИХ-ын дийлэнх олонх гишүүний дахин сонгогдох замаа засах боломж нь.
Харин намын өмчлөлтэй байр саваа төрд хураалгахыг тэд дэмжихгүй л болов уу. Эсрэгээрээ нөгөө талд гишүүдийн тоог 108 болгож, бүрэн эрхийг нь нэг жилээр сунгахыг ард түмэн дэмжихгүй нь тодорхой ч намуудын өмчлөлтэй байрыг төрд авахыг алга ташин хүлээж авах нь дамжиггүй.
Сануулахад өнөөдрийн ээлжит бус чуулганы нэгдсэн хуралдаанд Ерөнхийлөгч Х.Баттулга оролцож, Үндсэн хуулийн нэмэлт, өөрчлөлтөөр өөрийн байр суурийг илэрхийлэх учиртай. Хажуугаар нь Засгийн газраас өгөх санал дүгнэлтээ У.Хүрэлсүхийн танхим хэлэлцэнэ.
С.Сүлд
Сэтгэгдэл (24)