Ерөнхийлөгч Х.Баттулга “гэнэт”-ийн зарлиг гаргаж Зэвсэгт хүчний Жанжин штабын даргаар ажиллаж байсан дэслэгч генерал Д.Давааг үүрэгт ажлаас нь чөлөөлж, хошууч генерал А.Ганбатыг томилсон нь саяхан. Бүр нарийн тодруулбал, гуравдугаар сарын 22-ны өдөр хошууч генерал А.Ганбатыг УИХ-аар хэлэлцэж, уг албанд томилохыг дэмжсэнийг Ерөнхийлөгч зарлиг гаргаж ёсчилсон байдаг. Сонирхолтой нь, Зэвсэгт хүчний Жанжин штабын дарга дахиад өөрчлөгдөж мэдэх нь. Учир нь, Монголын зэвсэгт хүчний бодлогыг зангидаад зургаан сарын нүүрийг үзэж буй генерал А.Ганбат үүрэгт ажлаасаа чөлөөлөгдөх өргөдлөө Ерөнхийлөгч Х.Баттулгад хүргүүлсэн бололтой. Эх сурвалжийн хэлж буйгаар төмөр замын бүтээн байгуулалтын ажлыг Жанжин штаб тэр дундаа цэргүүд хариуцах болсон энэ үед генерал А.Ганбатын баримталж байгаа бодлого Ерөнхийлөгч Х.Баттулга болон УИХ-ын дарга Г.Занданшатар нарынхтай зөрчилдөж эхэлсэнтэй холбогдуулж тэрбээр өөрийн хүсэлтээр ажлаас чөлөөлөгдөх өргөдлөө өгсөн гэнэ. Нөгөөтэйгүүр, Тавантолгой-Зүүнбаян чиглэлийн 414 км төмөр замыг өргөн, нарийн царигийн зөрчил Жанжин штабын даргыг ажлаа өгөхөд хүргэсэн бололтой.

Төгссөн сургууль, эзэмшсэн мэргэжлийн тухайд генерал А.Ганбат салбартаа шинэ хүн биш. Жанжин штаб, Батлан хамгаалах яаманд мэргэжилтнээс хэлтсийн, тэргүүн дэд дарга хүртэл албыг хашсан хүнийхээ хувьд салбараа арван хуруу шигээ мэддэг нэгэн. 2005 онд Ерөнхийлөгч асан Н.Багабандиас алтан мөрдэс зүүж, 2010 онд чөлөөлөгдсөн А.Ганбатыг албанд нь буцаан дуудах, бүр Жанжин штабын даргаар нэрийг нь дэвшүүлж, томилох шалтгаан Зэвсэгт хүчний ерөнхий командлагчид байсан уу гэвэл мэдээж байсан юм. Нэгдүгээрт, тэрбээр Ерөнхийлөгч Х.Баттулгын мөрийн хөтөлбөрт тусгасан цэргүүдээр төмөр зам бариулах ажлыг өдгөө гардан зохион байгуулж буй. Энэ тухайгаа “Цэргүүдийг бүтээн байгуулалтад оролцуулна гэдэг бол албадан хөдөлмөр эрхлүүлж байгаа хэрэг биш. Албадан хөдөлмөр эрхлүүлэх гэдэг бол цалин өгөхгүйгээр шууд үүнийг хий гэж тушаахыг хэлнэ. Монголд байгаа төмөр замыг ЗХУ-ын цэргүүд тавьсан юм. Одоо Тавантолгойн төмөр замыг БНХАУ тавина гээд байгаа. Цэргүүд нь л тавина шүү дээ. Тиймээс цэргүүдийг бүтээн байгуулалтад оролцуулна гэдгийг дэмжих хэрэгтэй” хэмээн “Цензургүй яриа” нэвтрүүлэгт оролцох үеэрээ генерал А.Ганбат тодорхой дурдсан байдаг.

Энэ нь ч ёсоор болж Дорноговь аймгийн Алтанширээ суман дахь газрын тос боловсруулах үйлдвэрийн төмөр замыг цэргүүд барьсан. Араас нь Тавантолгой-Зүүнбаян чиглэлийн 414 км төмөр замын бүтээн байгуулалтын ажлыг мөн гарган гүйцэтгэхээр болсон юм. Нөгөөтэйгүүр, генерал А.Ганбат нь бол “Монголын Алт” буюу “МАК”-тай салшгүй холбоотой нэгэн. “МАК”-ийн Бодлогын зөвлөлийн дарга Б.Нямтайширтай үеэл. Өнгөрснөөс өнөөдрийг хүртэл хугацаанд Монголын улс төрд, Төрийн ордонд өрнөсөн гол сэдэв нь “Газрын доорх баялаг ард түмний өмч” хэмээх Үндсэн хуулийн заалт байв. Ерөнхийлөгч, УИХ-ын дарга, Ерөнхий сайд нарын зүгээс ч хууль бусаар эзэмшиж байгаа ордуудыг төрд буцааж авна гэдгийг онцолж эхэлсэн. Хамгийн сүүлд Ерөнхийлөгчийн Тамгын газрын дарга З.Энхболд хэвлэлд өгсөн ярилцлагадаа “400 орд нэг нэг эзэнтэй гэж үзвэл 400 хүний уурыг хүргэчих гээд байна” хэмээн ярьжээ. Түүнийхээр тэдгээр 400 ордоос хэдийг нь төрд буцаан авах эсэх нь цаг хугацааны асуудал болох хэрэг. Өнөөдөр Монголд ямар компани хамгийн олон тусгай зөвшөөрөл эзэмшдэг нь хэн бүхний өмнө ил болсон зүйл. Парламентад “МАК”-ийг төлөөлж суудаг нэгхэн гишүүн бий, тэр нь Н.Номтойбаяр. Хэлэлцэж байгаа асуудал болон Цагаан суваргын ордтой холбогдуулж хамгийн их шүүмжлэлд өртдөг, сөрөг дайралтуудыг сөрдөг нь мөн л тэр.

Харин “МАК”-тай салшгүй холбоотой, холбогддог генерал Жанжин штабын даргын албан тушаалаасаа “татгалзах” болсон нь энэ өдрүүдийн халуун сэдэв байх нь дамжиггүй.

Г.Эрхэс