МАН-ын бүлгийн өнөөдрийн хуралдаанаар Ерөнхийлөгчийн хоригийг хэлэлцсэн ч гишүүд байр сууриа нэгтгэж чадсангүй. Энэ талаар Бүлгийн дарга Д.Тогтохсүрэн “Хоригийг хэлэлцэх сүүлчийн хугацаа ирэх баасан гараг. Тиймээс ойрын хугацаанд хоригийг хүлээж авах эсэхээ Бүлгийн хуралдаанаар хэлэлцэж, нэгдсэн шийдэлд хүрнэ” гэдгийг онцолсон. Өнөөдрийн Бүлгийн хуралдаанд тус намын ерөнхий нарийн бичгийн дарга Д.Амарбаясгалан оролцож, цаг үеийн асуудлаар Бүлгийн гишүүдтэй ярилцаж, байр сууриа илэрхийлжээ. Хуралдааны дараа тэрбээр сэтгүүлчдийн асуултад байр сууриа илэрхийлснийг хүргэж байна.

-Таныг УИХ-ыг тарааж, ээлжит бус сонгууль явуулах санал гаргаж, гарын үсэг цуглуулсан тухай мэдээлэл гарсан. Энэ үнэн үү. УИХ-ыг тараах асуудалд гишүүд ямар байр суурьтай байгаа юм бэ?

-Нэр бүхий гишүүнээс УИХ-ыг тараах санал гаргасан. Нэрийг нь зарлаад яах вэ. Гэхдээ гишүүдийн зүгээс гаргасан саналыг бид авч хэлэлцэх ёстой. Хуульд 51-ээс дээш гишүүн парламент тарахыг дэмжсэн тохиолдолд УИХ-аар хэлэлцэх заалттай. Энэ тохиолдолд татвар төлөгчдийн мөнгийг хэмнэх үүднээс 2020 оны зургаадугаар сард болох сонгуулийг арваннэгдүгээр сард болох Ард нийтийн санал асуулгатай хамтатган яагаад явуулж болохгүй гэсэн санал гарсан. Намын дарга, ерөнхий нарийн бичгийн дарга, Ерөнхий сайдаар ажиллаж байсан хүмүүсийн хүрээнд "Энэ асуудал байж болох уу, байлаа гэхэд яах вэ, Ард нийтийн санал асуулгыг дангаар нь явуулж 30 тэрбум төгрөг зарлагадаж байхаар ээлжит бус сонгууль явуулаад нэг сумаар хоёр туулай буудах нь зөв үү, буруу юу" гэдэг байдлаар ярьсан.

Удирдах зөвлөл энэ асуудлаар УИХ-ын гишүүдийн байр, суурийг сонсох үүднээс хандсан. Гэхдээ хуулийн дагуу 51 гишүүний гарын үсэг бүрдэх боломж, бололцоо хомс байсан. Тиймээс асуудлыг өргөн хүрээнд яриагүй. Анхан шатанд санал сонссон. Тодорхой хүрээнд санал солилцлоо. Дахин ийм асуудал яригдахгүй гэж ойлгож болно.

-“Эрдэнэт” үйлдвэрийн ерөнхий захирал Х.Бадамсүрэнг ажлаас нь чөлөөлж, МАН-ын нарийн бичгийн дарга Ц.Бат-Энхийг томилно гэсэн мэдээлэл байна?

-Худлаа. Ор үндэсгүй мэдээллийг зохион байгуулалттайгаар явуулж байна.

-Зам, тээврийн хөгжлийн сайд асан Д.Ганбатын тушаалаар 2016 оны сонгуулийн дараахан Н.Энхбаатарыг “МИАТ”-ийн дэд захирлаар томилсон тухай албан бичиг саяхан олон нийтэд ил болсон. Нэр бүхий гишүүд санал болгосны дагуу Таны гарын үсэгтэй албан бичиг тухайн үеийн сайдад очсон байна лээ?

-Сонгуулийн дараа УИХ-ын гишүүд өөрсдийн тойрогт ажилласан төр, намын ажлын дадлага туршлагатай хүмүүсийг санал болгодог. Ганц нэг бичиг ийш, тийшээ явж байсан. Түүний л нэг. УИХ-ын гишүүдээс дэмжихийг хүссэн бичиг ирдгийг би уламжилж өгөх үүрэгтэй. Намын дүрмээр боловсон хүчний бодлогыг удирдах зөвлөл шийдвэрлэдэг. Парламентын улс орны онцлог ийм тогтолцоогоор явдаг. Түүнээс хэн нэгэн дарга албан тушаалд очсон даруйдаа өөрийн үзэмжээр томилгоо хийх, тус байгууллагыг тогтворгүй болгох шийдвэрийг ганцаараа гардаггүй. Бололцоо нь ч хомс. Уг асуудал хууль зөрчсөн, өөртөө давуу байдал үүсгэсэн зүйл байхгүй. Намын Удирдах зөвлөл ярилцаж байж шийдвэр гаргадаг. УИХ-ын гишүүд өөрсдөө дэмжих хүсэлт ирүүлдэг. Хүсэлтийг нь хэлэлцээд дадлага, туршлага гэх мэт зүйлийг нь анхаарч ажилладаг.

-Төрийн албаны хуулиа зөрчсөн асуудал юм биш үү?

-Хууль биш намын дүрмийнхээ дагуу тодорхой асуудлыг УИХ-ын гишүүд Удирдах зөвлөлд тавьдаг. Намын дүрмийг Дээд шүүх баталдаг биз дээ.

-Гишүүдийн дэмжлэгтэйгээр МАН хэдэн хүнийг албан тушаалд томилсон бэ?

-Тийм олон хүн байхгүй. 2016 оны сонгуулиар манай намын олон гишүүн сонгогдсон.

-МИАТ-ийн дэд захирал асан Н.Энхбаатарын томилгоо “60 тэрбум”-ын схем хэрэгжсэний жишээ гэж яриад байгаа?

-Тийм зүйл байхгүй.

-Нийслэлийн МАН-ын хорооны дарга асан Ц.Сандуй “Цензургүй яриа” нэвтрүүлэгт орох үеэрээ таны нэрийг хэдэнтээ дурдсан. Үүнд ямар тайлбар хийх вэ?

-Би тайлбар өгөхгүй. Алдаа гаргасан бол түүнийгээ үүрээд явах ёстой.

С.Сүлд