Үндэсний Их баяр наадмыг зохион байгуулах хорооноос сэргээш хэрэглэсэн эсэх асуудлаар албан ёсны тайлбар хийх хугацаа өчигдөр дуусгавар болсон. Дуусгавар болсон гэдэг нь хүчит бөхийн барилдааны шөвгийн 16-д үлдсэн бөхчүүдээс сэргээш илэрсэн эсэх тухай мэдээллийг албан ёсоор зарлах, олон нийтэд хүргэх байв. Үүнтэй холбогдуулж, түрүүчээсээ сэргээшийн шинжилгээ илэрсэн эсэх тухай бөхчүүд өөрийн цахим хуудсаар дамжуулан мэдэгдсэн. Хамгийн сүүлд Улсын их баяр наадмын түрүү бөх Э.Оюунболд мэдэгдэл хийсэн нь одоо ч олон нийтийн анхаарлын төвд ороод байна. Үүнтэй холбогдуулж УИХ-ын гишүүн Б.Бат-Эрдэнэ допингийн асуудлаар байр сууриа илэрхийлжээ.

Тэрбээр “Би Э.Оюунболдтой  холбогдож чадаагүй байна. Э.Оюунболд өөрөө бичлэг хийж мэдэгдэл гаргасан байна лээ. Баяр наадмын үеэр дархан аваргуудад хүндэтгэл үзүүлдэг. Тэр үеэр нэг уулзсан.  Тэрнээс  хойш холбоо барих гээд үзэхэд нутаг руугаа явчихсан байна лээ.  Намайг хөдөө байх хооронд миний талаар их зүйл бичсэн байна.  Солонгос руу шавийгаа дагуулаад цусны шинжилгээний хариуг өөрчилөх хөөцөлдөөд явж байна гэсэн байсан. Ямар учиртай юм мэдэхгүй. Санаатайгаар тийм мэдээлэл тараасан байх. Бас “Баяр наадмын комисс”-оор орж гараад байна гэсэн байна.  Надад ийм асуудал байхгүй.

Бие бялдар, авьяас чадлын хувьд байгалиасаа төрчихсөн хүн. Уулаа, идлээ гэдгээс нь өөр санаа зовох зүйлгүй л байсан хүүхэд шүү дээ.

Энэ хүүхэд миний нутгийн хүүхэд. Сайн ярих юм бол садан төрлийн холбоотой юм. Энэ талаар мэдэхгүй байна. 14 настай над дээр ирж долоон жил манай сургуульд суралцсан. Улсын баяр наадамд 20 настай зургаа даваад дараа нь Улсын баяр наадамд түрүүлсэн хүн. Түүнээсээ хойш идлээ, уулаа гэдэг хэл аманд орох болсон. Үүнд нь санаа зовоод би утсаар “Хаана явна, бэлтгэл сургууль хийж байна уу”  зэргээр холбоотой байсан. Өдөр бүр бэлтгэл дээр нь очдоггүй.

Баяр наадмын өмнө нэг л удаа Сүүж ууланд бэлтгэлтэй байхад нь нэг очиж байсан. Олимпийн тэмцээнд ороход медальт байрт орсон тамирчдаас сэргээшийн шинжилгээ авдаг байсан. Харин 2003 оноос хуулийн дагуу шөвгийн 16-д үлдсэн бөхөөс сэргээшийн шинжилгээ авдаг болсон. 2006 он хүртэл наадамд шөвгөрч байсан учир шинжилгээг нь өгч байсан. 1980 оны ОУ-ын стандарт, орчин үеийн стандартад ч тэр хоёр төрлийн саванд шээлгээд таглаад лац ломбыг нь хийгээд авдаг байсан. 2007, 2008 оноос барилдахаа больсон учир одоо яаж авч байгааг нь мэдэхгүй байна. Үнэндээ санаанд орохгүй байна. Бие бялдар, авьяас чадлын хувьд байгалиасаа төрчихсөн хүн. Уулаа, идлээ гэдгээс нь өөр санаа зовох зүйлгүй л байсан хүүхэд шүү дээ” гэлээ.

С.Сүлд