Олон нийтэд ил болсноос нь эхлээд дурдах хэрэгтэй байх. Сул гишүүн байтугай Засгийн газрын, УИХ-ын гишүүн явсан Х.Баттулга Ерөнхийлөгчөөр сонгогдсон үе. Төрийн хамгаалалтад байх үе нь гэвэл илүү зүйд нийцнэ, үнэнд дөхнө. Үндсэн хуулийн эх хувилбар, өнөөг хүртэл дагаж мөрдөж ирсэн жишгээс харахад тэрбээр тав дахь Төрийн тэргүүн гэдгээрээ тангараг өргөжээ. Түүнээс хойш юу болж өнгөрөв. Улсын Ерөнхий прокурор, Авлигатай тэмцэх газрын даргыг лав дуудаж уулзсан. Үүгээрээ дамжуулан тодорхой үүрэг өгсөн. Асуудал нь “60 тэрбум”, оффшор.

Авлигатай тэмцэх газрын дарга, Улсын Ерөнхий прокурорыг хуулиар өөрт олгосон бүрэн эрхийн дагуу дуудав. Тэдгээрийг хүссэн болгон нь дуудаж үүрэг чиглэл өгөх боломжгүй. Хуулиараа ч энэ нь хаалттай. АТГ-ын даргыг болон Улсын Ерөнхий прокурорыг санал болгодог нь Ерөнхийлөгч, томилдог субъект уг нь УИХ. 

Яг энэ уламжлал, тогтолцоогоор томилж чөлөөлж байсан нь өмнөх парламентын үед тогтсон жишиг. Гэвч холбогдох хуульд өөрчлөлт оруулах замаар дээрх албан тушаалтнуудын “халдашгүй” эрхийг Үндэсний аюулгүй байдлын зөвлөлд шилжүүлсэн нь саяхан. Үүгээр Үндэсний аюулгүй байдлын зөвлөл хэмээх Ерөнхийлөгч, УИХ-ын дарга, Ерөнхий сайдаас бүрдсэн Ажлын алба шүүх, прокурор, Авлигатай тэмцэх байгууллагын албан статусыг чиглүүлж, залуурддаг болов.

Үндэсний аюулгүй байдлын зөвлөл хэмээн зөөллөж буй ч түүнийг нь даргалдаг Ерөнхийлөгч жинхэнэ утгаараа “Хаан” болсон тухай одоо ч жиг жуг хийж байна. Гэтэл үгүй байж. Энэ зөвлөлийг бүрдүүлэгч гишүүн, Ерөнхий сайдын албатай нэгэн саяхнаас асуудал бүрийг “бярдаж”, үүрэг өгөх боллоо. Тэр нь маргаангүй МАН-ын дарга, одоогийн Ерөнхий сайд.

Эхлээд тэр хууль бустай тэмцэхээ илэрхийлсэн. Энэ хүрээнд УИХ-ын дарга, Бүлгийн дарга бас бус сайд нараа огцруулсан. Олон нийт алга ташин хүлээж авсан. Харин өнөөдөр тэрбээр дахин хууль бус гэх уул уурхайн лицензтэй тэмцэж эхэллээ. Хууль бус эсэхийг нь хэлж мэдэхгүй ч өөрт байгаа хүч, эрх мэдлийнхээ хүрээнд зарим лицензийг “хураав”. Хүний өөрийн гэхгүй тэмцэж байгааг нь олон нийт дахин дэмжив, алга ташив. "Сайн хэрэг, үргэлжлүүлэх хариуцлагын тухай асуудал" хэмээн хэн хүнгүй хэлж байна. Гэхдээ энэ бүгдэд ганцхан асуудал Ерөнхий сайдыг дагалдах боллоо. Тэрбээр АТГ-ын даргад үүрэг өгдөг хүн мөн үү...

У.Хүрэлсүхээс өгсөн чиглэлийн дагуу З.Дашдаваа хэрэг бүртгэл нээдэг хүн мөн үү гэдэг нь асуудал. Ямар ч байсан Ерөнхий сайд У.Хүрэлсүх хууль хүчний байгууллагынхантай уулзахдаа түүнд хоёр ч удаа үүрэг чиглэл “өгөв”.

Танхимынхаа салбар хариуцсан сайдын эрхлэх хүрээний агентлагийн дарга С.Баатаржавд биш УИХ-ын дэргэдэх АТГ-ын тэргүүн комиссар З.Дашдаваад. Магадгүй холбогдох хуульд өөрчлөлт оруулсан нь Ерөнхий сайд У.Хүрэлсүхэд энэ мэтчилэн эрх мэдлийг атгуулсан байж магадгүй. Гэхдээ гүйцэтгэх засаглалын тэргүүн У.Хүрэлсүх, хууль тогтоох дээд байгууллагаас томилдог З.Дашдаваад үүрэг өгөх хүн мөн үү?!

Г.Эрхэс