УИХ-ын чуулганы нэгдсэн хуралдаанаар Үндсэн хуульд нэмэлт, өөрчлөлт оруулах төслийн хоёр дах хэлэлцүүлгийг үргэлжүүлэн хэлэлцэж байна. Энэ хүрээнд зарчмын зөрүүтэй саналаар санал хураалт явуулж байгаа юм. Тухайлбал, Төрийн албатай холбоотой 23.1 дэх заалт буюу "Төрийн жинхэнэ албан хаагчийг хуульд зааснаас бусад үндэслэлээр ажлаас халахыг хориглоно" гэснийг хэлэлцэх үеэр МАН-ын бүлэг завсарлага авсан юм. Үүний дараа Н.Учрал гишүүний гаргасан төслийн  "Төрийн алба шатлан дэвших зарчмаар явах" гэсэн заалт дахь "шатлан дэвших" гэсэн үгийг хасах горимын саналаар хэлэлцүүлэг үргэлжилсэн юм. Энэ үеэр Нийгмийн хамгаалал, хөдөлмөрийн сайд С.Чинзориг “Төрийн захиргааны жинхэнэ албан хаагчид тодорхой хэмжээгээр тангараг өргөж, үндсэн зарим эрхээ хязгаарлуулаад явдаг. Тиймээс шатлан дэвшүүлэх заалт байх хэрэгтэй. Төр хүндэтгэлтэй хандах ёстой. Төрийн алба мэргэшсэн, тогтвортой, ёс зүйтэй байна гэдгийг шатлан дэвших гэдгээр нь тодорхойлж байгаа. Сүүлийн олон жил улс төрийн сонгуулийн дараагаар улс төрийн албан тушаалтнуудыг сонгуульд нь дагаж давхисан хүмүүс нэг өдөр яам тамгын газарт, хэлтсийн дарга, Төрийн нарийн болоод суучихдаг. Үүнээс бол төрийн алба тогтвортой байх зарчим алдагдаж, насаараа төрийн албанд ажилласан ажиллагсдад итгэл, урам төрөхгүй байгаа. Үүнээс болоод төрийн нэр хүнд унаж байгаа. Тиймээс гишүүд "шатлан дэвших" гэдгийг хасч болохгүй” гэсэн саналыг хэлсэн юм.

Мөн Д.Хаянхярваа гишүүн “Төрийн албаны чадавхи муудаж байгаа нь хүндээ, хуулиндаа ч биш, улс төрийн намд байгаа. Төрийн албан хаагчийг халдаг, сольдог зүйл хэрээс хэтэрсэн. Төрийн албан хаагчдын итгэл урам унтарсан. Тэр хүмүүсийн буруу биш. Улс төрийн нам, улстөрчдийн буруу үйл ажиллагаанаас болсон. Төрийн албаны халаа сэлгээ яаж явж байна. Энд сууж байгаа 64-ын бүлгийнхэн бид ч өнөөдөр халаа сэлгээгээ үргэлжлүүлж байгаа. Ямар нэг аргаар төрийн албан хаагчийг халж, өөрийн хүнээр сэлгэдэг” гэлээ.

Харин горимын зөрүүтэй санал гаргасан Н.Учрал гишүүн “Мэрит гэдэг үгийг орчуулахдаа манай шатлан дэвших, чадахуйн зарчим гэж уянгын халилтай орчуулсан. Энэ үгийг хийж өгснөөр олон мянган залуучуудын боломжийг хааж байгаа юм. Одоо Үндсэн хуульд оруулах гэж байна. Энэ бол ур чадварын шалгуураар нь ажилд томилдог байх ёстой. Ажлын гүйцэтгэлийн чадвараар цалинг тогтоодог. Гэтэл 30 жил ажиллачихаад оймсонд мөнгөө хийдэг болтлоо төрийн алба ялзарсан. Юунд нь найдах вэ. Өндөр боловсрол эзэмшээд ирж байгаа залуусыг туршлагагүй гээд явуулчихдаг. Төрийн албанд салхи оруулах хэрэгтэй. Төрийн албаныхан уучлаарай, та нарын дунд салхи оруулах цаг нь ирсэн. Залуучуудыг оруулах цаг болсон. Би үүнийг байнга шүүмжилж байгаа. Энэ бол миний үг. Та нарт таалагдах эсэх нь та нарын асуудал” гэв.

Ийнхүү уг хуулийн төсөл дэх "Төрийн албан  шатлан дэвших зарчмаар явагдах" гэх заалтаас "шатлан дэвших гэдэг үгийг хасах Н.Учрал гишүүний саналаар санал хураалт явуулсан ч олонхи дэмжсэнгүй. Чуулганы нэгдсэн хуралдаан үргэлжилж байна.

С.Сүлд