АТГ-ын дэргэдэх Олон нийтийн зөвлөлийн гишүүд өнгөрсөн наймдугаар сард зарим аймгуудад ажилласан үр дүнгийнхээ талаар мэдээлэл хийлээ. Тодруулбал, аймгуудад ажилласан шалтгаан нь Зүүн Европ, Төв Азийн авлигын эсрэг сүлжээнээс манай улсад хийсэн судалгаагаар Монгол Улсыг авлигад идэгдсэн гэсэн хариу гарсантай холбоотой юм байна. Тиймээс зарим аймгуудад ажиллаж авлигын эх үндэс иргэдийн амьдралд болоод төрийн байгууллагын үйл ажиллагаанд хэрхэн нөлөөлж байгаа талаар бодит байдалтай танилцжээ. Энэ талаар АТГ-ын дэргэдэх Олон нийтийн зөвлөлийн дарга Г.Баасан "Хэнтий, Сүхбаатар, Дорноговь, Говьсүмбэр аймаг болон Цэнхэрмандал, Жаргалтхаан, Дарьганга, Замын-Үүд, Айраг, Шивээговь сумдад ажилласан. Түүврийн аргаар 640 иргэнийг судалгаанд оролцуулсан байна. Орон нутгийн Хөгжүүлэх сан, Сум хөгжүүлэх сангаас зээлээр хэрэгжиж буй ЖДҮ-ийн 11 нэгжийн үйл ажиллагаатай танилцсан. Судалгаагаар 91,4 хувь нь төсвөө мэдэхгүй, 96,9 хувь нь Орон нутгийн Хөгжүүлэх сан болон Сум хөгжүүлэх сангийн төсөв, зээл олголт буцаалтын талаар мэдэхгүй гэсэн хариу гарсан. Мөн авлигаас урьдчилаан сэргийлэх сургалт явагдаагүй, иргэдийн олонх нь авлигыг мэдээллэх утас байдгийг мэдэхгүй, эмнэлэг, ЗДТГ, Хууль хүчний байгууллага хүнд суртал чирэгдэл ихтэй байгаа талаар хэлсэн" гэлээ. 

Мөн “Төрийн албаны тогтолцоо данхар болсон байна. Татвар, Нийгмийн даатгал, халамж, Газар, бүртэл, байгаль хамгаалах зэрэг салбар нь босоо тогтолцоотой. Орон нутагт огт захирагддаггүй ийм албад хэт үрэлгэн байна. 

Тиймээс дор бүрнээ хяналттай байж, төсөв хөрөнгөтэй холбоотой мэдээллийг иргэдэд нээлттэй байлгаж, АТГ-ын мэдээлэл хүлээн авах утсыг нийтийн нүдэнд байрлуулах зэрэг ажлыг  улсын хэмжээнд шуурхай явуулахыг Засгийн газраас үүрэг болгох хэрэгтэй байна. Тэр дундаа авлигатай тэмцэхэд Засгийн газрын үүрэг их шүү” гэв.