Ерөнхийлөгчийн дэргэдэх “Иргэний танхим”-д “Тост, Тосон Бумба” үндэсний хэлэлцүүлгийг “Эрс шинэчлэл хөдөлгөөн”, “Байгаль хамгаалах говийн иргэдийн санаачилга” ТББ-ууд хамтран зохион байгуулж байна. Энэ үеэр “Эрс шинэчлэл хөдөлгөөн” ТББ-ын тэргүүн Д.Энхбат “Тост, Тосон бумбыг хамгаалах тэмцлийн утга учир” сэдвээр илтгэл тавих үеэрээ Уул уурхай, хүнд үйлдвэрийн сайд Д.Сумъяабазарыг огцрохыг шаардав.
Тэрбээр “Бид шат шатны хуулийн байгууллагаар явж байна. Асуудалд эрүү үүсгэн, шалгана гэж бодож байна. Зааланд сууж байгаа ихэнх хүмүүс орон нутагт болсон өмнөх нээлттэй хэлэлцүүлэгт оролцсон. Буруу шийдвэр гаргасан нөхдүүдтэй хатуу хариуцлага тооцно гэж амлаж байсан. Тост, Тосон бумбын нурууг стратегийн ач холбогдолтой ордын ангилалд оруулж байгаад ухна гэж ярьж байна. Тийм зүйл байхгүй.
Тосон бумбад нөлөөлөх хуулийн хулгайг нь салбарын сайд оролцож, хийсэн. Тиймээс бид Монгол Улсын хууль зөрчсөн, эх орныхоо эсрэг үзэл бодолтой Уул уурхайн сайдыг огцруулъя гэсэн санал тавьж байна. Огцрохыг шаардаж байна.
Уул усаа сүйдэлж байгаа дампуу уул уурхайн салбарыг цэгцлэх цаг болсон” гэлээ.
Сануулахад УИХ-ын гишүүн Л.Энхболдоос Ерөнхий сайд У.Хүрэлсүхэд тавьсан Тост, Тосон бумбатай холбоотой асуулгын хариуг Хэрэг эрхлэх газрын дарга Л.Оюун-Эрдэнэ холбогдох хууль тогтоомжийн хүрээнд өгсөн байдаг. Харин энэ удаад “Эрс шинэчлэл хөдөлгөөн”-ий Д.Энхбат тэргүүтэй иргэний хөдөлгөөнийхөн салбарын сайд Д.Сумъябазарыг ийнхүү онилж, огцрохыг шаардах бололтой.
Сэтгэгдэл (4)