Цагтаа гаалийн байгууллагыг толгойлж, ёстой л мандан бадарч явах үедээ авлига хээл хахуулийн хэрэгт унасан хүн бол гаалийн гэх тодотголтой Х.Баатар. Түүнд холбогдох хэргийг хууль хяналтынхан шалгаад улсад 4 тэрбум 376 сая төгрөгийн хохирол учруулсан, авлига авч, өгсөн болохыг тогтоож, шүүхээс найман жилийн ял оноосон юм. Авлигийн хэрэгт жишиг болохуйц ял оноолоо гэж иргэд талархан хүлээж авсан ч гурван жилийг нь биеэр эдлээд суллагдсан нь тэрбумыг идсэн ч толгойг нь илдгийн тод жишээ болсон.

Улс төрд нөлөө бүхий явсан эрхмүүдэд шоронгоос захидал илгээж дуулиан тарьж явсан тэрбээр суллагдсаныхаа дараа хэсэгтээ чимээгүй бүгсний эцэст Хөдөө аж ахуйн биржийг толгойлох болсноороо төрийн албанд эргэн ирснээ зарлав.

Гэхдээ энэ удаа түүний өнгөрсөн амьдралыг бус харин эрхэлж буй албан тушаал, толгойлж буй байгууллагатай холбоотой нэгэн хэргийг сөхөх гэсэн юм.

Учрыг тодруулбал, Хөдөө аж ахуйн бирж бол төсөв хөрөнгөөрөө томоохонд тооцогддог байгууллага. Бүр нарийн тодруулбал, 49 хувийг нь Монголын төр, 49 хувийг хятадын хөрөнгө оруулалттай таван компани, хоёр хувийг нь 30 гаруй иргэн эзэмшдэг юм байна. “Гааль”-ийн Х.Баатар тус байгууллагыг удирдах болсноор Хөдөө аж ахуйн биржид өөрчлөлт, шинэчлэлт авчирсныг үгүйсгэхгүй ээ. Гэвч тэрбумаар хэмжигдэх хэрэгт хутгалдаж, хэрэг эцэслэн шийдэгдэлгүй өнөөг хүрсний урхагаар гаднын хөрөнгө оруулагчдыг үргээх бас нэг шалтгаан болоод буй бололтой.

Тодруулбал, “Алъянс индустриал групп” ХХК болон “Глобал инвестмент фонд” ХХК, “Алъянс финанс групп” ББСБ, “Эй эф жи капитал менежмент” ХХК, “Алъянс финанс холдинг” ХХК нь “Хөдөө аж ахуйн бирж” ХХК-иас “Хувьцаа худалдах, худалдан авах гэрээ” цуцалсны улмаас гэрээний урьдчилгаа төлбөрт төлсөн нийт 1,059.000.000 төгрөг, учирсан хохиролд 112,008.600 төгрөгийг нэхэмжилсэн байна. Шүүхээс нэхэмжлэгчийн талд шийдвэр гаргасан ч эцэстээ дээрх нэр бүхий компаниуд 480 сая төгрөгийн гэрээ байгуулахыг зөвшөөрчээ. Ингээд 2018 долдугаар сарын 2-ны өдөр гэрээ байгуулсан байдаг.

Гэрээ байгуулсны дагуу Хөдөө аж ахуйн бирж 480 сая төгрөгийг “Алъянс индустриал групп” ХХК болон “Глобал инвестмент фонд” ХХК, “Алъянс финанс групп” ББСБ, “Эй эф жи капитал менежмент” ХХК, “Алъянс финанс холдинг” ХХК-д олгохоор болсон байна.

Гэтэл яагаад ч юм бэ, энэ мөнгө хувь хүний данс руу орсон хачирхалтай явдал болсон байна. Хамгийн гол нь хувь хүний данс руу орсон гэдгийг, тэгэхдээ гэрээ байгуулснаас хойш хэдхэн хоногийн дараа ийм шилжүүлэг хийсэн гэдгийг дээрх нэр бүхий компанийн удирдлагууд олон сарын дараа мэджээ.

Учир юу гэвээс, дээрх эвлэрлийн гэрээ байгуулсны дараа нэр бүхий компаниудыг шүүхэд төлөөлсөн өмгөөлөгч С.Баяраа нь “Хөдөө аж ахуйн бирж”-ийн гүйцэтгэх захирал Х.Баатарт бичгээр хүсэлт гаргажээ.

Үүнд, Сүхбаатар дүүргийн Иргэний хэргийн анхан шатны шүүхийн шүүгчийн 2018 оны 07 дугаар сарын 07-ны өдрийн ......... дугаартай захирамжийн дагуу 480 сая төгрөгийг Эвлэрлийн гэрээнд заасан дансанд шилжүүлж өгнө үү. Хүсэлт гаргасан: нэхэмжлэгч талын итгэмжлэгдсэн төлөөлөгч С.Баярмаа” гэжээ.

Уг хүсэлтийг Х.Баатар захирал дор нь цохож, ерөнхий нягтлан бодогчдоо мөнгө шилжүүлэхиийг даалгасан байдаг. Ингээд мөнгө шилжсэн байна.

Энэ хугацаанд компаниуд мөнгө шилжихгүй байгааг гайхширсаар гурван сарын нүүр үзсэн байна. Эцэстээ Хөдөө аж ахуйн биржээс тодруулахад “Ийм данс руу аль хэдийнэ шилжүүлсэн” гэж баримт үзүүлсэн байгаа юм. Үүнийг нь үзсэн компанийн төлөөлөл гайхах нь дамжиггүй. Учир нь өмгөөлөгч С.Баярмаа нь зөвхөн шүүхэд төлөөлөх итгэмжлэлтэй байснаас бус санхүүгийн ямар нэг итгэмжлэлгүй байж. Үүнийг нь Хөдөө аж ахуйн биржийн гүйцэтгэх захирал Х.Баатар нягталж, шалгаагүйдээ юу эс бөгөөс үгсэн хуйвалдсан ч юм уу. Алийг нь мэдэхгүй. Ямартай ч өмгөөлөгч С.Баярмаагийн өмгөөллийн фермийн нягтлан бодогчийн хувийн данс руу шилжүүлжээ. Ингээд хувийн компаниуд арилжаанд оролцохоор тушаасан мөнгөө буцааж авч чадалгүй бизнесийн салбараар гарсан байна. Тэд өнөөдрийг хүртэл хууль хяналтын байгууллагын үүдийг сахиж сууна. Угтаа бол ашиг олж, бизнесээ өргөтгөнө гэж найдан биржид хөрөнгө оруулсан. Гэвч эцэстээ модоо барив. Ийм л хэрэгт Хөдөө аж ахуйн бирж хутгалдчихаад байна. 

Тиймээс “Гааль”-ийн Х.Баатар буюу Хөдөө аж ахуйн биржийн гүйцэтгэх захирал Х.Баатар өөрөө тайлбар хийх биз ээ.

Г.Нацаг