УИХ-ын гишүүн асан Л.Гүндалай иргэдийн газрыг хүч хэрэглэн дээрэмдэж байгаа талаар “Монгол үндэсний хүний эрх иргэдийн хяналтын хороо” ТББ-аас мэдээлэл хийлээ.

Хан-Уул дүүргийн XI хорооны иргэн н.Лхагвасүрэн “Өнгөрсөн долдугаар сарын 30-ны шөнө манай гэрийн гадна хашааны гадна талд нүх ухсан байсан. Өглөө нь ажилдаа явсны дараа хашааг тойруулан 24 метр урт, 5 метрийн гүн ухсан байсан. Ингээд хашаа руу орох орц, гарцыг хааж инженерийн шугам сүлжээг ил гаргаж эхэлсэн. Үүнээс үүдэн хөрсний гулгалт болж дөрвөн талын ихэнх нь хашаа нурж унаж, улмаар манай газар руу дайрч эхэлсэн юм. Миний нүдэн дээр хүртэл улайм цайм ухаад зогсохгүй байсан. Арга яваад эксковаторынх нь урд очиж зогсоосон. Тэр нүхээр дамжин хүн орж гарахдаа үхчихвэл тэдэнд огт хамаагүй ийм л байдалтай байна.

Тиймээс уг асуудлаар Хан-Уул болон нийслэлийн Мэргэжлийн хяналтын газар, Төрийн гурван өндөрлөг, иргэдийг төлөөлөл боолх УИХ-ын гишүүдэд хандсан ч нааштай хариу ирсэнгүй. Тухайн барилгын компанийн залуу “Эгч ээ, энэ гэрээс та л гарч ороод байсан биз дээ. Яасан олон хүн гарч ороод байна аа” гэсэн” гэв.

Мөн тус дүүргийн иргэн н.Өндөр-Ээжийг эзэнгүй байх хооронд хашааг нь нурааж, талыг нь авч, гэрийг нь тойруулан нүх ухаж булаан авчээ. 

Гэрээ хамгаалсан нохойных нь хүртэл амийг нь хороожээ.

Тиймээс иргэдийн зүгээс газрын сүлжээний бизнес хийдэг УИХ-ын гишүүн асан Л.Гүндалайд холбогдох арга хэмжээ авч ажиллах, үүнд төр засгаас анхаарал хандуулахыг шаардаж байна. Түүнчлэн Ерөнхий сайдын нэрийг барин БОАЖ-ийн сайд Н.Цэрэнбатаас дархан цаазат газарт хамаарах долоон газрыг нэг өдрийн дотор авсан. Ингэхдээ бүх зөвшөөрөл нь иргэн Оюундалай, Одсүрэн гэж гардаг гэдгийн хэлж байна.

Б.Лхам