Нийслэлийн Засаг дарга асан Э.Бат-Үүлийн “Ерөнхийлөгчийн шинэ томилгооны учир тодорч байна” нийтлэлийн эсрэг Ерөнхийлөгч  Х.Баттулга, Ерөнхийлөгчийн тамгын газрын дарга З.Энхболд нар гомдол гаргасан билээ. Тодруулбал, Э.Бат-Үүл нь 2019 оны зургадугаар сарын 25-ны өдөр дээрх нийтлэлээ бичсэн юм. Үүнийх нь хариуд Ерөнхийлөгч  Х.Баттулга, Ерөнхийлөгчийн тамгын газрын дарга З.Энхболд нар нийтлэлээрээ дамжуулж, өөрсдийг нь гүтгэсэн гэж Сүхбаатар дүүргийн цагдаагийн газарт хандсан юм. Цагдаагийн байгууллагаас  иргэн Э.Бат-Үүлийг бусдыг гүтгэсэн буюу Зөрчлийн хуулийн 6.21-д заасны дагуу хоёр удаа  2,000.000 төгрөгөөр торгосон юм.

Тэгвэл дээрх торгуулын арга хэмжээг үндэслэлгүй гэж Э.Бат-Үүл үзэж, Сүхбаатар дүүргийн Эрүүгийн хэргийн анхан шатны шүүхэд хүсэлт гаргасан байна. Энэ дагуу түүний өргөдлийг өнөөдөр 13.30 цагт хэлэлцэх юм байна.

Хэрвээ талууд шүүх хурлыг хойшлуулах хүсэлт гаргахгүй л бол өнөөдрийн шүүх хурлаас дээрх торгуулийг хүчингүй болгох, эсвэл хэвээр үлдээх гэсэн шийдвэр гаргах аж.

Г.Алимаа