Нүүрсний салбарын худалдаа хөрөнгө оруулалтын олон улсын "Coal Mongolia-2019" чуулга уулзалт "Өрсөлдөөнд манлайлъя" уриатайгаар ес дэх жилдээ зохиогдож байна. Энэхүү чуулга уулзалтын үеэр УУХҮ-ийн сайд Д.Сумъяабазар “Уул уурхай, тэр дундаа нүүрсний салбар гэдэг бүс нутгийн хамтын ажиллагааны үндсэн дээр үнэ цэн, өртөг бий болдог. Нүүрсний салбар өөрөө массын үйлдвэр. Хэдэн зуун галт тэрэг, машин урагшаа болон зүүн тийшээ явж байж манай татварын орлогыг нэмж, төсвийг бүрдүүлж, ажлын байрыг нэмэгдүүлдэг ач холбогдолтой. Ийм л онцгой салбар. Төсвийн орлогын 40 орчим хувийг дангаараа бүрдүүлж байна. Экспортын орлогод ч чухал үүрэг гүйцэтгэдэг учраас төрөөс, Засгийн газраас онцгой анхаарч байна. 

Тавантолгойгоос бусад чиглэлийн төмөр зам барих бүх шийдвэр гарсан. Гашуунсухайтын чиглэлийн төмөр замын ажил энэ сарын 17-ны өдөр эхэлнэ. Хоёр жилийн хугацаанд барьж дуусгана.

Зүүнбаян чиглэлийн хатуу хучилттай замын ажлыг аравдугаар сарын 1-ээс эхэлнэ. Мөн л хоёр жилийн хугацаанд ашиглалтад оруулах төлөвлөгөөтэй байна. Бидэнд бүрэн боломж бий. Санхүүгийн маш олон боломж, бололцоо байгаа. Зүүнбаян чиглэлийн төмөр замыг 1.3 тэрбум ам.доллараар барих тооцоо гаргасан. 

Дотоодын аж ахуйн нэгж, ЗХЖШ-ын ажиллах хүчийг ажилд оролцуулбал ТЭЗҮ-гийн эхний үнэ багасна. Бид хэмнэх газраа хэмнэж, зарцуулах ёстой газраа зарцуулах байдлаар зардлаа багасгаж, төмөр замаа барих ёстой” гэлээ.