Н.Оюундарийг монголчууд мэднэ ээ. Ялангуяа Сэлэнгэчүүд. ЖДҮ-ээс зээл авсан гэдгээр нь. Оффшор, Оюу Толгойтой асуудал нь хойш татдаг болохоос улс төрд босоо явсан, явсаар ч байгаа тэрбээр Сангийн сайд асан С.Баярцогтыг далаар нь цэвэр “тавьсан” байдаг юм, тэр сонгуулиар. Наваан-Юндэн хэмээх өвөөг нь түүхчид илүү танина. Энэ тухай “Чингис хааны язгуурт, Абатай сайн хааны алтан ураг “Хараагийн баатар ван Насан-Очирын Наваан-Юндэн (1908-1985) 1908 онд Сэлэнгэ аймгийн Мандал сумын нутагт Насан-Очирын хүү болон мэндэлжээ. Хараагийн баатар ван, Насан-Очирын Наваан-Юндэн нь 1985 он хүртэл монгол хаадын угсааны хамгийн сүүлд амьд сэрүүн үлдсэн ноён гаралтай, Сайн ноён хан Намнансүрэн, Хичээнгүй сайд Цэрэндоржийн гарын шавь, Ардын хувьсгалын нууц 2 бүлгэмийн 13 гишүүний нэгэн, 13 настай партизан, Ардын намын тамгыг сийлэлцсэн, Ардын намын тусламж бичгийн амьд гэрч, Монголын орчин цагийн уран зохиолыг үүсгэгчдийн нэг, боловсрол соёлын үрийг таригч, 1926 оноос Германд сурсан анхны 35 оюутны нэг, ард түмний дунд ардын дуу мэт түгсэн Баянмонгол, Соёл-Эрдэнэ, Үхэрчин хүү Цэрэндорж зэрэг дуу, зохиолын эзэн, Б.Ринченгийн хамт шоронд 12 жил сууж, хайрт хань, төрсөн дүүгээ алдаж хэлмэгдлийн зовлонг биеэрээ амссан эсэргүү нэрт, дэлхийн сонгодог зохиолоос дуун хөрвүүлэгч, монгол хэлний товч тайлбар толь, орос монгол толийг зохиоход гар бие оролцогч, хэл шинжээч , эмч, хожмоо орос, герман, манж, түвд хэлний боловсролтой , сурган хүмүүжүүлэгч, төрийн алтан аргамж баригч, төрийн түшээ, түүхч, зохиолч болоод монгол түмний сор болсон сэхээтэн, ардын дуунд мөнхөрсөн Юндэн Гөөгөө шиг сайхан эр юм” хэмээн тодотгожээ.
Нэг үгээр хэлбэл, түүний өвөө Чингис хааны язгуурт, Абатай сайн хааны алтан ураг Хараагийн баатар ван, Насан-Очирын Наваан-Юндэн нь 1985 он хүртэл монгол хаадын угсааны хамгийн сүүлд амьд сэрүүн үлдсэн ноён гаралтай соён гэгээрүүлэгч байжээ. Харин дүү нь Монгол Улсаас Тайландад суух Элчин сайдад нэр дэвшээд буй Н.Чимгүүндарь байлаа. Гэхдээ энд зөвхөн өвөөгийнх нь тухай дурдахгүй, эрхэм гишүүний өөрийнх нь талаар бичих гэсэн юм.
УИХ-ын гишүүн Н.Оюундарь нь ажлын гараагаа Монголын үндэсний бүтээмжийн төвөөс 1995 онд эхэлж олон улсын төсөл хөтөлбөрт ажиллаж байгаад тэрбээр 2000 онд Байгаль орчны яамны хамтын ажиллагааны хэлтсийн дарга болж дэвшжээ. Улс төрд өөрийн “мэдэлгүй” орсон Н.Оюундарь гишүүн 2008-2014 онд НИТХ-ын төлөөлөгчөөр ажиллаж байгаад 2014 оны арванхоёрдугаар сараас 2015 оны наймдугаар сар хүртэл Гадаад хэргийн дэд сайдаар ажиллаж, улмаар УИХ-ын гишүүнээр сонгогдсон байдаг. Өдгөө тэрбээр УИХ-ын Хүний эрхийн дэд хорооны дарга гэсэн давхар албан тушаалтай. Энэ хүрээнд НҮБ-ын болон олон улсын хурал, зөвлөгөөнд оролцож, Монгол Улсаа төлөөлж иржээ.
Тэрбээр энэ парламентын гишүүдээс гэр бүлийн орлогоороо тэргүүлдэг нэгэн. Түүний гэр бүлийн нийт орлого нь жилдээ хоёр орчим тэрбумаар хэмжигддэг. Ийн тодотгох болсон нь хөрөнгө орлогын мэдүүлэгтээ орлогоо тэрбум 843 сая 822 мянган төгрөг хүрсэн тухай Авлигатай тэмцэх газарт өгчээ. Мөн 350 саяар үнэлэгдэх гурван орон сууцтай, 830 саяар үнэлэгдэх үнэт эдлэлтэй, 216 сая төгрөгийн хадгаламжтай гэж тусгажээ. Өдгөө түүний мэдэлд “Бльюмо”’, “Шөлөндөө”, “Ньюбулл”, “Сура хаус”, “Цэ энд Цэ”, “Нью Мохито”, “Бльюмон Пропертийс”, “Риаж”, “Нарны эрхэс”, “Бльюмон Катеринг”, “Монгол шар Айраг Брювери”, “Түрэлт”, “Петротранс Топ”, “Петротранс Дорнод”, “Петротранс”, ‘Эрдэнэс Таван толгой”, “Боб фрэндс” гээд компаниуд хөвөрч байна. Эрхэм гишүүн энэ бүгдийн 30-100 хувийг эзэмшдэг хэмээн АТГ-д мэдүүлжээ. Мэдүүлэх ёстой ч юм.
Гол нь тэрбээр ЖДҮ буюу бусдын боломжийг "хулгайлсан" атлаа "П.Сэргэлэн сайдын үед шалгуурыг нь хангаад, манай хүүгийн компани зээл авахаар болсон. Тухайн үедээ төсөв хүрэлцэхгүй байсан учраас авч чадаагүй. Тэр нь 2016 он байсан байх аа. Б.Батзориг сайдын үед авсан. Би зээл авахад нөлөөлөөлгүй. Надаас ЖДҮ-ийг дэмжих сангийн зээл гэж бага хүүтэй зээл байдаг юм байна. Энэ зээлийн хөтөлбөрт хамрагдая гэж асууж байсан. Бүх шалгуурыг нь хангаад, ном журмынх нь дагуу л авсан. ЖДҮ-ийг дэмжих сан байна уу, бусад зээлд мэдээлэл сайтай хүн л хамрагдах магадлал өндөртэй байдаг.
Миний хүү Сэлэнгэ аймагт фермерийн аж ахуй байгуулахаар зээл авсан. Сэлэнгийн ард иргэдтэй хамтраад ажиллаж байгаа. Ийм л жижиг бизнес эрхлэхээр зээл авсан. Зээлийн төлөлт нь тэр аж ахуйн нэгжийн л асуудал" гэсэн хариулт өгөөд суусан цаг саяхан.
Тэгвэл УИХ-ын гишүүн Н.Оюундарийн хүүгийн гээд байгаа “Red star club” гэдэг компани ЖДҮ-ийг дэмжих сангаас зээл авчээ. Тодруулбал, бүр 950 сая төгрөгийн зээл авсан гэх мэдээлэл цацагдсан. Энэ нь ч үнэн болох нь ч эхнээсээ батлагдсан.
Гэтэл хүүгийн бизнес гэж нэрлээд бултсан “Red star club” гэдэг компанийн 20 хувийг эзэмшдэг болохоо эрхэм гишүүн маань 2017 онд АТГ-д мэдүүлж байжээ. Дийлэнх хувьцаа эзэмшигч юм чинь Н.Оюундарь гишүүний л өмч байлтай. Гэтэл "хүүгийнх" гэж бултуулах нь муухай биш гэж үү. Тиймээс хааны удамтай хүн гээд харцын боломжийг “хулгайлах” нь зөв гэж үү, эрхэм гишүүн ээ?
Г.Сөрөлт
Сэтгэгдэл (24)