Үндсэн хуулийн нэмэлт, өөрчлөлтөөр Хүй долоон худагт албан бусаар хуралдсан Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд У.Хүрэлсүх нар нэг ширээний ард суухаар болов. Ямар ч байсан “Эцэг хууль”-даа гар хүрэх асуудлаар зөвшилцөх ажлын хэсэг байгуулах санал гаргасныг нь Байнгын хороо дэмжиж, чуулганы нэгдсэн хуралдаанаар эцэслэн баталлаа. Ингэснээр Ерөнхийлөгчөөс өргөн мэдүүлсэн Үндсэн хуульд нэмэлт, өөрчлөлт оруулах саналыг Д.Лүндээжанцан нарын 62 гишүүний өргөн мэдүүлсэн төсөлтэй уяалдуулах, асуудлыг зөвшилцөхөөр болж байна.
Ажлын хэсгийг Ерөнхийлөгч Х.Баттулга даргалах бол Ерөнхий сайд У.Хүрэлсүх орлогчоор нь ажиллах юм.
Харин Байнгын хорооны дарга С.Бямбацогт нарийн бичгийн даргаар нь ажиллаж, Д.Тогтохсүрэн, Д.Эрдэнэбат, Ө.Энхтүвшин, Ц.Нямдорж, С.Эрдэнэ, Л.Болд нарын гишүүн бүрэлдэхүүнд нь оржээ. Албан тушаалынх нь эрэмбээр харвал энэхүү зөвшилцлийн ажлын хэсэгт Бүлгийн болон Зөвлөлийн хоёр, Намын хоёр дарга, Засгийн газрын хоёр гишүүн, УИХ-ын зургаан гишүүн багтжээ.
Энэ талаар УИХ дахь МАН-ын бүлгийн дарга Д.Тогтохсүрэн “Ерөнхийлөгч Үндсэн хуулиар олгогдсон бүрэн эрхийнхээ дагуу Үндсэн хуульд нэмэлт, өөрчлөлт оруулах хуулийн төслийг өргөн барьсан. Ерөнхийлөгчийн өргөн барьсан төсөлд нийт 49 заалт байгаа. Үүний 16 нь шинээр орж ирсэн заалт. 33 нь одоо явж байгаа Үндсэн хуулийн нэмэлт, өөрчлөлтийн төсөлд хөндөгдсөн заалтууд байгаа. МАН-ын бүлэг энэ асуудлаар хуралдаж хоёр чиглэлээр ажиллах хэрэгтэй гэж үзсэн. Энэ төслийг судлах хугацаа хэрэгтэй байна. Иргэд юу гэж үзэж байна гэдгийг асуух хэрэгтэй гэж үзсэн. Өмнөх төсөл дээр гишүүд ажиллаад тойрогтоо танилцуулаад ирсэн. Тиймээс Ерөнхийлөгчийн төсөл дээр ч ингэж ажиллахгүй, шууд хэлэлцэж болохгүй гэж үзсэн.
Үндэсний зөвшилцөл хэрэгтэй байгаа юм. Парламент дахь болон гадна байгаа намууд, Ерөнхийлөгчийн институцийн зүгээс тодорхой бүрэлдэхүүн оруулж энэ төсөлд ажилламаар байгаа юм. Тиймээс зөвшилцөх ажлын хэсэг байгуулсан” гэжээ.
Бүлгийн дарга Д.Тогтохсүрэнгийн хэлсэнчлэн УИХ-аас Зөвшилцлийн ажлын хэсэг байгууллаа. Нэгэнтээ Ерөнхий сайд асан Н.Алтанхуяг ч энэ тухай “Үндсэн хуулийн нэмэлт, өөрчлөлтийн хүрээнд Ажлын хэсэг байгуулаад Ерөнхийлөгчөөрөө ахлуулахал болохгүй гэх зүйлгүй” хэмээн ярьж байсан удаатай.
Харин өнөөдрөөс Ерөнхийлөгч, Ерөнхий сайдаар ахлуулсан ажлын хэсэг Үндсэн хуулийн нэмэлт, өөрчлөлтийн хүрээнд ширээний ард сууж эхэлж байна. Гагцхүү Үндэсний зөвшилцөл хийх “даалгавар”-тай Ажлын хэсэг ямар шийдэлд хүрэх бол гэдэг нь сонирхолтой сэдэв болж байна.
МАН-ын бүлгийн гишүүдийн зүгээс байгалийн баялаг, хоттой, тусгаар тогтнолтой холбоотой Ерөнхийлөгчийн саналд нааштай хандаж байгаа юм билээ. Харин Харин парламентыг 108 гишүүнтэй, сонгуулийг холимог тогтолцоотой, УИХ-ын бүрэн эрхийг таван жилийн хугацаатай болгох асуудлыг сонгогчдоосоо асуух ёстой гэж үзжээ. Эндээс харахад Ерөнхийлөгч Х.Баттулгын даргалах Үндэсний зөвшилцлийн ажлын хэсгийн байр суурь нэг зүгт харахад иргэдийн санал томоохон жин дарах бололтой.
С.Сүлд
Сэтгэгдэл (2)