Яг энэ цаг дорд улс төрд халуун үйл явдлаар дүүрэн байгаа бол үүнийг дагаад сошиал орчин тэр дундаа твиттерт хөл, толгой нь олдохгүй үйл явдал өрнөж байна. Учрыг толидвоос, Монгол Улсын Ерөнхийлөгч Х.Баттулгын урилгаар ОХУ-ын Ерөнхийлөгч В.В.Путин энэ өдрүүдэд манай улсад айлчлал хийж байгаатай холбогдуулан амнаасаа нэг ч муу үг унагаж болохгүй гэсэн дүрэм сошиалд өрнөж буй бололтой.

Үүнийг баталсан гэмээр ч юм уу, нэг зүйл нь твиттерт идэвхтэй жиргэдэг хэсэг бүлэг нөхдийг тагнуулын албаныхан гэх тусгай албаны нөхөд дарамталсан гэх яриа гараад байна. Жишээлбэл, жиргээчин "Ганбат Гонгоржав" нэрээр жиргэгчийг гэртээ эзгүй байх хойгуур нь гэрт нь тагнуулын гэх хоёр нөхөр очжээ. Тэднийг нь хонх дарах үеэр хаалга онгойлгосон охиноос нь аавыг нь асуугаад “Путин буюу ОХУ-ын эсрэг сөрөг юм бичсэн. Утасных нь дугаарыг өг. Хариуцлага тооцно” гэж хэлжээ. Энэ тухайг охиноосоо мэдсэн жиргээчин энэ тухайг сошиалд бичиж, бөөн дуулиан тариад байна. Түүний эл жиргээг оруулсны дараа цөөнгүй хүн рүү тагнуулын гэх хүмүүс залгасан, дарамталсан гэдгийг мөн л бичжээ.

Эндээс үзвэл, хэрэв зээ жиргээчдийн хэлсэн, бичсэн нь үнэн бол хөрш улсын Төрийн тэргүүний айлчлалын дор иргэдийнхээ амыг таглаж, гарыг нь хүлээд байвал ардчилсан нийгэм болно гэж үү.

Нөгөөтэйгүүр, нэр бүхий хуульчдаас ийм тохиолдолд ямар арга хэмжээ авах, хуулийн хүрээнд ямар гаргалгаа бийг цөөнгүй иргэд асууж сурагласан тухай мэдээлэл байна. Тиймээс л жиргээнд идэвхтэй байдаг гишүүд нийгмийг талцуулах гэж ташаа мэдээлэл оруулаагүй байгаасай, тагнуулынхан ч гэсэн иргэдийн үзэл бодлоо чөлөөтэй илэрхийлэх эрхэнд нь халдаагүй байгаасай.

Г.Эрдэнэ