УИХ-ын ээлжит бус чуулганы нэгдсэн хуралдаанаар Монгол Улсын Үндсэн хуульд оруулах нэмэлт, өөрчлөлтийн төслийн хоёр дахь хэлэлцүүлэг болон бусад цаг үеийн асуудлаар УИХ-ын гишүүн Ж.Батзандан, Л.Болд нар мэдээлэл хийлээ.

Энэ үеэр УИХ-ын гишүүн Ж.Батзандан “Цөмийн хог хаягдлыг хадгалах, булшлахыг хориглосон гэж тухайн үед Ерөнхийлөгч байсан Ц.Элбэгдорж 2011 онд мэдэгдэж байсан. Харамсалтай нь, тус онд Ерөнхийлөгчийн гаргасан нэг ч тийм зарлиг алга. Өөрөөр хэлбэл, Ц.Элбэгдорж гуай тухайн үед зарлиг гагахдаа сонгуулийн зорилгоор, ард түмний эсэргүүцлийг намжаах зорилгоор ийм худал мэдээлэл гаргасан байна.

2011 оны 9-р сарын 7. Уран, газрын ховор элемент, эрчим хүчний үйлдвэртэй холбогдсон Ерөнхийлөгчийн зарлиг.

Үндэсний эрх ашиг, эдийн засгийн аюулгүй байдалд нөлөө үзүүлэх уран, газрын ховор элементийн асуудлаар шийдвэр гаргахын өмнө Үндэсний аюулгүй байдлын зөвлөл хуралдаж хэлэлцэнэ гэсэн зарлиг байна. Өөрөөр хэлбэл, шийдвэр гаргаж болно гэсэн үг.

Хоёр дахь зарлиг нь мөн л биднийг хуурсан. Монгол Улсын нутаг дэвсгэр дээр цөмийн хаягдлыг хадгалах, түр байршуулах, булшлах зорилгоор импортлох, хил дамжуулан тээвэрлэх үйл ажиллагаа явуулахыг хориглосон Монгол Улсын хууль тогтоомжийг тууштай мөрдөж ажиллана гэсэн зарлиг. Гэтэл өнөөдрийг хүртэл Монгол Улсад цөмийн хог хаягдлыг импортлох, булшлахыг хориглосон нэг ч хууль байхгүй байна. Цөмийн хог хаягдлыг булшлахыг хориглочихсон мэтээр монголчуудад хуурамч мэдээлэл өгч, УИХ-аар хууль гаргаж батлах гэж байхад нь зогсоосон гэж бид харж байна гэлээ.

Ийм учраас дээрх заалтыг Үндсэн хуульд оруулах саналыг ҮАБЗ, УИХ-ын дарга, Ажлын хэсэгт хүргүүлж байгаа юм байна.

Харин УИХ- ын гишүүн Л.Болд "Бид Үндсэн хуульд оруулж байгаа гол өөрчлөлтүүдээр санал асуулга өрнүүлж байна. Нийт 6467 хүнээс санал авсан. Санал асуулгад оролцсон иргэдийн 85 хувь нь стратегийн орд газрын 51-ээс дээш хувийг ард иргэдэд өмчлүүлэх хэлбэрийг дэмжсэн. Хоёрдугаарт, парламентын гишүүдийн тоо, бүрэн эрхийн хугацаатай холбоотой асуудалл "шаардлагагүй" гэдэг саналд 81 хувь, харин 99 гишүүн, таван жилийгн хугацааг 9.8 хувь нь дэмжиж, 108 гишүүн ба таван жилийн хугацаа гэснийг 8.8 хувь нь дэмжсэн" гэлээ. 

Г.Алимаа