Улсын онцгой комиссын өргөтгөсөн хурал Төрийн ордонд болж байна. Тус хуралд Засгийн газрын гишүүд болон 21 аймгийн Засаг дарга нар оролцож байгаа юм.

Энэ үеэр Ерөнхий сайд У.Хүрэлсүх үг хэлсэн юм. Тэрбээр “Нүдэн дээр чинь авлига авч байна. Үүнийг таслан зогсоо. Сайд нь байна уу, Их Хурлын гишүүн нь байна уу хамаагүй. Хэдүүлээ ингэж ажиллая. Би олон удаа хэлж байгаа шүү. Өнөөдөр ард түмнийхээ өмнө хэлж байна. Ерөнхий сайд энэ талаар ярихгүй байна гэж бодож байж магадгүй. Хууль хэрэгжих ажил бол төрийн ажил. Засгийн газар гэмт хэрэгтэй тэмцэх үүрэгтэй. Энэ бол хуулиар олгогдсон үүрэг. Үүнийг дарга нар анхаарч ажилла. Шударга ёсыг цогцлооход чанд ажилла.

Ямар нэгэн байдлаар дарамталдаг хүн байвал нэр устай нь хэл. Та нарыг хамгаалах байгууллага нь бий. Хамгаална. Олигархуудаас битгий ай. Битгий худалдагд. Зоригтой, зүрхтэй бай.

Төрийн сүлд та нарыг харж байгаа. Эх орноо бүтэн авч үлдэе гэвэл үүнийг хийхээс өөр аргагүй. Үүнийг бүх шатанд хийх ёстой. Хулгайч нар Монголын төрд дахин битгий гараасай гэж уриалж байна. Бүх намуудад ч уриалъя.

Аймгийн Засаг дарга нарт ч хэлсэн. Хулгайч нарыг битгий дэвшүүлээрэй гэж. Хулгайч нар заавал төрд орж ажиллах шаардлага байхгүй. Хулгай хийнэ, хүн амины хэрэг, хүчин, концесс, ЖДҮ бүгдийг хийж байгаа. Тиймээс анхан шатаасаа анхаарч ажилла. Үүн дээр Ерөнхий сайд хатуу байр суурьтай байгаа шүү. Хэнд ч худалдагдахгүй. Хэнээс ч айхгүй. Ингэж ажиллая” гэв.

Үргэлжлүүлэн Шадар сайд Ө.Энхтүвшин “Одоо амралтаас ажилд нь оруулах хэрэгтэй. Амаргүй өвөл болох нь. Их айхтар усан бороо орсон өвөл амаргүй болдог гэж хөгшчүүл хэлж байна. Тиймээс богино хугацаанд өвлийн бэлтгэл ажлаа амжуулах хэрэгтэй. Ер нь Улсын баяр наадмыг янз бүрийн үед зохиодог нь биш юм. Тиймээс орон даяар аймаг сумдад хийж байя. Харин шаардлагатай тохиолдолд жич хийж байя” хэмээн хэллээ. 

Б.Лхам