УИХ-ын дарга Г.Занданшатар “Улсын Их Хурлын ээлжит бус чуулган товлон зарлах тухай 2019 оны 165 дугаар захирамжид нэмэлт, өөрчлөлт оруулах тухай” захирамж гаргажээ. Захирамжид “Монгол Улсын Их Хурлын даргын 2019 оны 7 дугаар сарын 04-ний өдрийн 165 дугаар захирамжийн 1 дэх хэсгийн “9 дүгээр сарын 01-ний өдрүүдэд” гэснийг “9 дүгээр сарын 30-ны өдрүүдэд” гэж өөрчилсүгэй” гэсэн байна.

Ээлжит чуулганы нэгдсэн хуралдааныг сунгасантай холбогдуулж хэд хэд асуудал хэлэлцэхээр төлөвлөсний дотор “Эрдэнэт үйлдвэр” төрийн өмчит үйлдвэрийн газар, “Монголросцветмет” төрийн өмчит үйлдвэрийн газарт тогтоосон онцгой дэглэмийн хугацааг сунгах тухай асуудал багтжээ.

УИХ-ын 2017 оны 23 дугаар тогтоол, Үндэсний Аюулгүй Байдлын зөвлөлийн Н05/05 тоот зөвлөмжийг хэрэгжүүлэх зорилгоор Монгол Улсын Засгийн газрын тухай хуулийн 30 дугаар зүйлийн 1 дэх хэсэг, Монгол Улсын Засгийн газарт эрх олгох тухай хуулийн 1,2 дугаар зүйлийг үндэслэн "Эрдэнэт үйлдвэр" ХХК, “Монголросцветмет” ХХК-д өнгөрсөн гуравдугаар сараас зургаан сарын хугацаанд онцгой дэглэм тогтоосон билээ.

Сүүлд ЗГХЭГ-ын дарга Л.Оюун-Эрдэнэ “Эрдэнэт” үйлдвэрийн онцгой дэглэмийг дахин зургаан сараар сунгахаар болсныг дуулгасан. Энэ тухай “Хэргийг зөвшилцлийн зарчмаар шийдвэрлэх ёстой гэж заасан. Уг зарчмаар шийдвэрлэх гэхээр шүүх дээр асуудал үүсээд байгаа. Иймд шүүхийн процессийг дуусах хүртэл холбогдох байнгын хороонд танилцуулж, нэг удаа зургаан сараар сунгах боломжтой. Өөрөөр хэлбэл, онцгой дэглэм үргэлжлэх нь эрх зүйн хувьд боломжтой” хэмээн мэдэгдэж байсан юм. Үүнтэй холбоотойгоор “Эрдэнэт” үйлдвэрт тогтоосон онцгой дэглэмийг сунгах эсэх асуудлыг ээлжит бус чуулганаар хэлэлцэх бололтой.

С.Сүлд