УИХ-ын чуулганаар Үндсэн хуулийн нэмэлт өөрчлөлт хэлэлцэж буйтай холбогдуулж нийгэмд эмзэглэл үүсээд буй. Тодруулбал, тус хуулийн нэмэлт өөрчлөлтийн төслийн шүүхтэй холбоотой хэсэгт хуульчид эсрэг байр суурьтай байгаа юм. Тиймдээ ч УИХ-ын гишүүдэд шаардлага хүргүүлэхээр санал нэгдсэн талаар "Монголын хуульчдын нийгэмлэг" төрийн бус байгууллагаас зохион байгуулсан тайван жагсаалын үеэр хуульчид хэлсэн юм.

Түүнчлэн “Хуульчид Үндсэн хуулийн нэмэлт, өөрчлөлтийн асуудлаар өнөөдөр жагсаж байна.

Бид хэн нэгэнд нөлөөллөх гээгүй.

Харин хуульч хүнийхээ хувьд эцэг хуульд санаа зовсондоо байр сууриа илэрхийлж байна. Хуульчид бид хараат бус шүүхийг Үндсэн хуулийн нэмэлт өөрчлөлтөөр улам бэхжүүлэх ёстой. Үндсэн хуулийн нэмэлт өөрчлөлтийн нэр бүхий 62 гишүүний анх санаачилсан есөн заалт байсан. Гэтэл шүүхтэй холбоотой чухал заалтууд хасагдсан байна. Шүүх засаг захиргааны нэгжээс тусдаа байх ёстой. Төрийн байгуулалтын байнгын хорооноос дэмжсэн гурван заалтыг Үндсэн хуульд тусгавал шүүхийг хараат бус, шударга болгоход чухам алхам болно" гэдгийг хуульчид онцолж байсан. Энэ талаар Монголын Хуульчдын холбооны ерөнхийлөгч Ж.Хунан “Одоогийн зохицуулалтаараа шүүхийн хараат бус байдал эрсдэлтэй байна. Учир нь шүүгчийн томилгоо болоод шүүгчийг сонгон шалгаруулах ШЕЗ, шүүхийн сахилгын хороо нэг хүнээс хамааралтай болох эрсдэлтэй боллоо.

Ийм тохиолдолд шүүгчийн хараат бус байдал зөрчигдөх эрсдэл өндөр. Үүнийг залруулах ёстой. Шүүхийн хараат бус байдлыг Үндсэн хуульдаа бэхжүүлж өгөх замаар шүүх эрх мэдлийн нэмэлт, өөрчлөлт хийх нь зүйтэй. Хараат бус шүүх ардчилсан иргэний нийгмийн гол тулгуур багана буюу хүний эрх чөлөө, шударга ёсны баталгаа юм шүү дээ. Тиймээс үүнийг улам бэхжүүлж, төгөлдөржүүлэхгүй бол бүх асуудал яг хэвээрээ байна" гэв. 

Г.Алимаа