Монгол Улсын Ерөнхийлөгч Х.Баттулгын урилгаар ОХУ-ын Төрийн тэргүүн В.В.Путин өчигдөр үдэш Улаанбаатар хотноо газардлаа. Тэрбээр замаараа Эрхүү мужид ажиллаж бүтээн байгуулалтын ажил шалгасан учраас 23.00 цагт Улаанбаатар хотноо тусгай үүргийн онгоцоор газардсан юм.

Түүнийг Гадаад харилцааны сайд Д.Цогтбаатар тэргүүтэй албаны хүмүүс хүндэт харуул зогсоон тосч авлаа. Түүнийг албан ёсоор угтах ёслол өнөөдөр 13.00 цагт Жанжин Д.Сүхбаатарын талбайд болох бөгөөд Монгол Улсын Ерөнхийлөгч Х.Баттулга угтан авна. Ингээд түүний нэг өдрийн айлчлалын хөтөлбөрийг хүргэе.

13.00 цагт Монгол Улсын Ерөнхийлөгч Х.Баттулга, Оросын Холбооны Улсын Ерөнхийлөгч В.В.Путиныг албан ёсоор угтах ёслол болно

13.10 цагт Оросын Холбооны Улсын Ерөнхийлөгч В.В.Путин Хүндэт зочны дэвтэрт гарын үсэг зурна /Төрийн ордны “Баганат” танхимд/

13.12 цагт Төрийн тэргүүн нар дурсгалын гэрэл зураг авахуулна /”Баганат” танхимд/

13.15 цагт Монгол Улсын Ерөнхийлөгч Х.Баттулга, Оросын Холбооны Улсын Ерөнхийлөгч В.В.Путин нар уулзана /Ёслол, хүндэтгэлийн гэр өргөөнд/

13.55 цагт  Уулзалт өндөрлөнө

14.00 цагт Монгол Улсын Ерөнхийлөгч Х.Баттулга, Оросын Холбооны Улсын Ерөнхийлөгч В.В.Путин нар албан ёсны хэлэлцээ хийнэ

14.55 цагт Албан ёсны хэлэлцээ өндөрлөнө

15.00 цагт  Монгол Улсын Ерөнхийлөгч Х.Баттулга, Оросын Холбооны Улсын Ерөнхийлөгч В.В.Путин нар Монгол, Оросын харилцаа, хамтын ажиллагааны баримт бичигт гарын үсэг зурах ёслолд оролцоно /Төрийн ордны Ёслол, хүндэтгэлийн их танхимд/

15.15 цагт Монгол Улсын Ерөнхийлөгч Х.Баттулга, Оросын Холбооны Улсын Ерөнхийлөгч В.В.Путин нар хэвлэл, мэдээллийн төлөөлөгчдөд мэдээлэл хийнэ /Төрийн ордны Ёслол, хүндэтгэлийн их танхимд/

15.30 цагт  Оросын Холбооны Улсын Ерөнхийлөгч В.В.Путинд Монгол Улсын Их Хурлын дарга Г.Занданшатар бараалхана /Төрийн ордон, Ёслол хүндэтгэлийн “А” танхим /

16.00 цагт Оросын Холбооны Улсын Ерөнхийлөгч В.В.Путинд Монгол Улсын Ерөнхий сайд У.Хүрэлсүх бараалхана /Төрийн ордон, Ёслол хүндэтгэлийн “А” танхим /

16.30 цагт Г.К.Жуковын хөшөө рүү хөдөлнө

16.40 цагт  Монгол Улсын Ерөнхийлөгч Х.Баттулга, Оросын Холбооны Улсын Ерөнхийлөгч В.В.Путин нар ЗХУ-ын баатар, маршал Г.К.Жуковын хөшөөнд цэцэг өргөнө

17.00 цагт Г.К.Жуковын хөшөөнөөс “Их тэнгэр” цогцолбор руу хөдөлнө

17.20 цагт Монгол Улсын Ерөнхийлөгч Х.Баттулга, Оросын Холбооны Улсын Ерөнхийлөгч В.В.Путин нар Халх голын байлдааны ялалтын 80 жилийн ойн хүндэтгэлийн дайллагад оролцоно /”Их тэнгэр” цогцолбор, “Хан-Уул” Харшид/

19.00 цагт Оросын Холбооны Улсын Ерөнхийлөгч В.В.Путин Буянт-Ухаа дахь “Чингис хаан” олон улсын нисэх буудал руу хөдөлнө

19.15 цагт Оросын Холбооны Улсын Ерөнхийлөгч В.В.Путин Буянт-Ухаа дахь “Чингис хаан” олон улсын нисэх буудлаас онцгой үүргийн нислэгээр мордоно.

Г.Алимаа