АНУ-ын Батлан хамгаалахын сайд Марк Эспер энэ сарын 7-ны орой Монгол Улсад айлчлан ирлээ. Пентагоны тэргүүнээр сонгогдоод удаагүй тэрбээр анхны гадаад айлчлалаа Ази, Номхон Далайн бүсийн таван орноор хийхээр төлөвлөснөөс эхлээд Австралид айлчилсан юм. Үүний дараа Шинэ Зеланд, Япон улсуудад дараалан зочилоод манай улсад ийн хүрэлцэн ирээд байна. Тэрбээр өнөөдөр Батлан хамгаалахын сайд Н.Энхболдтой уулзсны дараа Монгол Улсын Ерөнхийлөгч Х.Баттулгад бараалхана. Ингээд түүний Монголд Улсад хийх албан ёсны айлчлал өндөрлөж, БНСУ-ыг зорих юм.

АНУ-ын Батлан хамгаалахын сайд Марк Эсперийн айлчлалыг хоёр орны хэмжээний батлан хамгаалахын салбарт ихээхэн ач холбогдол өгч буйн нэгээхэн илэрхийлэл хэмээсэн.

Энэ талаар Пентагоны тэргүүн тэрбээр “Монголд ирлээ. АНУ-Монголын нийтлэг үнэт зүйлс, түншлэлийн бат бэх хэлхээ холбоо, дэлхий даяар ардчилал, эрх чөлөөг дэмжих үүргээ батлан харуулах болно” гэж тэр твиттер хуудсандаа бичсэнээс илхэн харж болно.

Монгол Улсын Ерөнхийлөгч Х.Баттулга АНУ-д айлчилсны дараа Пентагоны тэргүүн манай улсад ийн айлчилж буй нь гуравдагч хөршийн худалдааны хуулийг батлах цаг ойрхон буйн гэрч гэж зарим эдийн засагчид үзэж байна. Түүнчлэн энхийг сахиулах ажиллагаанд манай улс идэвхтэй оролцож ирсэн, авлигын эсрэг тууштай тэмцэж буй зэрэг нь томоохон түлхэц үзүүлсэн гэж буй юм.

Ийнхүү ардчилал манай улсад хүрэлцэн ирэхтэй зэрэгцэн хойд хөршийн Батлан хамгаалахын орлогч сайд мөн хүрэлцэн ирээд байна. Тодруулбал, ОХУ-ын Батлан хамгаалахын орлогч сайд, хурандаа генерал А.В. Фомин манай улсад айлчилж байна. Түүний хувьд Батлан хамгаалахын дэд сайд Т.Дуламдоржтой уулзалт хийж, хоёрын орны батлан хамгаалахын салбарт өрнөж буй асуудлаар санал солилцох аж.

Түүнчлэн “Аравт”  олон улсын морин цэргийн уралдааны сүүлийн шат буюу шийдвэрлэх өнөөдөр Тавантолгой дахь Зэвсэгт хүчний сургалтын нэгдсэн төвд болно. Энэ үеэр ОХУ-ын Батлан хамгаалахын орлогч сайд, хурандаа генерал А.В.Фомин Ерөнхийлөгч Х.Баттулгын хамт оролцох аж.