Морин дэл дээр хийсч дэлхийг эзэгнэх амархан ч мориноос буугаад дэлхийг захирах амаргүй гэсэн мэргэн үгийг одоогийн Ерөнхий сайдад сануулах цаг ирсэн бололтой. Учир нь өнгөрсөн үеийг сөхөж үзвээс, энэ цагийн эрх баригчид хамгийн “эх орончид”, шударга, чанга гартнуудаар тодрох байх. Гэвч дээр хэлсэнчлэн юм бүхнийг хүчээр барих бус харин ч арга эвээр буюу мэдлэг боловсрол, нарийн боловсруулсан бодлого, төлөвлөгөөгөөр зангидаж, удирдан чиглүүлэх ёстой. Ингээгүйн гайгаар Монгол Улсад эдийн засгийн хямрал нүүрлэж, улс төрийн тогтворгүй байдал үүсэж, нийгэмд үймээн самуун газар авах эрсдэл бий болоод байна. Бүр нарийн ярьвал, хурган дарга нарыг толгой, түрүүгүй загнадаг байдал, үйл ажиллагааг чинь зогсооно гэж бизнес эрхлэгчдээ дарамталдаг Ерөнхий сайдын үйлдэл хэрээс хэтрээд байх шиг.

Хүнийг загнаж болно, аашилж болно. Гэхдээ асуудлын голыг олж, зөв шийдэл, гаргалгаа хайхгүйгээр зөвхөн хариуцлагын сэлмээ эргүүлээд байвал энэ нийгэмд шударга ёс гэхээсээ илүүтэй худал хуурмаг ноёлох нь ойлгомжтой. Нийгэм шударга ёс тогтоох гэсэн Ерөнхий сайдын явуургүй эл үйлдэлтэй зэрэгцэн УИХ-ыг тараах асуудал яригдсан бол НИТХ-д мөн л тогтворгүй байдал үүсээд байна. Нэг үгээр хэлбэл, Засаг огцрох уу гэсэн эргэлзээтэй энэ цагт нийслэлийн Засаг даргыг суудлаас нь авч хаях гэсэн хөдөлгөөн өрнөөд эхэлжээ. Энэ бүхний эхлэл мэдээж Ерөнхий сайдаас үүдэлтэй. Хэрэвзээ, Ерөнхий сайд У.Хүрэлсүх зөв бодлогоор засаглалаа тэргүүлж чадсан бол өнөөдөр ийм асуудал үүсэх байсан гэж үү.

Дэлхийн улс орнууд эдийн засгийн бодлого нэгдүгээрт тавьж, гол анхаарлаа хандуулан зөв шийдэл гарц гаргалгаа гаргаж урагшилдаг. Гэтэл эрх баригч МАН-д тийм алсын хараа алга. МАН Засгийн эрх атгасан 2016 оноос хойш эдийн засагт гялайж, гялтайчихаар бодлогын зөв шийдэл харагдсангүй. Харин ч эдийн засгийн өсөлтийг сааруулсан, хөрөнгө оруулагчдыг үргээж, бизнес эрхлэгчдийн хөлийг тушсан шийдвэр олноор гаргасан. Хамгийн наандаж, эдийн засгийн гол хөшүүрэг болж буй Оюутолгойн төслийг хааж, бооно гэж сүрдүүлснээс эхлээд уул уурхайн лицензийг хуйгаар нь цуцалж байна. Цаашид ч цуцална гэх. Ноёны суудал ээлжтэй гэдэг шиг Ерөнхий сайд У.Хүрэлсүх албан тушаалаа хэзээ нэг өдөр өгөх нь ойлгомжтой. Тэр хүнд Монголын эдийн засаг бүрэн утгаараа сэргэх үү, үгүй юү гэдэг асуулт 100 хувь хамааралтай биш байж болох ч Монголын ард түмэнд хамгийн их хамаатай. Юу үнэн, энэ л үнэн. Тиймээс хариуцлагын сэлмээ ирлэхээс урьтаж, зөв бодлого, алсын хараатай төлөвлөгөө боловсруулахгүй бол монголчуудын ирээдүй хэдхэн жилийн настай байж ч мэдэхээр мөчлөгийн өмнө ирчихээд байна. 2021 оноос эхлээд Чингис, Самурай, Хубилай гээд өмнөх Засгийн газруудын тавьсан өрийг монголчууд төлж эхлэх учиртай. Гэтэл тэр их мөнгө нь хаана ч байгаа юм, бүү мэд. Үүнд зөв гаргалгаа хайж чадах эсэх нь Ерөнхий сайд У.Хүрэлсүхээс хамаарах нь ойлгомжтой. Тиймээс Ерөнхий сайд аа, хариуцлагын сэлэмнээс урьтаж, шийдлийн далайлтаа хийвэл яасан юм бэ.

Г.Эрдэнэ