Ерөнхийлөгч Х.Баттулга 2019 оны есдүгээр сарын 4-5-ны өдрүүдэд ОХУ-ын Владивосток хотноо болох Дорнын эдийн засгийн V чуулга уулзалтад оролцохоор болжээ. Тэрбээр өнөөдөр эх орноосоо ОХУ-ыг зорих юм.

ОХУ-ын Ерөнхийлөгч В.В.Путины санаачилгаар тав дахь жилдээ зохион байгуулагдаж буй энэ удаагийн чуулга уулзалтад оролцох үеэрээ Ерөнхийлөгч Х.Баттулга Төрийн тэргүүн, Ерөнхий сайд нарын тэргүүлэх нэгдсэн хуралдаанд оролцож, зарим улсын төр, засгийн тэргүүдтэй хоёр талт уулзалт хийхээр төлөвлөж байна.

Ташрамд дурдахад Ерөнхийлөгч Х.Баттулгын урилгаар ОХУ-ын Төрийн тэргүүн В.В.Путин Монголд айлчилж хэд хэдэн хэлэлцээрт гарын үсэг зурсан билээ. Эндээс хамгийн онцлох нь Халхын голын байлдааны ялалтын 80 жилийн ойн хүрээнд хүрэлцэн ирсэн ОХУ-ын Ерөнхийлөгч Монгол Улстай хугацаагүй Иж бүрэн стратегийн түншлэлийн гэрээ байгуулсан билээ.

Мөн тэрбээр Монгол, ОХУ-ын хувь нийлүүлсэн "УБТЗ" нийгэмлэг болон бусад асуудлаар хоёр улсын Ерөнхийлөгч нар ганцаарчилсан уулзалтынхаа үеэр тохиролцсоныг холбогдох албаныхан гарын үсэг зурснаар баталгаажсан юм.

С.Сүлд